Tarixi Zəfərin Başlanğıcı

Bakı:

10 °C

93 %

3 m/s

Əlaqə

AZ RU EN

Ana səhifə / YAP xəbərləri / Tarixi Zəfərin Başlanğıcı

Tarixi Zəfərin Başlanğıcı

01.10.2025 [19:10]

1993-cü il oktyabrın 3-ü Azərbaycan xalqının taleyində dönüş nöqtəsi oldu. Məhz bu gün, ümummilli lider Heydər Əliyev xalqın böyük etimadını qazanaraq Azərbaycan Respublikasının Prezidenti seçildi. Bu mühüm hadisə Azərbaycanın müstəqilliyini və dövlətçiliyini qorumaq üçün əvəzolunmaz bir addım oldu.

1990-cı illərin əvvəllərində Azərbaycan çox çətin, gərgin və qeyri-sabit bir dövr yaşayırdı. Ölkədə siyasi hakimiyyət uğrunda mübarizələr, iqtisadi tənəzzül və Dağlıq Qarabağda davam edən müharibə vəziyyəti xalqın gələcəyə olan inamını sarsıtmışdı. Belə bir zamanda xalqın ümid yeri, dövlətçilik ənənələrinin daşıyıcısı və təcrübəli siyasətçi kimi Heydər Əliyevin hakimiyyətə qayıdışı zəruri idi.

1993-cü ilin iyun ayında xalqın tələbi ilə Ulu öndər Heydər Əliyev hakimiyyətə qayıtdı və iyunun 15-də Milli Məclisin qərarı ilə Azərbaycan Respublikası Ali Sovetinin sədri seçildi. Bu tarixi gün bu gün də Milli Qurtuluş Günü kimi qeyd olunur. Ancaq ölkədəki vəziyyətin tam sabitləşməsi üçün xalqın dəstəyi ilə Heydər Əliyevin prezident seçilməsi vacib idi.

3 oktyabr 1993-cü ildə keçirilmiş prezident seçkilərində Heydər Əliyev səsvermədə iştirak edən vətəndaşların böyük əksəriyyətinin dəstəyi ilə Azərbaycan Respublikasının Prezidenti seçildi. Bu, xalqın öz liderinə olan etibarının və inamının təzahürü idi. Seçkidən sonra Heydər Əliyev Azərbaycanı xaosdan çıxararaq sabitliyə, inkişaf yoluna çıxarmağa başladı.

Onun rəhbərliyi ilə ölkədə hüquqi dövlət quruculuğu prosesi sürətləndi, iqtisadi islahatlar həyata keçirildi, beynəlxalq əlaqələr genişləndi. 1994-cü ilin sentyabrında "Əsrin müqaviləsi"nin imzalanması Azərbaycanın enerji siyasətində yeni bir dövr açdı və ölkənin beynəlxalq nüfuzunu artırdı. 1995-ci ildə qəbul olunmuş Konstitusiya və növbəti illərdə keçirilən demokratik seçkilər Heydər Əliyevin siyasi uzaqgörənliyinin göstəricisi idi.

Ulu Öndərin prezident seçilməsi təkcə bir siyasi uğur deyildi – bu, Azərbaycanın varlığı, sabitliyi və gələcəyi üçün strateji əhəmiyyətə malik olan tarixi bir addım idi. Heydər Əliyevin ölkəyə rəhbərliyi dövründə atılan əsaslı addımlar bu gün də Azərbaycan Respublikasının uğurlarının təməlində dayanır.

3 oktyabr 1993-cü il – Azərbaycan tarixində dönüş nöqtəsi, xilaskarlıq və sabitliyin başlanğıcı kimi yadda qaldı. Ulu Öndər Heydər Əliyevin Prezident seçilməsi Azərbaycan xalqının qurtuluşu, dövlətçiliyimizin möhkəmlənməsi və gələcəyə inamın bərqərar olmasının simvoludur.

Bu gün onun təməlini qoyduğu müstəqil, hüquqi və güclü dövlət ideyası Prezident, Müzəffər Ali Baş Komandan İlham Əliyevin rəhbərliyi ilə uğurla davam etdirilir. Məhz onun qətiyyətli və uzaqgörən siyasəti nəticəsində Azərbaycan 30 illik həsrətə son qoyaraq, tarixi ədaləti və ərazi bütövlüyünü bərpa etmişdir. 2020-ci ildə 44 günlük Vətən müharibəsində qazanılan Zəfər Ulu Öndərin "Güclü Azərbaycan dövləti" ideyasının parlaq təntənəsidir.

Bu gün Azərbaycan regionun ən güclü dövlətlərindən birinə çevrilmiş, siyasi, iqtisadi və hərbi sahədə böyük nailiyyətlər əldə etmişdir. Ordumuz qüdrətli, xalqımız bir yumruq kimi birləşmiş, dövlətimiz sabit və möhkəm təməllər üzərində inkişaf edir. Ulu Öndər Heydər Əliyevin görmək istədiyi Azərbaycan bu gün reallığa çevrilmişdir - güclü, qalib, suveren və firavan bir Vətən!

Sahib Şükürov,

YAP Göyçay rayon təşkilatının sədri

Paylaş:

Baxılıb: 479 dəfə