Qanla yazılan tarixin qürur simvolu

Bakı:

25 °C

55 %

0 m/s

Əlaqə

AZ RU EN

Ana səhifə / YAP xəbərləri / Qanla yazılan tarixin qürur simvolu

Qanla yazılan tarixin qürur simvolu

02.03.2026 [11:47]

Ermənistanın Azərbaycana qarşı irəli sürdüyü ərazi iddiaları ölkədə milli azadlıq ideyalarının daha da güclənməsinə təkan verdi. Cəmiyyət həm bu iddialara son qoyulmasını, həm də dövlət müstəqilliyinin bərpasını əsas məqsəd kimi qarşısına qoydu. Qarşı tərəf isə niyyətlərini daha da sərtləşdirərək açıq elan etmədən Azərbaycana qarşı silahlı təcavüzə başladı. Keçmiş SSRİ-nin və müxtəlif xarici qüvvələrin siyasi-hərbi dəstəyi ilə həyata keçirilən bu hücumlar zamanı beynəlxalq hüquq normaları kobud şəkildə pozuldu, Dağlıq Qarabağın Ermənistana birləşdirilməsi məqsədilə əhali doğma torpaqlarından zorla çıxarıldı.

1992-ci il fevralın 25-dən 26-na keçən gecə, Xankəndidə yerləşən 366-cı alayın iştirakı ilə Xocalı şəhərində dəhşətli qətliam törədildi. Bu faciə xalqımızın yaddaşından silinməyib və hər il dərin ehtiramla anılır. Heydər Əliyevin təşəbbüsü ilə 1994-cü il fevralın 24-də Milli Məclis “Xocalı soyqırımı günü haqqında” qərar qəbul etdi. Daha sonra, 1997-ci il fevralın 25-də imzalanmış sərəncama əsasən, hər il fevralın 26-da saat 17:00-da ölkə ərazisində soyqırımı qurbanlarının xatirəsi bir dəqiqəlik sükutla yad edilir.

İlham Əliyevin təşəbbüsü ilə 2024-cü ildə Xocalı Soyqırımı Memorial Kompleksinin təməli qoyuldu və faciənin 34-cü ildönümündə kompleksin açılışı baş tutdu. Açılış mərasimində çıxış edən dövlət başçısı qeyd etdi ki, Heydər Əliyev Fondu fəaliyyətə başladıqdan dərhal sonra Fondun vitse-prezidenti Leyla Əliyeva tərəfindən “Xocalıya ədalət” beynəlxalq kampaniyasına start verilib. Bu təşəbbüs nəticəsində artıq iyirmiyə yaxın ölkə Xocalı hadisələrini soyqırımı kimi tanıyıb və bu istiqamətdə fəaliyyət davam etdirilir.

Prezident çıxışında vurğuladı ki, uzun illər ərzində beynəlxalq təşkilatların laqeyd mövqeyinə baxmayaraq, Azərbaycan ədalətin bərpası yolunda ardıcıl addımlar atıb. 44 günlük Vətən müharibəsində qazanılan Zəfər, eləcə də Xocalının azad edilməsi tarixi ədalətin təmin olunmasının mühüm mərhələləri kimi qiymətləndirildi. Bundan əlavə, müharibə cinayətlərində ittiham olunan şəxslərin məhkəmə qarşısına çıxarılması ədalət prinsipinin gerçəkləşdiyini göstərdi.

Dövlət başçısı bildirdi ki, xalqın birliyi və ordunun peşəkarlığı sayəsində ölkənin ərazi bütövlüyü və suverenliyi tam bərpa olunub. O qeyd etdi ki, Azərbaycan işğal dövründə müxtəlif təzyiqlərlə üzləşsə də, heç vaxt mövqeyindən geri çəkilməyib və torpaqların azadlığına nail olmaq üçün qətiyyət nümayiş etdirib.

Memorial Kompleksin məhz Xocalıda açılması xüsusi rəmzi məna daşıyır. Mərasimdə iştirak edən sakinlərin əksəriyyəti yaxınlarını itirmiş, uzun illər məcburi köçkün həyatı yaşamış insanlardır. Buna baxmayaraq, onların dövlətə və ədalətə inamı sarsılmayıb. Bu abidə Azərbaycan xalqının iradəsinin, mənəvi gücünün və sarsılmaz ruhunun ifadəsi kimi dəyərləndirilir.

Bu gün Azərbaycan güclü və öz təhlükəsizliyini təmin edə bilən dövlətdir. Xocalı Soyqırımı Memorial Kompleksinin açılışı təkcə faciə qurbanlarının xatirəsinə ehtiram deyil, həm də tarixi ədalətin bərqərar olmasının simvolu kimi yadda qaldı. Xalqımız Zəfər tarixini yaşatdığı kimi, Xocalı həqiqətlərini də gələcək nəsillərə ötürmək əzmindədir.

Rail Tağızadə

Yeni Azərbaycan Partiyası Naxçıvan şəhər təşkilatının sədr müavini

Paylaş:

Baxılıb: 382 dəfə