Qarşılıqlı hörmət və etimada əsaslanan Azərbaycan-BƏƏ münasibətləri

Bakı:

24 °C

64 %

3 m/s

Əlaqə

AZ RU EN

Ana səhifə / YAP xəbərləri / Qarşılıqlı hörmət və etimada əsaslanan Azərbaycan-BƏƏ münasibətləri

Qarşılıqlı hörmət və etimada əsaslanan Azərbaycan-BƏƏ münasibətləri

06.02.2026 [15:37]

Azərbaycan Respublikasının Prezidenti İlham Əliyevin Birləşmiş Ərəb Əmirliklərinə (BƏƏ) rəsmi səfəri iki ölkə arasında mövcud olan dostluq və əməkdaşlıq münasibətlərinin daha da möhkəmlənməsi baxımından mühüm əhəmiyyət kəsb edir. Bu səfər siyasi, iqtisadi və humanitar sahələrdə əlaqələrin genişləndirilməsi üçün yeni imkanlar açmışdır. Prezidentin yüksək səviyyədə qarşılanması Azərbaycan-BƏƏ münasibətlərinin qarşılıqlı hörmət və etimada əsaslandığını bir daha nümayiş etdirmişdir.

Səfər çərçivəsində Prezident İlham Əliyevin “Birləşmiş Ərəb Əmirliklərinin banisi, mərhum Şeyx Zayed bin Sultan Al Nəhyan”ın adını daşıyan nüfuzlu mükafatla təltif edilməsi xüsusi əhəmiyyət daşıyır. Bu mükafat dövlət başçımıza Azərbaycan ilə BƏƏ arasında dostluq münasibətlərinin inkişafına verdiyi töhfələrə, regionda sülhün, sabitliyin və əməkdaşlığın təşviqinə görə təqdim edilmişdir. Şeyx Zayed mükafatı humanizm, tolerantlıq və xalqlar arasında dostluq ideyalarını təcəssüm etdirir. Prezident İlham Əliyevin bu mükafata layiq görülməsi Azərbaycanın beynəlxalq aləmdə artan nüfuzunun və ölkə rəhbərliyinin apardığı uğurlu xarici siyasətin göstəricisidir.

Mükafatın təqdim olunması mərasimində Prezident İlham Əliyevin çıxışı xüsusi diqqət çəkmişdir. Dövlət başçısı çıxışında Azərbaycan ilə BƏƏ arasında tarixi dostluq əlaqələrinin mövcudluğunu vurğulamış, iki ölkənin bir çox sahədə uğurla əməkdaşlıq etdiyini qeyd etmişdir. Prezident İlham Əliyev, həmçinin mərhum Şeyx Zayedin irsinin bu gün də regionda sülhün, sabitliyin və inkişafın əsas dayaqlarından biri olduğunu bildirmişdir. O, Azərbaycan tərəfinin BƏƏ ilə münasibətlərin daha da dərinləşdirilməsində maraqlı olduğunu və bu əməkdaşlığın gələcəkdə yeni layihələrlə zənginləşəcəyini diqqətə çatdırmışdır.

Prezidentin səfəri çərçivəsində keçirilən görüşlərdə energetika, investisiya, bərpa olunan enerji mənbələri, nəqliyyat və humanitar sahələrdə əməkdaşlıq məsələləri müzakirə olunmuşdur. Bu, Azərbaycanın iqtisadi inkişaf strategiyasının beynəlxalq tərəfdaşlıqlar əsasında həyata keçirildiyini göstərir. Xüsusilə BƏƏ şirkətlərinin Azərbaycanda həyata keçirdiyi layihələr iki ölkə arasında iqtisadi əlaqələrin real nəticələr verdiyini sübut edir.

Nəticə etibarilə, Prezident İlham Əliyevin Birləşmiş Ərəb Əmirliklərinə səfəri və Şeyx Zayed mükafatı ilə təltif olunması Azərbaycan-BƏƏ münasibətlərinin yeni mərhələyə yüksəldiyini göstərir. Bu səfər təkcə diplomatik əhəmiyyət daşımır, eyni zamanda Azərbaycan dövlətinin beynəlxalq aləmdə artan nüfuzunun bariz nümunəsidir. Dövlət başçımızın çıxışı isə ölkəmizin sülhə, əməkdaşlığa və qarşılıqlı hörmətə əsaslanan xarici siyasət xəttini bir daha ortaya qoymuşdur.

Sahib Şükürov

YAP Göyçay rayon təşkilatının sədri

Paylaş:

Baxılıb: 661 dəfə