Şəmkirdə 27 sentyabr - Anım Günündə qürür mənbəyimiz olan şəhidlərimizin əziz xatirəsi anıldı

Bakı:

17 °C

67 %

8 m/s

AZ RU EN

Ana səhifə / YAP xəbərləri / Şəmkirdə 27 sentyabr - Anım Günündə qürür mənbəyimiz olan şəhidlərimizin əziz xatirəsi anıldı

Şəmkirdə 27 sentyabr - Anım Günündə qürür mənbəyimiz olan şəhidlərimizin əziz xatirəsi anıldı

27.09.2025 [21:22]

Şəmkir Rayon İcra Hakimiyyətinin və Yeni Azərbaycan Partiyası Şəmkir rayon təşkilatının birgə təşkilatçılığı ilə 44 günlük Vətən müharibəsində torpaqlarımızın azadlığı uğrunda canlarını fəda etmiş əsgər və zabitlərimizə, bütün şəhidlərimizə dərin ehtiram əlaməti olaraq 27 sentyabr - Anım Günü tədbiri keçirildi.

Tədbirdə Şəmkir Rayon İcra Hakimiyyəti başçısı Rəşad Tağıyev, Yeni Azərbaycan Partiyası Şəmkir rayon təşkilatının sədri Fəxrəddin Vəliyev, rayonun hüquq-mühafizə orqanlarının, idarə, müəssisə və təşkilat rəhbərləri, İcra Hakimiyyətinin və YAP Şəmkir Rayon Təşkilatının məsul əməkdaşları, şəhid ailələri, qazilər, müharibə veteranları, rayon ictimaiyyətinin nümayəndələri iştirak etdilər.

Tədbir iştirakçıları əvvəlcə 50 metr uzunluğunda Şanlı Azərbaycan bayrağını rayon mərkəzindən Şəhidlər Xiyabanına gətirib, Azərbaycanın ərazi bütövlüyü uğrunda canlarından keçən əsgər və zabitlərimizin xatirəsinə ucaldılmış Abidə Kompleksinin önünə əklil qoydular.

Anım tədbirində çıxış edən Şəmkir Rayon İcra Hakimiyyətinin başçısı Rəşad Tağıyev bildirdi ki, Ermənistan Azərbaycana qarşı uzun illər ərzində düşmənçilik siyasəti aparırdı. Tarixi Azərbaycan torpağı olan Qarabağa ermənilərin çar Rusiyası zamanı köçürüldüyü dövrdən etibarən xalqımıza qarşı başlamış düşmənçilik siyasəti 200 ildən çox davam edirdi. Ermənilər Azərbaycan ərazisində məskunlaşdıqları dövrdən etibarən xalqımızın toponimlərini dəyişməyə başlamış, münbit əraziləri ələ keçirməyə çalışmış və əksəriyyət təşkil etdikləri yaşayış məntəqələrində azərbaycanlıları sıxışdırmışlar

Ermənistan hakimiyyətinin “ikili standartlar” siyasətindən, müharibəyə təhrik edən amillərdən danışan icra başçısı qeyd etdi ki, 30 il ərzində Ermənistan işğalçı siyasətini davam etdirmiş, ərazilərimizdə təxribatlar törətmiş, təmas xətti boyunca yaşayan dinc əhalimizə mütəmadi atəş açmış, onların rahat yaşamasına imkan verməmişdir.

Rəşad Tağıyev çıxışında Ali Baş Komandan cənab İlham Əliyevin rəhbərliyilə 44 günlük Vətən müharibəsində aparılan uğurlu əməliyyatlardan, qazanılan Şanlı qələbədən danışaraq bildirdi ki, ölkəmizin ərazi bütövlüyü yolunda canlarından keçən əsgər və zabitlərimizə dərin ehtiram əlaməti olaraq İkinci Qarabağ savaşının başlandığı günün - sentyabrın 27-nin Prezident, Müzəffər Ali Baş Komandan İlham Əliyevin müvafiq Sərəncamı ilə ölkəmizdə hər il şəhidlərin əziz xatirəsinin Anım Günü kimi qeyd olunması təsadüfi deyil. Çünki 44 günlük İkinci Qarabağ müharibəsi Azərbaycanın qətiyyətli mövqeyinin, xalqımızın məğrurluğunun, yenilməzliyinin, torpağa bağlılığının, Vətən sevgisinin təqdimatı oldu.

Rəşad Tağıyev çıxışının sonunda vurğuladı ki, Vətən müharibəsi bizim şanlı tariximizdir. Respublikamızın suverenliyi və ərazi bütövlüyü uğrunda gedən mübarizədə xalqımız əzm və iradə, bir yumruq kimi birlik və həmrəylik nümayiş etdirərək, düşmənə sarsıdıcı zərbələr endirdi. Azərbaycan Ordusu şəhidlərin qanını aldı. Biz şəhidlərin qisasını döyüş meydanında aldıq. Bu Qələbəni bizə bəxş edən qəhrəman əsgər və zabitlərimiz bizim qürur mənbəyimizdir. Onların qəhrəmanlığı, onların şücaəti, fədakarlığı artıq dastana çevrilib. Biz bundan sonra Ali Baş Komandanın rəhbərliyi ilə qalib ölkə, müzəffər xalq kimi yaşayacağıq və azad edilmiş torpaqları quracağıq, bərpa edəcəyik.

Şəhid ailələri isə çıxışlarında qəhrəman övladlarının döyüş yolundan danışıb, onlarla qürur duyduqlarını bildirdilər.

Daha sonra mədəniyyət işçilərinin, məktəblilərin təqdimatında şəhidlərin xatirəsinə həsr edilmiş əbədi-bədii kompozisiyalar təqdim olundu.

Saat 12:00-da isə rayon ərazisində nəqliyyatın və piyadaların hərəkəti dayandırılıb, avtomobillərdən səs siqnalları verildi. İnsanlar şəhid əsgər və zabitlərimizin ruhları qarşısında baş əyib, onların xatirəsinə dərin ehtiramlarını bir dəqiqəlik sükutla ifadə etdilər.

Paylaş:

Baxılıb: 329 dəfə