Sülh gündəliyi, enerji təhlükəsizliyi və Azərbaycanın regional liderliyi

Bakı:

20 °C

77 %

0 m/s

Əlaqə

AZ RU EN

Ana səhifə / YAP xəbərləri / Sülh gündəliyi, enerji təhlükəsizliyi və Azərbaycanın regional liderliyi

Sülh gündəliyi, enerji təhlükəsizliyi və Azərbaycanın regional liderliyi

22.01.2026 [17:06]

Prezident İlham Əliyevin müsahibəsində xüsusi yer tutan mövzulardan biri Cənubi Qafqazda sülh prosesidir. Dövlət başçısı “Zayed İnsan Qardaşlığı Mükafatı”na layiq görülməsini böyük şərəf kimi qiymətləndirdi.

Prezident bu mükafatı uzun illər davam edən münaqişələrdən sonra Qafqazda sülhün qurulmasına yönəlmiş səylərə verilən yüksək qiymət kimi qəbul etdiyini bildirdi.

O vurğuladı ki, Cənubi Qafqaz artıq yeni inkişaf mərhələsinə qədəm qoyub. Beş-altı aydır regionda sülh şəraiti mövcuddur və bu vəziyyətə alışmaq xüsusi bir hissdir.

Prezident qeyd etdi ki, Azərbaycan müstəqillik tarixində ilk dəfə real sülh dövrünü yaşayır. Bu, ölkə üçün həm tarixi, həm də strateji baxımdan böyük fürsətdir.

Azərbaycan və Ermənistan arasında münasibətlər artıq qarşıdurma mərhələsindən əməkdaşlıq mərhələsinə keçib. Yüklərin daşınmasında bütün məhdudiyyətlər aradan qaldırılıb.

Bundan əlavə, Ermənistanın ciddi şəkildə ehtiyac duyduğu əsas məhsulların, xüsusilə neft məhsullarının təchizatına başlanılıb. Bu addım qarşılıqlı etimadın möhkəmlənməsinə xidmət edir.

Prezident İlham Əliyev vurğuladı ki, bu əməkdaşlıqdan hər iki tərəf faydalanır. Sülh bir tərəfin deyil, bütün regionun qazancıdır.

Dövlət başçısı məqsədin yalnız uzunmüddətli deyil, əbədi sülhə nail olmaq olduğunu xüsusi qeyd etdi. Bu prosesdə vətəndaş cəmiyyətinin də rolu mühümdür.

Müsahibədə ölkədaxili təhlükəsizlik məsələsinə də toxunuldu. Prezident qətiyyətlə bildirdi ki, ölkə daxilində potensial risklər mövcud deyil.

Azərbaycanın təhlükəsizliyi tam təmin olunub. Mövcud risklər yalnız kənar amillərlə bağlı ola bilər və buna görə də regional sabitlik daim diqqət mərkəzində saxlanılır.

Enerji məsələlərinə toxunan Prezident İlham Əliyev neft bazarında sabitliyin müsbət göstərici olduğunu bildirdi. Neftin qiyməti Azərbaycan üçün məqbul səviyyədədir.

Bu vəziyyət qlobal qeyri-sabitliyin enerji bazarına ciddi təsir etmədiyini nümayiş etdirir. Proqnozlaşdırıla bilən enerji bazarı həm istehsalçılar, həm də istehlakçılar üçün vacibdir.

Prezident vurğuladı ki, Azərbaycan Cənubi Qafqazda neft və qaz ixrac edən yeganə ölkədir. Gürcüstan və Ermənistan uzun illərdir Azərbaycan enerjisindən asılıdır.

Avropa ilə enerji əməkdaşlığı isə getdikcə genişlənir. Hazırda Azərbaycan 16 ölkəyə təbii qaz ixrac edir və onların 10-u Avropa İttifaqının üzvüdür.

Boru kəmərlərinin coğrafi əhatəsinə görə Azərbaycan dünyada birinci yerdədir. Bu, ölkəmizin strateji üstünlüyünü göstərir.

Müsahibədə Avropa Parlamentinin Azərbaycana qarşı tənqidləri də dəyərləndirildi. Prezident bildirdi ki, Azərbaycan artıq bu qərəzli mövqelərə reaksiya vermir.

Avropa Parlamenti və AŞPA ilə əməkdaşlıq dayandırılıb, lakin Avropa Komissiyası ilə münasibətlər davam edir.

Prezident vurğuladı ki, Ermənistanın özü Azərbaycanla əməkdaşlığı yüksək qiymətləndirdiyi halda, Avropa Parlamentinin ittihamları əsassızdır.

Ağ Evdə paraflanmış sülh müqaviləsi Azərbaycanın sülhə sadiqliyinin sübutudur. Dövlət başçısı ümid etdiyini bildirdi ki, Avropa Parlamentində bu reallıqlar nəzərə alınacaq.

Prezident İlham Əliyevin Davos müsahibəsi Azərbaycanın sülh, sabitlik və əməkdaşlıq yolunu seçdiyini bir daha təsdiqlədi. Azərbaycan regionda məsuliyyətli və etibarlı lider kimi çıxış edir

Rövşən Qasımov,

YAP Gədəbəy rayon təşkilatının məsləhətçisi

Paylaş:

Baxılıb: 503 dəfə