Azərbaycan-Misir əlaqələri bu gün sürətlə inkişaf edir

Bakı:

25 °C

69 %

11 m/s

Əlaqə

AZ RU EN

Ana səhifə / YAP xəbərləri / Azərbaycan-Misir əlaqələri bu gün sürətlə inkişaf edir

Azərbaycan-Misir əlaqələri bu gün sürətlə inkişaf edir

12.06.2024 [16:11]

Cari ilin iyun ayının 8-də Prezident cənab İlham Əliyevin Misirin paytaxtı Qahirəyə etdiyi rəsmi səfər zamanı verdiyi bəyanatlar Azərbaycan və Misir arasındakı münasibətlərin geniş spektrini əhatə edərək, bir sıra strateji sahələrdə əməkdaşlığın inkişafını ön plana çıxardı. Bu bəyanatlar Azərbaycan-Misir əlaqələrinin gücləndirilməsi, regional təhlükəsizlik və iqtisadi əməkdaşlıq kimi məsələlər üzərində cəmləşib.

Bu gün iki dost ölkə Misirlə Azərbaycan bir çox beynəlxalq təşkilatlar, o cümlədə İslam Əməkdaşlıq Təşkilatı (İƏT) çərçivəsində sıx əməkdaşlıq edir. Misir torpaqlarımızın Ermənistan tərəfindən işğalı dövründə ölkəmizin ərazi bütövlüyünü dəstəkləyib, həmçinin İƏT-in Ermənistanın işğalçı siyasətini pisləyən qərarlarına qoşulub. 1994-cü ilin aprelində rəsmi Qahirə BMT-nin Cenevrədəki İnsan Hüquqları Komissiyasının 52-ci sessiyasında Ermənistan-Azərbaycan münaqişəsində ölkəmizin haqlı mövqeyini dəstəkləyib.

İlham Əliyev Misir Prezidenti Əbdülfəttah əs-Sisi ilə görüşündə Azərbaycan-Misir münasibətlərinin tarixi dərinliyini və bu əlaqələrin inkişaf etdirilməsi zərurətini vurğulayıb. Prezident Əliyev Azərbaycanın Misirlə müxtəlif sahələrdə, xüsusən enerji, nəqliyyat və kənd təsərrüfatı sahələrində əməkdaşlığı genişləndirmək istədiyini bildirib. Ölkə başçısı xüsusilə enerji və nəqliyyat sahələrində əməkdaşlığın inkişaf etdirilməsi istiqamətində atılacaq addımlara diqqət çəkib. Azərbaycanın zəngin enerji resurslarının Misir bazarlarına çıxarılması və bu istiqamətdə infrastruktur layihələrinin həyata keçirilməsi perspektivləri dəyərləndirilib.

Görüşdə regional təhlükəsizlik və sabitlik məsələləri də geniş müzakirə olunub. Prezident İlham Əliyev Ermənistan-Azərbaycan münaqişəsi haqqında məlumat verərək, Azərbaycanın ərazi bütövlüyünün təmin olunmasının vacibliyini vurğulayıb. O, beynəlxalq hüququn prinsiplərinə əsaslanan sülh prosesinin zəruriliyini qeyd edərək, Misirin bu məsələdə Azərbaycanın haqlı mövqeyini dəstəkləməsinin əhəmiyyətini qeyd edib.

Həmçinin, iki ölkə arasında mədəni və humanitar sahələrdə əməkdaşlığın genişləndirilməsi istiqamətində fikir mübadiləsi aparılıb. Misirin zəngin mədəni irsini vurğulayan İlham Əliyev, bu ölkənin qədim sivilizasiyası ilə Azərbaycan arasında daha sıx mədəni əlaqələrin qurulmasının vacibliyini qeyd edib. Bu sahədə təhsil və mədəniyyət proqramlarının genişləndirilməsi, qarşılıqlı tələbə mübadiləsi və mədəniyyət tədbirlərinin təşkil edilməsi nəzərdə tutulur.

Səfər zamanı Azərbaycan və Misir arasında müxtəlif sahələrdə əməkdaşlığı gücləndirmək üçün bir sıra rəsmi sənədlər imzalanıb. Bu sənədlər arasında iqtisadi, enerji və təhsil sahələrində anlaşmalar xüsusi yer tutur. İmzalanan sənədlər ikitərəfli münasibətlərin hüquqi bazasının daha da möhkəmləndirilməsi və gələcək əməkdaşlıq üçün yeni imkanlar yaratmağı hədəfləyir.

İlham Əliyevin Misirə səfəri iki ölkə arasındakı münasibətlərin strateji əhəmiyyətini bir daha özündə göstərdi. Azərbaycan və Misir arasındakı əməkdaşlığın genişləndirilməsi, Cənubi Qafqaz və Şimali Afrika regionlarında sabitliyin və təhlükəsizliyin təmin edilməsinə də müsbət təsir göstərəcək. Bu əməkdaşlıq, eyni zamanda, Avropa və Asiya arasında enerji və nəqliyyat dəhlizlərinin inkişaf etdirilməsi baxımından da əhəmiyyətlidir.

Son illərdə mühüm uğurlar qazanan və beynəlxalq aləmdə söz sahibinə çevrilən Azərbaycanın istər bölgədə, istərsə də dünyada nüfuzu durmadan artmaqdadır. Dövlətimizin başçısının yürütdüyü müdrik və uzaqgörən siyasət nəticəsində Azərbaycan dünyada etibarlı tərəfdaş kimi tanınır. Bunu dünya ölkələrinin, nüfuzlu beynəlxalq təşkilatların Azərbaycanla əməkdaşlıqda maraqlı olmaları da təsdiqləyir. Yüksək səviyyəli qarşılıqlı səfərlər Azərbaycan dövlətinin beynəlxalq əlaqələrinin genişlənməsinə mühüm töhfə verəcəkdir. Dövlətlərimiz arasında qeyri-neft sektoru, sahibkarlıq, rəqəmsal iqtisadiyyat, innovasiya, nəqliyyat və tranzit sahələrində əlaqələri genişləndirmək üçün mümkün olan imkanların gələcəkdə daha da inkişaf etdiriləcəyinə ümidlər bəsləyirik.

Varis Rüstəmov,

Yeni Azərbaycan Partiyası Sabirabad rayon təşkilatının sədri

Paylaş:

Baxılıb: 617 dəfə