“Əbədiyaşar Lider”

Bakı:

25 °C

38 %

3 m/s

Əlaqə

AZ RU EN

Ana səhifə / YAP xəbərləri / “Əbədiyaşar Lider”

“Əbədiyaşar Lider”

07.05.2024 [16:27]

07 may 2024-cü il tarixdə Hacıqabul rayon Heydər Əliyev Mərkəzində Xalqımızın Ümummilli Lideri, müasir-müstəqil Azərbaycanın qurucusu və Yeni Azərbaycan Partiyasının banisi Ulu Öndər Heydər Əliyevin anadan olmasının 101 illiyi münasibəti ilə Yeni Azərbaycan Partiyası Hacıqabul rayon təşkilatının təşkilatçılığı və Hacıqabul rayon İcra Hakimiyyətinin dəstəyi ilə “Əbədiyaşar Lider” adlı elmi-praktik konfrans keçirilmişdir.

Tədbirdə Hacıqabul rayon İcra Hakimiyyətinin başçısı Rüstəm Xəlilov, YAP Hacıqabul rayon təşkilatının sədri İsmayıl İbrahimov, rayonda fəaliyyət göstərən idarə, təşkilat və müəssisə rəhbərləri, ərazi partiya təşkilat sədrləri və YAP fəalları iştirak etdilər.

Konfrans iştirakçıları öncə Ümummilli Lider Heydər Əliyevin abidəsini ziyarət edərək, abidə önünə gül dəstələri düzdülər.

Azərbaycan Respublikasının Dövlət Himninin səslənməsi ilə başlanan tədbirdə Ulu Öndər Heydər Əliyevin və Azərbaycanın ərazi bütövlüyü uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edildi.

Elmi-praktik konfransı Yeni Azərbaycan Partiyası Hacıqabul rayon təşkilatının sədri İsmayıl İbrahimov açaraq bildirdi ki, xalqımız üçün may ayının 10-u əlamətdar gündür. Həmin gün biz azərbaycanlılar üçün artıq simvollaşıb, tarixləşib. Çünki Azərbaycanın görkəmli ictimai-siyasi və dövlət xadimi, xalqımızın dahi oğlu və böyük öndəri Heydər Əlirza oğlu Əliyev məhz bu gün - mayın 10-da anadan olmuşdur. Tarix dəfələrlə sübut etmişdir ki, Ulu Öndər böyük iradə və qətiyyət sahibi, təkrarsız şəxsiyyət olmaqla ən çətin vəziyyətdən belə çıxmaq üçün düzgün yol tapmağı bacarırdı. Ona görə də həmişə başladığı işi uğurla sona çatdırırdı.

Dövlətçilik salnaməmizdə silinməz izlər qoymuş, azərbaycanlı olması ilə ömür boyu fəxr etmiş, milli qürur və iftixar mənbəyimiz olan Heydər Əliyev bütün dünyada Azərbaycanın rəmzi kimi qəbul edilir. Xalqımız onun əziz xatirəsini həmişə uca tutur və minnətdarlıqla anır.

Müstəqil Azərbaycan Ulu Öndərin indiki və gələcək nəsillərə əmanəti, onun zəngin və çoxşaxəli irsi isə xalqımızın milli sərvətidir. Bu müqəddəs mirası qoruyub saxlamaq hər bir azərbaycanlının şərəfli vəzifəsidir. Nə qədər ki Azərbaycan var, nə qədər ki bu millət var, Heydər Əliyev də var olacaq. Ümummilli Liderimizin əziz xatirəsi qəlbimizdə hər zaman əbədi yaşayacaq.

Daha sonra Hacıqabul rayonu üzrə Maliyyə Şöbəsinin rəisi Nərgiz Hacıyeva, Rəqəmsal İnkişaf və Nəqliyyat Nazirliyinin Aztelekom Məhdud Məsuliyyətli Cəmiyyətinin Cənub Şirvan Regional Filialının Hacıqabul rayon şöbəsinin müdiri Ramin Ağayev çıxış etdilər.

Hacıqabul rayon İcra Hakimiyyəti başçısının birinci müavini Saleh Ələskərov çıxış edərək qeyd etdi ki, Heydər Əliyev xalqımızın ləyaqət və qeyrət simvolu, ən ağır vaxtlarda yeganə güvənc yeri olmuşdur. Azərbaycanın son yarım əsrə yaxın bir dövrünü əhatə edən tarixi, taleyi bu illər ərzində xalqın ictimai-siyasi, iqtisadi və mədəni həyatının bütün sahələrində dirçəlişi dahi şəxsiyyətin adı ilə bağlıdır.

Azərbaycana rəhbərliyinin birinci dövründə Dahi şəxsiyyət özünün qeyri-adi idarəçilik bacarığı, polad iradəsi və yüksək vətənpərvərliyi sayəsində, uzaqgörən və məqsədyönlü qərarları ilə çox qısa müddətdə respublikamızda sosial-iqtisadi, elmi-texniki və mədəni sahələrin inkişafında böyük sıçrayışa nail olmuşdur. Tariximizin gedişatının və həyatımızın ahənginin köklü surətdə dəyişdiyi, azadlıq və müstəqillik duyğularının milli düşüncəmizdə üstünlük təşkil etməyə başladığı bu illər Azərbaycanın quruculuq salnaməsinin ən parlaq səhifələridir. Ulu Öndər Heydər Əliyevin xalqımızın yaradıcılıq enerjisini bir məqsədə yönəltməklə tarixi yaddaşın bərpası istiqamətindә atdığı qətiyyətli addımlar o dövrdə milli ruhun canlanmasına xidmət göstərmiş, özünüdərki və soy-kökə qayıdışı təmin etmiş, müstəqil dövlət quruculuğuna aparan yolun təməl daşına çevrilmişdir.

Tədbir Yeni Azərbaycan Partiyası himninin sədaları altında sona çatdı.

Paylaş:

Baxılıb: 580 dəfə