10 180 770 nəfər olduq!

Bakı:

26 °C

52 %

0 m/s

Əlaqə

AZ RU EN

Ana səhifə / Sosial / 10 180 770 nəfər olduq!

10 180 770 nəfər olduq!

16.02.2024 [10:50]

Demoqrafik artım ən mühüm prioritetlərdəndir

Y.BAYRAMOVA

Demoqrafik inkişaf hər bir ölkənin milli gücünün əsas göstəricilərindən biridir. Artım tempi həm də əhalinin fiziki və mənəvi sağlamlığının, intellektual səviyyəsinin əsas göstəricisi sayılır. Təbii artım tempi dövlətin əsas dayaqlarından biri olan insan resursunu təşkil etməsi baxımından önəm daşıyır.

Ümumiyyətlə, son dövrlərdə dünya əhalisinin ümumi sayında artım müşahidə olunsa da, bu fakt ayrı-ayrı ölkələr üzrə dəyişir. Ölkələrdə əhalinin artım tempinə həyat tərzi, sosial rifah səviyyəsi kimi amillər də mühüm təsir göstərir. Əhalinin normal artımı, yaş qrupları arasında münasib balansın qorunub saxlanması milli təhlükəsizlik əhəmiyyəti daşıyan bir məsələdir.

Bu baxımdan, Azərbaycanda kifayət qədər müsbət mənzərə mövcuddur. Belə ki, ölkəmizdə əhalinin sayı artıb. Bu barədə Dövlət Statistika Komitəsi (DSK) məlumat yayıb. Belə ki, 2023-cü ildə ölkə üzrə əhalinin sayı 53 625 nəfər və ya 0,5 faiz artaraq 2024-cü il yanvar ayının 1-i vəziyyətinə 10 180 770 nəfərə çatıb.

DSK-dan verilən xəbərə görə, əhalinin 54,5 faizini şəhər, 45,5 faizini kənd sakinləri, 49,8 faizini kişilər, 50,2 faizini isə qadınlar təşkil edir.

Bu ilin əvvəlinə əhalinin 4,6 faizi Naxçıvan Muxtar Respublikasında, 23 faizi Bakı şəhərində, 9,2 faizi Lənkəran-Astara, 8,6 faizi Abşeron-Xızı, 7,3 faizi Qarabağ, 7,1 faizi Mərkəzi Aran, 6,7 faizi Qazax-Tovuz, 6,1 faizi Şəki-Zaqatala, 5,9 faizi Gəncə-Daşkəsən, 5,4 faizi Quba-Xaçmaz, 5,1 faizi Mil-Muğan, 4,9 faizi Şirvan-Salyan, 3,1 faizi Dağlıq Şirvan, 3 faizi Şərqi Zəngəzur iqtisadi rayonlarında yaşayıb. Ölkə üzrə bir kvadrat kilometrə düşən əhalinin sayı 118 nəfər olub.

Mövzu barədə “Yeni Azərbaycan”a açıqlama verən sosioloq Sahib Altayın sözlərinə görə, Azərbaycan əhalisinin sayının artması onu göstərir ki, ölkəmizdə yaşam səviyyəsi yüksəkdir: “Əhalinin təbii artım tempi kompleks şəkildə aparılan dövlət siyasətinin müsbət göstəricisi kimi qəbul oluna bilər. Hansı ölkədə iqtisadi vəziyyət normaldırsa, dövlət ailə institutlarına qayğı göstərirsə, orada əhalinin artımı baş verir. Azərbaycan da belə ölkələrdəndir. Bu, bizim uğurlu demoqrafik siyasətimizdən xəbər verir. Dövlət başçısının apardığı siyasətin təməlində Azərbaycan vətəndaşı dayanır”.

Sosioloq qeyd edib ki, son illər ölkəmizdə dünyaya uşaq gətirən valideynlərin oğlan və qız uşaqları arasında ayrı - seçkilik qoyması halları da azalıb: “Təbii ki, bu da ölkəmizdə əhalinin təbii artımına şərait yaradan əsas məqamlardan biridir. Bildiyiniz kimi, əvvəlki zamanlarda valideynlər oğlan uşaqlarının dünyaya gəlməsinə daha çox üstünlük verirdilər. Nəticədə çoxsaylı qız uşaqlarının abort etdirilməsinə şahid olurduq. Sevindirici haldır ki, daha cəmiyyətimizdə belə ayrı-seçkiliyə yol verilmir”.

Paylaş:

Baxılıb: 637 dəfə