Azərbaycanın strateji diplomatiyası

Bakı:

24 °C

54 %

6 m/s

Əlaqə

AZ RU EN

Ana səhifə / YAP xəbərləri / Azərbaycanın strateji diplomatiyası

Azərbaycanın strateji diplomatiyası

28.08.2025 [18:24]

Azərbaycan Respublikasının Prezidenti cənab İlham
Əliyevin Əl-Ərəbiyyə televiziya kanalına verdiyi müsahibə regional və qlobal siyasət baxımından mühüm siyasi sənəd xarakteri daşıyır. Dövlət başçısının açıqlamaları həm Cənubi Qafqazda formalaşmış yeni reallıqları, həm də Azərbaycanın beynəlxalq münasibətlər sistemindəki mövqeyini əks etdirdi. Bu müsahibə bir daha təsdiqlədi ki, Azərbaycan müstəqil diplomatiyası və ardıcıl siyasi kursu ilə regionun strateji istiqamətlərini müəyyənləşdirən əsas aktora çevrilmişdir. Ən əsası müsahibədə avqustun 8-də Donald Trampın vasitəçilik səyləri ilə Ermənistan və Azərbaycan arasında imzalanmış tarixi razılaşmaya xüsusi diqqət yetirilmişdir. Cənab Prezident bildirmişdir ki, “Azərbaycan və Ermənistanın Ağ Evdə Prezident Trampın iştirakı ilə bu sənədi paraflaması müharibənin başa çatdığını göstərir. Bu, mərhələlərlə 30 ildən artıq davam edən müharibənin sonudur və həm Cənubi Qafqaz regionu, həm də daha geniş mənada Mərkəzi Asiya və Yaxın Şərq üçün tamamilə yeni imkanlar açır. Prezident İlham Əliyev müsahibədə açıq şəkildə bəyan etdi ki, Qarabağ münaqişəsi artıq tarixə qovuşmuş, Azərbaycan öz ərazi bütövlüyünü və suverenliyini tam şəkildə bərpa etmişdir. Bu, yalnız hərbi qələbə deyil, həm də diplomatik qələbədir. Çünki ölkəmiz beynəlxalq hüquqa əsaslanan mövqeyini həm siyasi, həm də praktiki planda təsdiq etdi. Bu mərhələdən sonra Azərbaycanın əsas hədəfi bölgədə davamlı sülhün təmin olunmasıdır. Cənab Prezidentin vurğuladığı kimi, sülh müqaviləsinin imzalanması təkcə iki dövlətin münasibətlərini normallaşdırmaq deyil, bütövlükdə Cənubi Qafqazda sabitliyin möhkəmlənməsi deməkdir.

Müsahibənin ən mühüm məqamlarından biri Prezident İlham Əliyevin Zəngəzur dəhlizi ilə bağlı açıqlamaları idi. Dövlət başçısı qeyd etdi ki, bu layihə yalnız Azərbaycan üçün deyil, region ölkələri və Avrasiya məkanının iqtisadi-siyasi xəritəsi üçün strateji əhəmiyyət kəsb edir. Zəngəzur dəhlizi Türk dünyasının birləşdirici xətti kimi çıxış etməklə yanaşı, beynəlxalq nəqliyyat və logistika sistemində də mühüm rol oynayacaq. Azərbaycan artıq Şərq-Qərb və Şimal-Cənub nəqliyyat dəhlizlərinin ayrılmaz parçasıdır. Bu isə ölkəmizin geoiqtisadi mövqelərinin daha da güclənməsinə gətirib çıxarır. Prezident İlham Əliyevin sözlərindən aydın olur ki, Bakı bu layihəyə sadəcə regional iqtisadi təşəbbüs kimi yox, həm də geosiyasi sabitlik və əməkdaşlıq faktoru kimi yanaşır. Müsahibədə ön plana çıxan digər vacib məqam Azərbaycanın balanslaşdırılmış xarici siyasət kursunun bir daha nümayiş etdirilməsidir. Prezident İlham Əliyev vurğuladı ki, Azərbaycan həm İslam aləmi, həm Qərb, həm də qonşu dövlətlərlə münasibətlərdə bərabərlik və qarşılıqlı hörmət prinsipini əsas götürür. Azərbaycan bu gün enerji, nəqliyyat və təhlükəsizlik məsələlərində qlobal əməkdaşlığın etibarlı tərəfdaşına çevrilmişdir. Dövlət başçısının bəyanatları göstərdi ki, ölkəmizin diplomatiyası yalnız ikitərəfli əlaqələrə deyil, çoxtərəfli platformalara da önəm verir. Bu siyasət Azərbaycanı beynəlxalq münasibətlərdə etibarlı və sabit tərəfdaş kimi tanıdır.

Əl-Ərəbiyyə müsahibəsi həm də Azərbaycanın Yaxın Şərq ölkələri ilə əlaqələrinin yeni mərhələyə qədəm qoyduğunu göstərdi. Prezident İlham Əliyev açıq şəkildə vurğuladı ki, Azərbaycan müsəlman dünyasının bir hissəsi kimi İslam həmrəyliyinə xüsusi önəm verir və bu istiqamətdə hər zaman aktiv mövqedə olub. Bununla yanaşı, Bakı beynəlxalq təşkilatlarla əməkdaşlıqda konstruktiv mövqe tutur. Azərbaycanın Qoşulmama Hərəkatına sədrlik dövründə göstərdiyi fəaliyyət, həmçinin qlobal təhlükəsizlik və əməkdaşlıq məsələlərinə verdiyi töhfələr müsahibədə də əks olundu. Prezident İlham Əliyevin açıqlamaları ilə beynəlxalq ictimaiyyətə bir sıra strateji mesajlar ünvanlandı. Azərbaycan postmünaqişə dövründə regional sabitliyin əsas təminatçısıdır, sülh gündəliyi alternativsizdir və Ermənistan üçün də yeni imkanlar açır, Zəngəzur dəhlizi regional əməkdaşlığın mühüm sütununa çevriləcək və Azərbaycanın diplomatiyası balans, çoxtərəfli əməkdaşlıq və milli maraqlar üzərində qurulub. Bu mesajlar bir daha göstərdi ki, Azərbaycanın mövqeyi həm region daxilində, həm də beynəlxalq münasibətlər sistemində real güc amilinə çevrilib.

Prezident İlham Əliyevin Əl-Ərəbiyyə televiziyasına müsahibəsi Azərbaycanın diplomatik mövqeyinin strateji çərçivəsini müəyyənləşdirən mühüm siyasi bəyanat oldu. Dövlət başçısının açıqlamaları təsdiqlədi ki, Azərbaycan bu gün Cənubi Qafqazın siyasi gündəliyini müəyyənləşdirən aparıcı qüvvədir və regional inteqrasiyanın əsas lokomotividir. Müsahibə həm də Azərbaycanın beynəlxalq ictimaiyyətə ünvanladığı açıq mesajdır: Azərbaycan müstəqil siyasəti, güclü diplomatiyası və strateji baxışları ilə sabitliyin, əməkdaşlığın və inkişafın təminatçısıdır.

David İbramxəlilov
YAP Qusar rayon təşkilatının sədri

Paylaş:

Baxılıb: 453 dəfə