Azərbaycan və Somali Arasında İqtisadi Əməkdaşlıq: Yeni Perspektivlər

Bakı:

32 °C

40 %

4 m/s

Əlaqə

AZ RU EN

Ana səhifə / YAP xəbərləri / Azərbaycan və Somali Arasında İqtisadi Əməkdaşlıq: Yeni Perspektivlər

Azərbaycan və Somali Arasında İqtisadi Əməkdaşlıq: Yeni Perspektivlər

20.02.2025 [17:16]

Abbas Pənahov,

Yeni Azərbaycan Partiyası Nəsimi rayon təşkilatının sədr müavini

Azərbaycan və Somali arasında iqtisadi əlaqələrin inkişafı istiqamətində mühüm addımlar atılmaqdadır. Somali Prezidenti Azərbaycana rəsmi səfəri çərçivəsində iki ölkə arasında iqtisadi əməkdaşlığın genişləndirilməsi məsələləri ətrafında müzakirələr aparılıb. Bundan əvvəl Azərbaycanın geniş nümayəndə heyəti Somaliyə səfər edərək, potensial sərmayə sahələri və əməkdaşlıq imkanlarını araşdırmışdır. Bu prosesin davam etdirilməsi və konkret layihələrin müəyyən edilməsi vacib məsələlərdən biri kimi diqqətə çatdırılıb.

Azərbaycan və Somali iqtisadi münasibətlərin inkişafı üçün bir sıra strateji sahələr müəyyənləşdiriblər. Bu sahələr arasında infrastruktur, liman qurğuları və kənd təsərrüfatı xüsusi əhəmiyyət daşıyır. Somali Prezidenti kənd təsərrüfatında böyük potensialın olduğunu vurğulayıb və bu istiqamətdə Azərbaycanın təcrübəsi ilə bölüşmək imkanı yaranıb. Azərbaycanın kənd təsərrüfatı sahəsində özünü təminetmə strategiyası Somalidə tətbiq oluna bilər və qarşılıqlı sərmayələr bu sahənin inkişafına töhfə verə bilər.

Azərbaycan və Somali müdafiə sənayesi sahəsində də əməkdaşlığı genişləndirmək niyyətindədir. Azərbaycan müdafiə avadanlıqlarının əksər hissəsini istehsal edərək, güclü müdafiə sənayesi yaratmışdır. Somali Prezidenti Bakıya səfəri zamanı Azərbaycanın müdafiə imkanları ilə tanış olacaq. Müdafiə sahəsində təlimlər və müasir avadanlıqların təmin edilməsi də müzakirə edilən əsas məsələlərdəndir. Azərbaycanın hərbi təcrübəsi və xüsusi təyinatlı qüvvələrinin peşəkarlığı Somalinin təhlükəsizlik sektorunun gücləndirilməsinə mühüm töhfə verə bilər.

Azərbaycanın ASAN xidmət modeli dövlət xidmətlərinin effektiv və şəffaf təşkilində mühüm nümunələrdən biridir. Somali Prezidenti Bakıya səfəri zamanı ASAN xidmət mərkəzlərindən birini ziyarət edəcək və bu sistemin Somalidə tətbiqi imkanları dəyərləndiriləcək. Əgər Somali tərəfi bu modeli bəyənsə, Azərbaycan bu sahədə təcrübəsini paylaşaraq Somalidə oxşar bir sistemin qurulmasına dəstək göstərə bilər.

Azərbaycan və Somali beynəlxalq təşkilatlar çərçivəsində əməkdaşlıqlarını daha da gücləndirməyə hazırdır. Birləşmiş Millətlər Təşkilatı, İslam Əməkdaşlığı Təşkilatı və digər beynəlxalq qurumlarda hər iki ölkə bir-birinə dəstək verəcək. Bu əməkdaşlıq regional və beynəlxalq platformalarda qarşılıqlı maraqların qorunmasını təmin edəcək.

Azərbaycan və Somali arasındakı iqtisadi əməkdaşlıq sahəsində yeni perspektivlər açılır. İnfrastruktur, kənd təsərrüfatı, müdafiə sənayesi və dövlət xidmətləri sahələrində əməkdaşlıq potensialı böyükdür. Hər iki ölkə arasında imzalanmış razılaşmalar bu əməkdaşlığın davamlı və məhsuldar olmasını təmin edəcək. Somali ilə iqtisadi əlaqələrin gücləndirilməsi Azərbaycanın Afrika qitəsindəki mövqeyini möhkəmləndirə bilər və eyni zamanda Somali üçün yeni inkişaf imkanları yarada bilər.

Paylaş:

Baxılıb: 439 dəfə