Tarixi torpaqlarda yeni səhifə açılır

Bakı:

26 °C

58 %

5 m/s

Əlaqə

AZ RU EN

Ana səhifə / YAP xəbərləri / Tarixi torpaqlarda yeni səhifə açılır

Tarixi torpaqlarda yeni səhifə açılır

26.08.2025 [08:48]

Uzun illər işğal altında qalmış torpaqlarımız indi yeni bir dirçəliş dövrünü yaşayır. Azərbaycan Respublikasının Prezidenti, Müzəffər Ali Baş Komandan İlham Əliyevin 2025-ci il avqustun 21-də Kəlbəcərə səfəri də bu dirçəlişin dövlət səviyyəsində nə qədər əhatəli və planlı şəkildə həyata keçirildiyini göstərdi.

Həsrətlə gözlənilən dönüş artıq reallığa çevrilib. Kəlbəcər torpağında həyat yenidən canlanır, illərdir susmuş dağlar, dərələr indi insan səsi ilə dolur. Bu dönüş sadəcə fiziki qayıdış deyil, həm də milli ruhun dirçəlişidir. Prezident İlham Əliyevin rəhbərliyi ilə həyata keçirilən “Böyük Qayıdış” proqramı çərçivəsində ilk yaşayış kompleksinin istifadəyə verilməsi bu prosesin rəmzi başlanğıcı oldu.

Kəlbəcərdə inşa edilən müasir yaşayış binaları, çəkilən yollar, qurulan enerji və su şəbəkələri, təhsil və səhiyyə obyektləri bölgənin tamamilə yenidən qurulduğunu göstərir. Dövlət başçısının son səfəri zamanı təqdim edilən mənzillər, açılan arıçılıq mağazası və salınan şəhər parkı sosial həyatın canlanmasına xidmət edir. Bu, sadəcə binaların tikintisi deyil, həm də bir cəmiyyətin yenidən formalaşmasıdır.

1993-cü ildə Kəlbəcərin işğalı Azərbaycan üçün həm mənəvi, həm də coğrafi baxımdan ağır zərbə olmuşdu. Lakin 2020-ci ildə baş vermiş Vətən müharibəsi bu tarixi ədalətsizliyə son qoydu. Azərbaycan Ordusunun rəşadəti və xalqın birliyi nəticəsində Kəlbəcər bir güllə atılmadan geri qaytarıldı. 44 günlük Vətən müharibəsi xalqımızın və dövlətimizin gücünü bütün dünyaya nümayiş etdirdi. Azərbaycan Ordusu hər gün irəliləyir, xalq isə əsgərləri ilə bir nəfər kimi həmrəy dayanırdı. Ermənistan isə müqavimət gücünü itirdi və nəhayət, kapitulyasiya aktını imzalamağa məcbur oldu.

Kəlbəcərin döyüşsüz azad olunması Prezident İlham Əliyevin apardığı uğurlu diplomatik siyasətin nəticəsidir. Bu, həm də Azərbaycanın beynəlxalq arenada artan nüfuzunun göstəricisidir. Müharibə dövründə və sonrasında ölkəmizin qarşısına çıxarılan maneələrə baxmayaraq, xalq və dövlət birgə iradə nümayiş etdirərək öz torpaqlarını geri aldı.

Azərbaycan bu gün regionda sabitliyin əsas dayağına çevrilib. Ermənistanla imzalanmış sülh sazişi yeni reallıqları təsdiqləyir. Dünya ictimaiyyəti artıq Azərbaycanın mövqeyini qəbul edir. Prezidentin vurğuladığı kimi, “dəmir yumruq” yerindədir, amma məqsəd sülh və rifahdır. Bu siyasət həm güc, həm də ləyaqət üzərində qurulub.

İşğal dövründə Kəlbəcərdə dağıdılmış kəndlər, yandırılmış meşələr, talan edilmiş mədəniyyət abidələri bu gün yenidən dirçəlir. Prezident Kəlbəcərin yaxın gələcəkdə Azərbaycanın turizm, kənd təsərrüfatı və enerji mərkəzlərindən birinə çevriləcəyini xüsusi qeyd etdi. Bu, sadəcə tikinti-quruculuq deyil, əslində Böyük Qayıdış proqramının reallığa çevrilməsi, doğma yurdlarından didərgin düşmüş insanların yeni həyatına verilmiş vəsiqədir. Prezidentin səfəri zamanı verdiyi mesajlar bir daha göstərdi ki, Azərbaycanın azad edilmiş hər qarış torpağına həyat geri dönəcək. Bu torpaqlara qayıdan hər bir insan təkcə evinə deyil, həm də gələcəyinə qayıdır. Kəlbəcərin turizm, kənd təsərrüfatı və enerji mərkəzinə çevrilməsi artıq uzaq perspektiv deyil, reallaşmaqda olan bir həqiqətdir.

Azərbaycan xalqı düşməndən intiqamı döyüş meydanında aldı, lakin onların etdiklərini təkrarlamadı. Bu, dövlətimizin humanist və ləyaqətli siyasətinin bariz nümunəsidir. Prezident İlham Əliyevin Kəlbəcərdəki çıxışında vurğuladığı kimi, biz dağıtmadıq, biz yaratdıq. Bu yanaşma Azərbaycanın müasir dövlətçilik modelinin əsasını təşkil edir.

Kəlbəcərdə görülən işlər təkcə bir rayonun deyil, bütöv Azərbaycanın inkişaf strategiyasının tərkib hissəsidir. Güclü ordu, dayanıqlı iqtisadiyyat, sosial rifah və milli birlik bu konsepsiyanın əsas sütunlarıdır. Kəlbəcər bu gün həm Qələbənin, həm də quruculuğun simvoluna çevrilib. Azərbaycan isə qalib xalq və qalib dövlət olaraq yoluna əmin addımlarla davam edir.

Tutu Kamal qızı

YAP Zəngilan rayon təşkilatının sədr müavini

Paylaş:

Baxılıb: 359 dəfə