Sən olasan “Gülüstan”

Bakı:

18 °C

88 %

4 m/s

Əlaqə

AZ RU EN

Ana səhifə / Sosial / Sən olasan “Gülüstan”

Sən olasan “Gülüstan”

12.05.2022 [10:34]

40 ildən çox tarixi olan saray

Müşfiqə BAYRAMLI

Bakı körfəzini və şəhərin mənzərəsini seyr etmək üçün ən gözəl məkanlardan biri “Gülüstan” sarayıdır. Paytaxtın mərkəzində, zirvəsində Şəhidlər xiyabanının olduğu dağın aşağı ətəklərində yerləşən “Gülüstan” sarayı 40 ildən çoxdur ki, şəhər sakinlərinə və qonaqlarına unudulmaz anlar yaşadır.

Heydər Əliyevin təşəbbüsü ilə tikilib

Heydər Əliyevin hakimiyyətə gəlişi Azərbaycanda həyatın axarını dəyişdi. Bakıda o vaxtlar nadir hallarda yaraşıqlı binalar, müəssisələr tikilirdi. “Gülüstan” sarayı da ümummilli lider Heydər Əliyevin təşəbbüsü ilə 1979-1980-ci illərdə inşa edilmişdi. Bakının memarlıq ansamblını daha da gözəlləşdirən bu sarayın inşası o zaman Ulu Öndərin paytaxtımızın inkişafı ilə bağlı həyata keçirdiyi silsilə tədbirlərin tərkib hissəsi idi. Sarayın tikintisinin gedişini şəxsən nəzarətdə saxlamış, inşaat işlərinin yüksək səviyyədə aparılması ilə bağlı tövsiyə və tapşırıqlarını vermişdi.

Milli memarlıq incisi

Layihənin arxitekturasında Azərbaycanın milli memarlıq elementlərindən geniş istifadə edilib. “Bakı Dövlət Layihə” institutu tərəfindən inşa edilən binanın müəllifləri (N.M.Hacıbəyov və A.Y.Əmirxanov) sarayın arxitekturasında Azərbaycan milli memarlığı üçün ənənəvi vahid motivləri tətbiq ediblər. Tağ sırası ilə çərçivələnmiş eyvanlar, binanın ümumi fasadına özünəməxsus görkəm bəxş edir. Ümumi sahəsi 11 743,8 m” olan “Gülüstan” sarayı yalnız keçmiş Sovet İttifaqında deyil, daha geniş məkanda ən müasir və özünəməxsus gözəl arxitektura nümunələrindən biri hesab olunur.

“Əsrin müqaviləsi”nə ev sahibliyi etdi

Öz əzəməti və bənzərsiz memarlıq üslubu ilə seçilən “Gülüstan” sarayında tarixi əhəmiyyət kəsb edən, müxtəlif sahələrə aid bir sıra ümumrespublika və beynəlxalq əhəmiyyətli tədbirlər keçirilib. Bunlardan ən mühümü 20 sentyabr 1994-cü ildə ümummilli lider Heydər Əliyevin təşəbbüsü ilə “Əsrin müqaviləsi” adlı neft sazişinin imzalanmasıdır. Əfsanədən reallığa çevrilən “Əsrin müqaviləsi” ölkəmizin tarixinə yeni neft strategiyasının şanlı səhifəsi kimi yazıldı.

Tariximizin ən ağrılı səhifələrindən olan “Gülüstan” müqaviləsi ilə parçalanan ölkəmiz məhz “Gülüstan” sarayında “Əsrin müqaviləsi”nin imzalanması ilə yüksəlişə keçdi - iqtisadi dayaqlarını, siyasi sütunlarını gücləndirdi.

“Gülüstan” sarayında yenidənqurma

Zaman keçdikcə “Gülüstan” sarayının yenidən qurulmasına zərurət yaranmışdı. 2019-cu ilin yanvar ayında Prezident İlham Əliyevin tapşırığı ilə binanın əsaslı təmirinə başlanıldı. Əzəmətli “Gülüstan” sarayı yüksək səviyyədə və özünəməxsus memarlıq üslubu saxlanılmaqla yenidən quruldu. 2021-ci ilin iyun ayında Prezident İlham Əliyev və Birinci vitse-prezident Mehriban Əliyeva “Gülüstan” sarayında yenidənqurmadan sonra yaradılan şəraitlə tanış oldular.

Ən nəhayət, 44 günlük Vətən müharibəsində şanlı qələbəmizdən sonra Ali Baş Komandan İlham Əliyev iyunun 26-da Silahlı Qüvvələr Günü münasibətilə “Gülüstan” sarayında Azərbaycan Ordusunun rəhbər və şəxsi heyətinin bir qrupu ilə görüşmüşdü. Bu il fevralın 2-də Azərbaycan Gəncləri Gününün 25 illiyinə həsr olunmuş Gənclər Forumu da “Gülüstan” sarayında keçirildi.

Paylaş:

Baxılıb: 853 dəfə