Ali baş komandanın zəfər manifesti

Bakı:

10 °C

87 %

5 m/s

Əlaqə

AZ RU EN

Ana səhifə / YAP xəbərləri / Ali baş komandanın zəfər manifesti

Ali baş komandanın zəfər manifesti

03.03.2026 [14:21]

Azərbaycanın yaxın tarixi, sadəcə təqvimlərdəki rəqəmlərdən ibarət deyil. Bu tarix hər bir azərbaycanlının qan yaddaşına həkk olunmuş, itkilərlə yoğrulmuş, lakin sınmayan bir iradənin hekayəsidir.

20-ci əsrin sonlarında müstəqilliyə gedən yolumuz heç də hamar olmadı. Dağlıq Qarabağ və ətraf rayonlarımızın işğalı ilə başlayan Birinci Qarabağ müharibəsi Azərbaycan üçün ən ağır sınaqlardan birinə çevrildi. Bir milyondan çox insanın qaçqın və köçkün düşməsi, ailələrin parçalanması, yurd-yuvalarımızın talan edilməsi bir xalqın taleyinə yazılan ən ağır ağrılardan biri idi.

Bu faciələrin ən dözülməz zirvəsi isə 1992-ci ilin 26 fevralında Xocalıda yaşandı.

Otuz ilə yaxın davam edən bu ağır sınaq dövrü Azərbaycanın həm hərbi, həm də mənəvi gücünü toplamaq üçün bir hazırlıq mərhələsi oldu. Biz o acıları unutmadıq, amma onlara təslim də olmadıq. O ağrılı günlərin qisası döyüş meydanında alındı və Azərbaycan öz ərazi bütövlüyünü bərpa edərək tarixi ədaləti bərqərar etdi. Keçmişin bu acı səhifələri indi bizim üçün həm də zəfərimizin dəyərini xatırladan bir qürur aynasıdır.

Prezident İlham Əliyevin Xocalı Soyqırımı Memorialının açılış mərasimindəki nitqi, Azərbaycan dövlətinin həm öz keçmişinə sadiqliyini, həm də gələcəyə baxışını tam çılpaqlığı ilə ortaya qoydu. Dövlət başçısı öz çıxışında xüsusi olaraq bildirdi ki, Xocalı faciəsini törədənlər, dinc əhaliyə qarşı qəddarlıq nümayiş etdirənlər artıq layiq olduqları cəzanı alırlar. O, vurğuladı ki, vaxtilə Ermənistanda ən yüksək kürsülərdə oturan, Xocalı qatili olmaqla öyünən şəxslər bu gün Azərbaycan ədaləti qarşısında cavab verirlər. Bu, sadəcə hüquqi bir proses deyil, həm də illərdir ədalət gözləyən Xocalı sakinlərinin və bütöv bir xalqın mənəvi qələbəsidir. Prezidentin bu mesajı həm də beynəlxalq birliyə bir xatırlatma idi: Azərbaycan öz vətəndaşlarına qarşı törədilən heç bir cinayəti unutmur və gec-tez ədaləti bərqərar edir.

Dövlət başçısı çıxışında ordumuzun qəhrəmanlığını ön plana çəkərək qeyd etdi ki, biz Xocalı qurbanlarının qisasını mülki insanlardan deyil, döyüş meydanında düşmən ordusundan aldıq. Bu, Azərbaycan dövlətinin ali humanist prinsiplərə sadiqliyinin və ordumuzun yüksək peşəkarlığının göstəricisidir. Memorialın açılışı həm də rəmzi bir qayıdışın təsdiqidir; Prezident bildirdi ki, bu gün Xocalı artıq azaddır, dirçəlir və öz doğma sakinlərini qəbul edir. "Biz buraya qalib xalq kimi qayıtmışıq" ifadəsi isə bütün çıxışın ana xəttini təşkil edirdi. Memorialın varlığı gələcək nəsillər üçün bir and yeridir ki, xalqımız bir daha heç vaxt belə faciələrin yaşanmasına icazə verməyəcək və hər zaman öz güclü dövləti, sarsılmaz ordusu ilə qürur duyacaqdır.

Türkanə Kərimova

YAP Babək rayon təşkilatının əməkdaşı

Paylaş:

Baxılıb: 356 dəfə