"Azərbaycan təhsilinin inkişafında ulu öndər Heydər Əliyevin tarixi xidmətləri" mövzusunda tədbir keçirilib

Bakı:

22 °C

73 %

5 m/s

AZ RU EN

Ana səhifə / YAP xəbərləri / "Azərbaycan təhsilinin inkişafında ulu öndər Heydər Əliyevin tarixi xidmətləri" mövzusunda tədbir keçirilib

"Azərbaycan təhsilinin inkişafında ulu öndər Heydər Əliyevin tarixi xidmətləri" mövzusunda tədbir keçirilib

17.05.2025 [14:22]

Tovuz rayon İcra Hakimiyyəti, Yeni Azərbaycan Partiyasının Tovuz rayon təşkilatı və Qazax-Tovuz Regional Təhsil İdarəsinin Tovuz rayonu üzrə Təhsil Sektorunun birgə təşkilatçılığı ilə "Azərbaycan təhsilinin inkişafında ulu öndər Heydər Əliyevin tarixi xidmətləri" mövzusunda tədbir keçirilib.

Tədbirdə YAP Tovuz rayon təşkilatının sədri Nihad Pənahov, Tovuz rayon İcra Hakimiyyətinin başçısının müavini Təranə Bayramova, Tovuz rayonu üzrə Təhsil Sektorunun müdir əvəzi Elşən Musayev və digər rəhbər şəxslər iştirak ediblər.

Tədbirdən öncə Tovuz şəhərində yerləşən Heydər Əliyev adına mədəniyyət və istirahət parkında Ümummilli Lider Heydər Əliyevin abidəsi önünə gül-çiçək dəstələri düzülüb, Ulu Öndərin əziz xatirəsi ehtiramla yad edilib.

Tədbirdə Azərbaycan Respublikasının Dövlət Himni səsləndirilib. Ulu Öndər Heydər Əliyevin, Azərbaycanın ərazi bütövlüyü və suverenliyi uğrunda canlarını qurban vermiş şəhidlərin əziz xatirəsi bir dəqiqəlik sükutla yad edilib.

Daha sonra “Azərbaycan təhsilinin inkişafında ulu öndər Heydər Əliyevin tarixi xidmətləri” mövzusunda videoçarxa baxış keçirilib.

YAP Tovuz rayon təşkilatının sədri Nihad Pənahov çıxışında bildirib ki, ulu öndər Heydər Əliyev hər zaman təhsili dövlətin və xalqın inkişafı üçün əsas prioritet sahə kimi qiymətləndirib. Onun təhsil sahəsində atdığı məqsədyönlü addımlar bu gün ölkəmizin uğurlu təhsil sisteminin əsasını təşkil edir. Nihad Pənahov əlavə edib ki, Prezident İlham Əliyevin və Birinci vitse-prezident Mehriban Əliyevanın rəhbərliyi ilə ölkəmizdə təhsil sahəsində həyata keçirilən genişmiqyaslı islahatlar, yeni təhsil müəssisələrinin yaradılması və təhsilin keyfiyyətinin artırılması istiqamətində atılan addımlar ulu öndərin ideyalarının davamı olmaqla, gənc nəsillərin yüksək səviyyədə yetişdirilməsinə böyük töhfə verir.

Tovuz rayon İcra Hakimiyyətinin başçısının müavini Təranə Bayramova çıxışında bildirib ki, ulu öndər Heydər Əliyevin təhsil sahəsində gördüyü işlər ölkəmizin müasir inkişaf modelinin əsas sütunlarından biridir. Təhsil cəmiyyətin rifahı və davamlı inkişafı üçün vacibdir və bu sahədə çalışanların üzərinə böyük məsuliyyət düşür. O, vurğulayıb ki, Prezident İlham Əliyevin və Mehriban xanım Əliyevanın dəstəyi ilə həyata keçirilən təhsil proqramları və layihələr ölkəmizin dünya təhsil məkanında layiqli yer tutmasına xidmət edir və təhsil sisteminin müasirləşdirilməsində xüsusi əhəmiyyət kəsb edir.

Digər çıxışçılar - Tovuz rayonu üzrə Təhsil Sektorunun müdir əvəzi Elşən Musayev, Azərbaycan Respublikası Təhsil İnstitutu Təhsil Texnologiyaları Mərkəzinin Tovuz rayonu üzrə nümayəndəsi Fikrət Tağıyev, Yusif Alıyev adına Hacıhəsənli kənd tam orta ümumtəhsil məktəbinin tədris işləri üzrə direktor müavini Elçin Rzayev və Tovuz şəhəri Mahir Ələkbərov adına fizika, riyaziyyat və informatika təmayüllü liseyin tarix müəllimi Xəyalə Məmmədova çıxışlarında ulu öndərin təhsil sahəsində gördüyü işlərin ölkəmiz üçün nə dərəcədə əhəmiyyətli olduğunu qeyd ediblər. Onlar vurğulayıblar ki, Heydər Əliyevin xidmətləri müəllimlərin peşəkarlıq səviyyəsinin yüksəldilməsi, gənc nəsildə vətənpərvərlik və milli dəyərlərə hörmət hissinin formalaşması üçün möhkəm zəmin yaradıb. Çıxışlarda həmçinin Prezident İlham Əliyev və Mehriban xanım Əliyevanın təhsil sahəsində apardıqları işlərin ölkəmizin beynəlxalq təhsil standartlarına uyğunlaşması və innovativ təhsil texnologiyalarının tətbiqi baxımından önəmi qeyd olunub. Gələcəkdə bu istiqamətdə görüləcək işlərin əhəmiyyəti və təhsil sisteminin inkişafı üçün bütün qüvvələrin səfərbər olunmasının vacibliyi vurğulanıb.

Rayon təşkilatının fəaliyyətində aktiv iştirakına görə bir qrup şəxsə, həmçinin 2024-2025-ci tədris ilində buraxılış imtahanlarından XI sinif şagirdləri arasında rayon üzrə ən yüksək bal toplayan şagirdlərə fəxri fərmanlar, təşəkkürnamələr və hədiyyələr təqdim olunub.

Bundan əlavə, Azərbaycan Dövlət İdarələri və İctimai Xidmət İşçiləri Həmkarlar İttifaqı Komitəsi tərəfindən 2025-ci ilin aprel ayında keçirilmiş “Ekologiya-mənim fırçamda” mövzusunda rəsm müsabiqəsində Yusif Sadıqov adına Bozalqanlı kənd tam orta ümumtəhsil məktəbinin 8-ci sinif şagirdi Eyvazlı Nuray Nemət qızı fəal iştirakına görə Yeni Azərbaycan Partiyası Həmkarlar İttifaqı tərəfindən diplom və hədiyyə ilə təltif edilmişdir.

Yeni Azərbaycan Partiyasının sıralarına yeni qoşulanlara üzvlük vəsiqələri təqdim olunub.

Tədbirin rəsmi hissəsi Yeni Azərbaycan Partiyası Himninin səsləndirilməsi ilə sona çatıb.

Paylaş:

Baxılıb: 593 dəfə