Milli birliyin rəmzi

Bakı:

30 °C

35 %

5 m/s

Əlaqə

AZ RU EN

Ana səhifə / YAP xəbərləri / Milli birliyin rəmzi

Milli birliyin rəmzi

07.11.2025 [16:32]

Azərbaycan xalqı üçün müqəddəs və qürurverici tarixlərdən biri olan 8 noyabr – Şuşa şəhəri günü hər il böyük sevinc və qürur hissi ilə qeyd olunur. Bu gün təkcə bir şəhərin azadlığı deyil, bütöv Azərbaycanın Zəfər salnaməsinin rəmzidir. 2020-ci ilin 8 noyabrında Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusu Şuşanı işğaldan azad etməklə Vətən müharibəsinin taleyini həll etdi və tarixi ədaləti bərpa etdi.

Prezident İlham Əliyevin 2022-ci ildə imzaladığı sərəncama əsasən 8 noyabr “Şuşa şəhəri günü” elan olundu. Bu qərar həm Şuşanın tariximizdəki, həm də xalqımızın mənəvi yaddaşındakı mövqeyinə verilən ən yüksək qiymətdir. Şuşa həm qəhrəmanlıq, həm də mədəniyyətin rəmzidir. Burada doğulan böyük şəxsiyyətlər, ədiblər, bəstəkarlar və şairlər Azərbaycan mədəniyyətinin parlaq səhifələrini yaratmışlar.

Müzəffər Ali Baş Komandanın rəhbərliyi ilə azad edilən Şuşa bu gün yenidən dirçəliş dövrünü yaşayır. Prezident İlham Əliyev və Birinci vitse-prezident Mehriban Əliyeva dəfələrlə Şuşaya səfər edərək şəhərdə aparılan bərpa-quruculuq işləri ilə yaxından tanış olublar. Dövlət başçısının tapşırığı ilə şəhərdə infrastruktur tam yenidən qurulur, yollar, tunellər, enerji və kommunikasiya xətləri çəkilir, yaşayış binaları, məktəblər, mədəniyyət ocaqları bərpa olunur.

Prezident İlham Əliyevin imzaladığı “Şuşanın azad olunmasına görə” Azərbaycan Respublikasının medalı haqqında sərəncamla Vətən müharibəsində xüsusi igidlik və qəhrəmanlıq göstərmiş hərbçilər təltif ediliblər. Bu medal, 2020-ci ilin noyabrında Şuşa uğrunda gedən döyüşlərdə iştirak etmiş qəhrəman əsgər və zabitlərimizin misilsiz şücaətinə dövlətimizin verdiyi yüksək qiymətin ifadəsidir.

Ümumilikdə 8 mindən çox hərbi qulluqçu “Şuşanın azad olunmasına görə” medalı ilə təltif edilib. Bu qərar Azərbaycan Ordusunun əzmini, Müzəffər Ali Baş Komandanın rəhbərliyi altında əldə olunan Zəfərin miqyasını və xalqımızın qəhrəman oğullarına olan sonsuz minnətdarlığını əks etdirir. Bu təltif, həm də gələcək nəsillər üçün qəhrəmanlıq nümunəsi kimi əbədi qalacaq. “Şuşanın azad olunmasına görə” medalı Azərbaycanın dövlətçilik tarixində xüsusi yer tutan, Zəfərin simvoluna çevrilmiş mükafatlardandır.

Xüsusilə Şuşa Bəyannaməsi ilə Azərbaycan–Türkiyə qardaşlığının ən yüksək səviyyədə təsdiqlənməsi də məhz bu şəhərdə baş vermişdir. Bu sənəd bir daha göstərdi ki, Şuşa təkcə Azərbaycanın deyil, bütün türk dünyasının qürur mənbəyidir.

Prezident İlham Əliyevin sözləri ilə desək: “Şuşa təkcə Azərbaycanın mədəniyyət paytaxtı deyil, həm də xalqımızın əzmini, milli ruhunu və birliyini təcəssüm etdirən simvoldur.”

Bu gün Şuşada keçirilən beynəlxalq tədbirlər, musiqi festivalları və mədəniyyət layihələri şəhərin qədim şöhrətini yenidən dünyaya tanıdır. “Xarıbülbül” Musiqi Festivalı, Vaqif Poeziya Günləri, Şuşa İncəsənət Forumu kimi tədbirlər artıq ənənəvi xarakter alıb və Azərbaycan mədəniyyətinin gücünü, zənginliyini nümayiş etdirir.

Dövlət başçısının “Şuşa – 2022-ci ilin Azərbaycan mədəniyyət paytaxtı” və ardınca “Türk dünyasının mədəniyyət paytaxtı” elan edilməsi barədə qərarları şəhərin beynəlxalq səviyyədə nüfuzunu daha da artırdı. Hazırda Şuşada həyata keçirilən “Böyük Qayıdış” proqramı çərçivəsində yeni yaşayış kompleksləri tikilir, tarixi abidələr bərpa olunur, həyat yenidən canlanır.

Şuşa şəhərinin azad olunması və bu gün yenidən dirçəlməsi həm dövlətimizin gücünün, həm də xalqımızın iradəsinin təntənəsidir. Prezident İlham Əliyevin qətiyyətli siyasəti, Ordumuzun qəhrəmanlığı, xalqın birliyi nəticəsində bu gün biz Şuşanı yalnız tarixdə deyil, həm də reallıqda yenidən yaşadırıq.

Şuşa şəhəri günü — Qələbənin, milli birliyin, dövlətçilik ideallarının rəmzinə çevrilmiş bir gündür. Bu gün biz həmin tarixi Zəfəri böyük iftixar hissi ilə yad edir, Şuşanın azadlığı uğrunda canını fəda etmiş şəhidlərimizin müqəddəs xatirəsini ehtiramla anırıq.

Şuşa bu gün də Azərbaycan xalqının mədəniyyət beşiyi, milli kimliyimizin tacı kimi yüksəlir. Prezident İlham Əliyevin rəhbərliyi ilə həyata keçirilən bərpa və inkişaf layihələri nəticəsində bu müqəddəs şəhər yaxın illərdə tamamilə yenidən qurulacaq və öz qədim şöhrətinə daha möhtəşəm şəkildə qovuşacaq.

Sahib Şükürov

YAP Göyçay rayon təşkilatının sədri

Paylaş:

Baxılıb: 591 dəfə