Qadına ehtiramın və dəyərin təntənəsi

Bakı:

25 °C

56 %

1 m/s

Əlaqə

AZ RU EN

Ana səhifə / YAP xəbərləri / Qadına ehtiramın və dəyərin təntənəsi

Qadına ehtiramın və dəyərin təntənəsi

05.03.2026 [20:51]

8 Mart – Beynəlxalq Qadınlar Günü qadınların hüquq və azadlıqları uğrunda apardıqları mübarizənin rəmzi kimi tarixə düşmüşdür. Bu əlamətdar günün əsası XX əsrin əvvəllərində qadınların əmək, seçki və sosial hüquqlar uğrunda keçirdikləri aksiyalarla qoyulmuşdur.

1910-cu ildə Klara Setkin tərəfindən qadınlara həsr olunmuş beynəlxalq günün təsis edilməsi təklif edilmiş, 1911-ci ildən etibarən bir sıra ölkələrdə qeyd olunmağa başlanmışdır. 1975-ci ildə isə Birləşmiş Millətlər Təşkilatı tərəfindən 8 Mart rəsmi beynəlxalq gün kimi qəbul edilmişdir.

Bu gün dünyanın bir çox ölkəsində qadınların cəmiyyətdəki rolunun, nailiyyətlərinin və hüquqlarının təntənəsi kimi qeyd olunur.

Qadın ailənin təməli, cəmiyyətin mənəvi dayağıdır. O, həm ana, həm müəllim, həm də vətənpərvər vətəndaş kimi gələcək nəsillərin formalaşmasında mühüm rol oynayır. Müasir dövrdə qadınlar elm, təhsil, səhiyyə, siyasət, mədəniyyət və digər sahələrdə böyük uğurlar qazanaraq dövlətin inkişafına mühüm töhfələr verirlər.

Azərbaycan qadını tarix boyu öz müdrikliyi, sədaqəti və mərdliyi ilə seçilmiş, ictimai-siyasi proseslərdə fəal iştirak etmişdir.

Müstəqil Azərbaycanda qadın hüquqlarının qorunması və gender bərabərliyinin təmin olunması dövlət siyasətinin prioritet istiqamətlərindəndir. Ümummilli Lider Heydər Əliyev ölkədə qadın siyasətinin əsasını qoymuşdur. Onun rəhbərliyi dövründə qadınların dövlət idarəçiliyində təmsilçiliyinin artırılması, hüquqlarının müdafiəsi və ictimai fəallığının gücləndirilməsi istiqamətində mühüm addımlar atılmışdır.

Ulu öndər Heydər Əliyevin 1998-ci il 14 yanvar tarixli Fərmanı ilə Azərbaycan Respublikasının Qadın Problemləri üzrə Dövlət Komitəsi yaradılmışdır. Bu qurum ölkədə qadın siyasətinin həyata keçirilməsində mühüm rol oynamışdır.

Daha sonra, Prezident İlham Əliyevin 2006-cı il 6 fevral tarixli Fərmanı ilə Azərbaycan Respublikasının Ailə, Qadın və Uşaq Problemləri üzrə Dövlət Komitəsi yaradılmışdır. Komitə gender bərabərliyinin təmin olunması, qadınların hüquqlarının müdafiəsi, ailə institutunun möhkəmləndirilməsi və uşaqların sosial rifahının yaxşılaşdırılması istiqamətində ardıcıl fəaliyyət göstərir.

Dövlət qadın siyasəti bu gün Prezident İlham Əliyev tərəfindən yeni meyarlarla zənginləşdirilərək yüksək səviyyədə davam etdirilir. Qadınların sahibkarlıq fəaliyyətinə cəlb olunması, sosial müdafiəsinin gücləndirilməsi və dövlət strukturlarında geniş təmsil olunması istiqamətində sistemli tədbirlər həyata keçirilir.

Eyni zamanda, ölkəmizin Birinci vitse-prezidenti Mehriban Əliyeva tərəfindən reallaşdırılan sosial və humanitar layihələr qadın və uşaq hüquqlarının müdafiəsinə, onların rifahının yüksəldilməsinə mühüm töhfələr verir.

8 Mart – Beynəlxalq Qadınlar Günü yalnız bir bayram deyil, həm də qadınların cəmiyyətdəki roluna verilən yüksək dəyərin ifadəsidir. Bu gün qadınlara sevgi və ehtiram göstərməklə yanaşı, onların hüquq və imkanlarının daha da genişləndirilməsi istiqamətində görülən işləri dəyərləndirmək üçün də mühüm fürsətdir.

Azərbaycan qadını dünən olduğu kimi bu gün də dövlətimizin və cəmiyyətimizin inkişafında fəal iştirak edir, gələcəyin qurucusu kimi şərəfli missiya daşıyır.

Sahib Şükürov

YAP Göyçay rayon təşkilatının sədri

Paylaş:

Baxılıb: 330 dəfə