Heydər Əliyev fenomeni: xalqa sədaqət və effektiv idarəçilik modeli

Bakı:

18°C

72%

5m/s

Əlaqə

AZ RU EN

Ana səhifə / YAP xəbərləri / Heydər Əliyev fenomeni: xalqa sədaqət və effektiv idarəçilik modeli

Heydər Əliyev fenomeni: xalqa sədaqət və effektiv idarəçilik modeli

06.10.2025 [14:21]

Elşən Alıyev,

YAP Daşkəsən rayon təşkilatının sədr müavini

Ulu Öndər Heydər Əliyev ölkənin müstəqilliyini qorumaq və güclü dövlət quruculuğunu təmin etmək üçün xilaskarlıq missiyasını həyata keçirmişdir. Onun rəhbərliyi dövründə siyasi sabitlik bərqərar olmuş, iqtisadi və sosial sahələrdə islahatlar aparılmış, milli həmrəylik gücləndirilmişdir. Eyni zamanda, Heydər Əliyev siyasəti Azərbaycanın beynəlxalq nüfuzunun yüksəlməsinə, strateji layihələrin reallaşmasına və ordu quruculuğuna təkan vermişdir. Bu siyasət ölkəmizin dünya miqyasında qüdrətli dövlət kimi tanınmasını təmin etmişdir.

1991–1993-cü illər Azərbaycanda həm siyasi, həm də iqtisadi baxımdan mürəkkəb dövr idi. Ölkədə siyasi xaos hökm sürürdü, dövlət idarəçiliyi səriştəsiz şəxslərin əlində idi. Regionlarda separatçı meyillər güclənmiş, xalq sosial problemlər və təhlükəsizlik təhdidləri ilə üzləşmişdi. İnflyasiya yüksək səviyyəyə çatmış, əməkhaqqı və pensiyalar ödənilmirdi. Xocalı qətliamı xalqın yaddaşına dərin izlər buraxmış, torpaqlarımızın işğalı milli həmrəyliyi zəiflətmişdi. Bu mürəkkəb dövrdə xalq yalnız güclü və uzaqgörən liderin simasında çıxış yolunu görürdü. Dövlətin gələcəyi üçün strateji qərarlar qəbul edə biləcək müdrik rəhbərin mövcudluğu həyati əhəmiyyət kəsb edirdi.

1993-cü ildən etibarən Ümummilli Lider Heydər Əliyev Azərbaycan xalqının xilaskarlıq missiyasını üzərinə götürdü. Onun məqsədi həm siyasi sabitliyi təmin etmək, həm də ölkənin iqtisadi tərəqqi yoluna çıxarılması, hüquqi dövlət prinsiplərinin tətbiq olunması və milli həmrəyliyin möhkəmləndirilməsi idi. Ulu Öndər, həmçinin beynəlxalq əlaqələrin qurulması və ölkəmizin dünya birliyinə inteqrasiyası istiqamətində strateji addımlar atdı. Onun uzaqgörən siyasəti sayəsində Azərbaycan dövləti həm ölkə daxilində, həm də beynəlxalq müstəvidə mövqeyini gücləndirdi. Bu dövrdə Ümummilli Liderin həyata keçirdiyi tədbirlər, xüsusilə ictimai-siyasi sabitliyin bərqərar olunması, qeyri-qanuni silahlı dəstələrin zərərsizləşdirilməsi və ölkədə ordunun qurulması gələcəkdə tarixi Zəfərin təməlini qoydu.

1993-cü il oktyabrın 3-də Azərbaycan xalqı böyük səs çoxluğu ilə Heydər Əliyevi Prezident seçdi. Bu tarixi seçim ölkənin gələcək taleyini müəyyən edən dönüş nöqtəsidir. Ümummilli Lider ölkədə davamlı sabitliyi bərqərar etdi, iqtisadi və sosial inkişafı sürətləndirdi və xalqın rifah səviyyəsini əhəmiyyətli dərəcədə artırdı. Həmin dövrdə Heydər Əliyevin qəbul etdiyi qərarlar, xüsusilə dövlət qurumlarının formalaşdırılması, qanunun aliliyinin təmin olunması və hüquqi dövlət quruculuğu, ölkəmizin suverenliyinin qorunması və xalqın gələcək rifahının təmin olunmasında həlledici rol oynadı.

Ulu Öndər Heydər Əliyevin rəhbərliyi ilə ölkədə hüquqi dövlətçilik prinsipləri tətbiq olunmağa başladı. Məhkəmə sistemi təkmilləşdirildi, Konstitusiya Məhkəməsi, Ombudsman təsisatı və digər mühüm qurumlar yaradıldı. Bu proseslərin nəticəsi olaraq cinayətkarlıq və hüquq pozuntularına qarşı barışmaz mübarizə aparıldı, korrupsiya və narkotik vasitələrin qanunsuz dövriyyəsinə qarşı effektiv tədbirlər görüldü.

Heydər Əliyevin iqtisadi siyasəti Azərbaycanın dünya enerji bazarında mühüm aktora çevrilməsini təmin etdi. 1994-cü il sentyabrın 20-də imzalanan “Əsrin müqaviləsi” Azərbaycanın enerji potensialını dünya bazarına çıxardı və xarici investisiyaların cəlb olunmasına şərait yaratdı. Həmçinin, Ulu Öndərin iqtisadi strategiyası, sahibkarlığın inkişafı, liberallaşma siyasəti və sosialyönümlü iqtisadiyyat modeli ilə ölkədə dayanıqlı iqtisadi inkişafın təməlini qoydu. Bu siyasət, həmçinin gələcəkdə strateji enerji layihələrinin – Bakı-Tbilisi-Ceyhan neft kəməri və Bakı-Tbilisi-Ərzurum qaz kəmərinin həyata keçirilməsinə zəmin yaratdı.

Ümummilli Lider Heydər Əliyev Azərbaycanın beynəlxalq arenada mövqeyini gücləndirdi. Dövlətimizin dünya birliyinə inteqrasiya etdi, beynəlxalq təşkilatlarla əməkdaşlıq inkişaf etdirildi, ölkənin ərazi bütövlüyü və milli maraqları beynəlxalq hüquq çərçivəsində müdafiə olundu. Ulu Öndər Azərbaycanın haqq səsinin dünya ictimaiyyətinə çatdırılması ardıcıl və sistemli diplomatik fəaliyyət həyata keçirdi.

Heydər Əliyev yolunu Prezident İlham Əliyev uğurla davam etdirir. Dövlət suverenliyinin bərpası, ərazi bütövlüyünün qorunması və tarixi Zəfərə gedən yol nəticəsində Azərbaycan bu gün dünya miqyasında nüfuzlu və qüdrətli dövlət kimi tanınır. Prezident İlham Əliyevin həyata keçirdiyi iqtisadi və diplomatik layihələr, ordunun gücləndirilməsi və beynəlxalq əlaqələrin genişləndirilməsi Heydər Əliyev siyasətinin uğurlu davamıdır.

Ümummilli Lider Heydər Əliyevin xilaskarlıq missiyası və Prezident İlham Əliyevin davamlı siyasəti sayəsində Azərbaycan həm daxili sabitliyə, həm iqtisadi tərəqqiyə, həm də beynəlxalq nüfuza malik qüdrətli bir dövlətə çevrilib. Heydər Əliyev yolu Azərbaycanın inkişafında əbədi təməl rolunu oynayır, müstəqil dövlətimizin gələcək uğurlarına zəmin yaradır və xalqın milli həmrəyliyini təmin edir.

Paylaş:

Baxılıb: 293 dəfə