20 Sentyabr – Azərbaycan Dövlət Suverenliyinin Təntənəsi

Bakı:

15°C

82%

5m/s

Əlaqə

AZ RU EN

Ana səhifə / YAP xəbərləri / 20 Sentyabr – Azərbaycan Dövlət Suverenliyinin Təntənəsi

20 Sentyabr – Azərbaycan Dövlət Suverenliyinin Təntənəsi

20.09.2025 [12:51]

Azərbaycan xalqının tarixi taleyüklü anlarla zəngindir. Bu yolun ən şərəfli məqamlarından biri isə şübhəsiz ki, dövlət suverenliyinin bərpasıdır. Bu gün – 20 sentyabr Azərbaycan Respublikasında Dövlət Suverenliyi Günü kimi qeyd olunur. Prezident İlham Əliyev cənablarının 2024-cü il 19 sentyabr tarixli Sərəncamı ilə təsis edilən bu bayram xalqımızın qəhrəmanlıq salnaməsinin, dövlət müstəqilliyimizin və milli iradəmizin rəmzinə çevrilmişdir.

Tarixi yaddaşımızın parlaq səhifələri

Azərbaycan xalqı əsrlər boyu azadlıq və müstəqillik uğrunda mübarizə aparmışdır. XX əsrin sonlarında Ermənistanın işğalçılıq siyasəti nəticəsində torpaqlarımızın 20 faizi zəbt edilmiş, yüz minlərlə soydaşımız doğma yurdlarından qovulmuş, Xocalı soyqırımı kimi dəhşətli cinayətlər törədilmişdi.

Lakin xalqımız heç vaxt bu işğalla barışmadı. 2020-ci il sentyabrın 27-də başlayan və 44 gün davam edən Vətən müharibəsi tarixi ədaləti bərpa etdi. Prezident, Müzəffər Ali Baş Komandan İlham Əliyevin qətiyyətli liderliyi ilə Azərbaycan Ordusu torpaqlarımızı azad etdi, dövlətimizin ərazi bütövlüyünü bərpa etdi. 2023-cü ilin sentyabrında Qarabağda həyata keçirilmiş antiterror əməliyyatı isə suverenliyimizin tam təmin olunması ilə nəticələndi.

Bu gün Azərbaycan bayrağı Xankəndidə, Xocalıda, Xocavənddə, Ağdərədə və digər azad edilmiş şəhər və kəndlərimizdə qürurla dalğalanır. Bu, şəhidlərimizin qanı, qazilərimizin fədakarlığı, xalqımızın iradəsi sayəsində mümkün olmuşdur.

Konstitusiya və Suverenlik İli

2025-ci ilin ölkəmizdə “Konstitusiya və Suverenlik İli” elan edilməsi də bu istiqamətdə mühüm siyasi qərardır. Bu təşəbbüs Konstitusiyamızın qəbulunun 30 illiyinə, dövlət müstəqilliyimizin bərpasının 34-cü ildönümünə və Böyük Zəfərimizin 5 illiyinə həsr olunmuşdur.

1995-ci il noyabrın 12-də qəbul edilən Azərbaycan Respublikasının Konstitusiyası demokratik, hüquqi və dünyəvi dövlət quruculuğumuzun əsasını qoymuşdur. Ulu Öndər Heydər Əliyevin rəhbərliyi ilə hazırlanmış bu ali sənəd xalqın iradəsini, dövlətin əsas prinsiplərini və insan hüquqlarının təminatını özündə əks etdirir.

Diplomatik uğurlar və beynəlxalq mövqeyimiz

Azərbaycanın suverenliyinin möhkəmləndirilməsi təkcə hərbi qələbələrlə deyil, həm də diplomatik uğurlarla müşayiət olunur. 2025-ci ilin avqustunda imzalanmış Vaşinqton Bəyannaməsi və ABŞ Konqresinin Azərbaycana qarşı ədalətsiz məhdudiyyətlər qoyan 907-ci düzəlişinin ləğvi ölkəmizin beynəlxalq aləmdə nüfuzunun artmasının bariz göstəricisidir. Bu hadisələr Prezident İlham Əliyevin prinsipial və müstəqil siyasətinin təsdiqidir.

Qarabağın dirçəlişi və milli birliyin möhkəmlənməsi

Azərbaycanın Birinci vitse-prezidenti, Heydər Əliyev Fondunun prezidenti Mehriban xanım Əliyevanın rəhbərliyi ilə həyata keçirilən layihələr Qarabağın fiziki bərpası ilə yanaşı, mədəni həyatının dirçəlməsinə də xidmət edir. Bu proses yalnız regionumuzun deyil, bütün ölkəmizin milli birliyini, mənəvi gücünü və gələcək inkişafını təmin edir.

Suverenliyin qorunması – ümummilli vəzifə

Yeni Azərbaycan Partiyası da daxil olmaqla, bütün siyasi qüvvələrin və vətəndaş cəmiyyətinin vəzifəsi dövlətimizin suverenliyini möhkəmləndirmək, gənc nəslə müstəqilliyin əsl dəyərini aşılamaqdır. Prezident İlham Əliyevin sözləri ilə desək:
“Müstəqillik bizim ən böyük sərvətimizdir!”