Üçrəngli bayrağımız bütün azərbaycanlılar üçün milli qürur mənbəyidir

Bakı:

15°C

88%

2m/s

Əlaqə

AZ RU EN

Ana səhifə / YAP xəbərləri / Üçrəngli bayrağımız bütün azərbaycanlılar üçün milli qürur mənbəyidir

Üçrəngli bayrağımız bütün azərbaycanlılar üçün milli qürur mənbəyidir

06.11.2024 [17:35]

Namiq Əhmədov,

YAP Xəzər rayon təşkilatının sədri

Azərbaycan bayrağı ölkəmizin müstəqilliyini, suverenliyini və milli kimliyini təmsil edən ən müqəddəs rəmzlərdən biridir. Bayrağımızın rəngləri və simvolları xalqımızın dərin köklərə, zəngin tarixə və güclü dəyərlərə malik olduğunu ifadə edir. Bu dəyərləri qorumaq və gələcək nəsillərə çatdırmaq isə hər bir vətəndaşın borcudur.

Bayrağımızın tarixi Azərbaycan xalqının öz müstəqilliyi uğrunda göstərdiyi əzmkarlığı və bu yolda çəkdiyi zəhmətləri əks etdirir. Bugünkü üçrəngli bayraq, ilk dəfə 1918-ci ildə Azərbaycan Xalq Cümhuriyyəti dövründə qəbul olunmuşdur. Cümhuriyyətin qurucuları bu bayrağı milli dövlətçilik simvolu kimi qəbul edərək xalqımızın türk kimliyini, müasir inkişafını və dini bağlılığını simvollaşdırdılar. 1918-ci il mayın 28-də Şərqdə ilk demokratik respublika olan Azərbaycan Xalq Cümhuriyyəti (AXC) yaradıldı. İlk olaraq Azərbaycan bayrağı qırmızı zəmində ağ aypara və səkkizguşəli ulduzdan ibarət idi. Ancaq həmin il noyabrın 9-da AXC hökuməti qərara aldı ki, Azərbaycan bayrağı üç rəngdən ibarət olmalıdır. Mavi, qırmızı və yaşıl rənglərin birləşdiyi bu bayraq, xalqımızın milli kimliyini əks etdirən simvola çevrildi.

1920-ci ilin aprelində Azərbaycanın müstəqilliyi sona çatdı və ölkə Sovet İttifaqına birləşdirildi. Bu dövrdə üçrəngli bayraq qadağan edildi və onun əvəzinə SSRİ-nin kommunist simvollarını əks etdirən qırmızı bayraq qəbul olundu. Uzun illər boyu Azərbaycanın milli bayrağının istifadəsinə icazə verilmədi və bayrağımız tarixi simvol kimi yalnız azərbaycanlıların qəlbində yaşadı.

1980-ci illərin sonlarında SSRİ-də baş verən yenidənqurma və açıq siyasət dövrü Azərbaycanın milli azadlıq hərəkatına təkan verdi. 1988-ci ildə başlayan bu hərəkatda üçrəngli bayraq xalqın milli azadlıq arzularını əks etdirən əsas simvola çevrildi. 1990-cı ilin 17 noyabrında Naxçıvan Muxtar Respublikasının Ali Məclisinin sədri Heydər Əliyevin təşəbbüsü ilə üçrəngli bayraq Naxçıvanda rəsmi olaraq qaldırıldı və Azərbaycan Respublikasının milli bayrağı elan edildi.

1991-ci il oktyabrın 18-də Azərbaycan öz müstəqilliyini bərpa etdi və üçrəngli bayraq rəsmi dövlət bayrağı olaraq qəbul olundu. Bu gün bayraq ölkəmizin müstəqillik rəmzi kimi beynəlxalq aləmdə tanınır və dövlətçiliyimizin ən əsas simvollarından biridir. Azərbaycan dövlətinin müstəqilliyini və suverenliyini əks etdirən üçrəngli bayraq, azərbaycanlılar üçün milli qürur mənbəyidir.

2007-ci ildə Azərbaycan Respublikasının Prezidenti cənab İlham Əliyevin təşəbbüsü ilə Bakıda Dövlət Bayrağı Meydanı yaradıldı. 162 metr hündürlüyündə dalğalanan bu bayraq Azərbaycan xalqının milli qürurunu simvolizə edən əbədi bir rəmz kimi şəhərin mənzərəsinə əlavə olundu.

Azərbaycan Respublikasında Dövlət Bayrağı Günü hər il 9 noyabrda qeyd edilir. Bu gün Azərbaycan Respublikası Prezidenti cənab İlham Əliyevin 2009-cu il 17 noyabr tarixli qərarı ilə təsis edilmişdir. Bayraq Günü Azərbaycan xalqı üçün qürur və vətənpərvərlik günüdür. Bu gün milli kimliyimizi, müstəqilliyimizi və suverenliyimizi təcəssüm etdirən müqəddəs bayrağımızı uca tutmaq və ona dərin hörmət ifadə etmək üçün qeyd olunur.

Dövlət Bayrağı Günü bayrağımızın əhəmiyyətini yenidən düşünmək, onun altında birlik olmaq və ölkəmizin müstəqilliyi uğrunda canlarını qurban verən qəhrəmanları yad etmək üçün bir fürsətdir. Bayraq Günü, eyni zamanda, gənc nəsillərin vətənpərvər ruhda böyüməsinə, öz tarixini və milli dəyərlərini sevməsinə də töhfə verir.

Bayraq bir xalqın qəlbindəki sevgini, mübarizəni və azadlıq eşqini simvolizə edən bir dəyərdir. Azərbaycan bayrağı uğrunda canlarını fəda edən şəhidlərimizin, eləcə də ərazi bütövlüyümüz uğrunda çalışan hər bir azərbaycanlının səyləri ilə daha da müqəddəs anlam qazanır. Bayrağımız hər birimizin qəlbində dərin sevgi və hörmətlə yer tutur, vətənpərvərlik ruhunu oyandırır.

Bu səbəbdən, hər bir azərbaycanlı üçün bayrağımıza sahib çıxmaq, onu sevmək, onun ətrafında birləşmək böyük əhəmiyyət daşıyır. Bayraq Günü də xalqımızın birliyini, həmrəyliyini və öz millətinə olan dərin bağlılığını daha da gücləndirən bir gündür.

Paylaş:

Baxılıb: 349 dəfə