Milli Qurtuluş Günü xilasa aparan dönüş yolu, dövlətçilik şüurunun Zəfəridir

Bakı:

12 °C

87 %

6 m/s

Əlaqə

AZ RU EN

Ana səhifə / YAP xəbərləri / Milli Qurtuluş Günü xilasa aparan dönüş yolu, dövlətçilik şüurunun Zəfəridir

Milli Qurtuluş Günü xilasa aparan dönüş yolu, dövlətçilik şüurunun Zəfəridir

11.06.2025 [16:09]

Azərbaycan xalqının tarixində elə günlər var ki, həmin anlarda verilən qərarlar yüzilliklərin taleyini dəyişir. 15 İyun 1993-cü il – Milli Qurtuluş Günü məhz belə taleyüklü bir gündür. Bu gün, ölkəmizin uçurumun astanasından geri döndüyü, dövlətçiliyimizin süqut təhlükəsindən xilas olduğu, xalqın yenidən öz iradəsinə, inamına və gələcəyinə sahib çıxdığı gün kimi tarixə düşüb. Müstəqilliyin ilk illərində baş verən xaos, siyasi qarşıdurmalar, iqtisadi böhran və silahlı toqquşmalar, həmçinin Qarabağ cəbhəsində yaşanan məğlubiyyətlər insanlarda dərin ümidsizlik yaratmışdı. Ölkənin hər yerində anarxiya, özbaşınalıq hökm sürür, xalqın etimadı günbəgün itirilməkdə idi. Məhz belə bir ağır dövrdə Azərbaycan xalqı nicat yolunu dahi lider Heydər Əliyevin siyasi arenaya qayıdışında gördü. Bu qayıdış sadəcə bir siyasətçinin yenidən vəzifəyə gəlməsi deyildi Bu, xalqın iradəsinin təcəssümü, milli ruhun dirçəlişi idi. Ulu öndər Heydər Əliyev öz müdrikliyi, soyuqqanlılığı və dövlətçilik təcrübəsi ilə Azərbaycanı böhrandan çıxardı. O, yalnız sabitlik yaratmadı, həm də Azərbaycanın gələcəyini müəyyən edən əsas strateji istiqamətləri formalaşdırdı. Ulu öndər Heydər Əliyevin rəhbərliyi ilə ölkədə hüquqi dövlət quruculuğu prosesi başladı, Konstitusiya qəbul edildi, iqtisadi islahatlar həyata keçirildi, neft strategiyası reallaşdırıldı, xarici siyasətdə balanslı mövqe tutuldu. Bu gün Azərbaycanda gördüyümüz hər bir uğurun təməlində məhz o illərdə atılmış addımlar dayanır. Ən əsası isə, Ulu Öndər xalqda inam yaratdı. O sübut etdi ki, xalqla bir olan rəhbər, tarixin ən çətin məqamlarında belə doğru yol tapa bilər. 15 İyun tarixini dəyərli edən də məhz bu birliyin və həmrəyliyin rəmzinə çevrilməsidir. Bu gün biz müstəqil, güclü, qalib Azərbaycan dövlətində yaşayırıq. 30 ildən artıq keçən bir dövrdə dövlətimiz regionun liderinə çevrilib, hərbi və iqtisadi gücünü sübut edib. Qarabağın işğaldan azad olunması ilə tariximizdə yeni mərhələ başlanıb. Bütün bu uğurların əsasında dayanan ideoloji və siyasi xəttin başlanğıc nöqtəsi isə 15 İyun – Qurtuluş günüdür. Hesab edirəm ki, bu gün təkcə tarix kitablarında oxunacaq bir gün deyil. Bu, daim yaddaşlarda yaşamalı, yeni nəsillərə öyrədilməli, vətəndaşlıq mövqeyimizi formalaşdırmalı bir gündür. Hər birimizin borcu müstəqilliyin qədrini bilmək, onu qorumaq və gələcək nəsillərə daha güclü şəkildə ötürməkdir. Hansı formada yanaşsaq yalnız bir həqiqəti görərik: 15 İyun Azərbaycan tarixində sadəcə bir təqvim günü də deyil, bir millətin yenidən öz kimliyinə, dövlətinə və gələcəyinə sahib çıxmasının simvoludur. 1993-cü ildə baş verən hadisələr fonunda bu günün mahiyyətini dərk etmək üçün təkcə siyasi böhranı deyil, həm də ictimai ruh halını, xalqın gələcəyə dair ümidsizliyini xatırlamaq kifayətdir. Müstəqilliyin ilk illərində Azərbaycan böyük çətinliklər içində idi – dövlət institutları iflic olmuşdu, torpaqlar işğal altına düşmüşdü, vətəndaş müharibəsi təhlükəsi qapını döyürdü. Belə bir məqamda xalqın bircə ümidi vardı. Bu ümid Ulu öndər Heydər Əliyevin şəxsində reallığa çevrildi. 15 iyun 1993-cü ildə o, xalqın tələbi ilə yenidən siyasi rəhbərliyə qayıtdı və Azərbaycan tarixində “Milli Qurtuluş Günü” kimi əbədi həkk olundu. Bu dönüş sadəcə fövqəladə idarəçilik qabiliyyəti ilə dövlətin xilas edilməsi deyildi. Bu, Azərbaycan dövlətçiliyinin ideoloji və strateji əsaslarının qoyulduğu dövr idi. Ulu öndər Heydər Əliyev dövlətçiliyin dayaqlarını milli-mənəvi dəyərlər, hüquqi islahatlar və beynəlxalq etimad üzərində qurdu. Azərbaycanın müstəqil, dünyəvi, hüquqi dövlət kimi formalaşması məhz bu mərhələdən başladı. “Qurtuluş” anlayışı burada simvolik deyil – bu, real bir xalqın, real bir dövlətin uçuruma düşməkdən xilas edilməsinin tarixi hadisəsidir. Əgər 15 iyun baş verməsəydi, bu gün Azərbaycan adlı dövlətin varlığı belə sual altında ola bilərdi. Bu baxımdan, 15 İyun tariximizdəki İstiqlal Bəyannaməsi qədər önəmli, 1918-ci ilin 28 Mayı qədər müqəddəs bir gündür. Bu gün biz güclü, sabit və müasir Azərbaycan dövlətində yaşayırıqsa, bu nailiyyətlərin təməlində məhz Ulu öndər Heydər Əliyevin yaratdığı möhkəm təməllər dayanır. Cənab Prezident İlham Əliyevin rəhbərliyi ilə bu xətt uğurla davam etdirilir və dövlətçilik tariximizə yeni-yeni qələbə səhifələri yazılır. 15 İyunun dərsi odur ki, xalqın iradəsi, müdrik liderliyin gücü və dövlətə inam bir araya gəldikdə, hətta ən çətin məqamlar da qurtuluşa çevrilə bilər. Biz bu dərsi heç vaxt unutmamalıyıq. Prezident İlham Əliyevin Ulu Öndərin siyasi kursunu uğurla davam etdirməsi və zənginləşdirməsi sayəsində Azərbaycan dünyanın dinamik inkişaf edən, modernləşən, beynəlxalq miqyasda nüfuzu gündən-günə artan dövlətinə çevrilib. Ümummilli Liderin layiqli davamçısı olan cənab Prezident İlham Əliyevin rəhbərliyi ilə həyata keçirilən siyasət nəticəsində ölkəmiz yeni nailiyyətlər qazanaraq güclü və nüfuzlu dövlətlər sırasında öz mövqeyini daha da möhkəmləndirib. Cənab Prezident İlham Əliyevin həyata keçirdiyi siyasət Azərbaycanın güclü, bütün məsələlərlə bağlı öz prinsipial mövqeyi olan, müstəqil siyasi iradə nümayiş etdirən ölkə kimi tanınmasını şərtləndirib. Bu gün bizim vəzifəmiz bu tarixi yaddaşın daşıyıcıları olmaq, müstəqilliyin dəyərini dərk etmək və onu gələcək nəsillərə ötürməkdir.

Rüstəm Nağıyev,

YAP Gədəbəy rayon təşkilatının sədri

Paylaş:

Baxılıb: 287 dəfə