Enerji təhlükəsizliyində Azərbaycanın rolu

Bakı:

11 °C

87 %

7 m/s

Əlaqə

AZ RU EN

Ana səhifə / YAP xəbərləri / Enerji təhlükəsizliyində Azərbaycanın rolu

Enerji təhlükəsizliyində Azərbaycanın rolu

11.03.2026 [18:57]

Cənub Qaz Dəhlizi Məşvərət Şurasının nazirlərin 12-ci iclası və Yaşıl Enerji Məşvərət Şurasının nazirlərin 4-cü iclası çərçivəsində ölkə başçısı cənab İlham Əliyev tərəfindən səsləndirilən fikrirlər ölkənin qlobal enerji xəritəsində tutduğu mühüm mövqeni aydın şəkildə ifadə edir. Son illərdə Azərbaycan yalnız enerji resurslarının istehsalçısı kimi deyil, eyni zamanda onların təhlükəsiz və sabit şəkildə daşınmasını təmin edən mühüm tranzit ölkə kimi də tanınır. Ölkənin coğrafi mövqeyi Avropa ilə Asiya arasında enerji körpüsü rolunu oynamağa imkan verir. Bu baxımdan Azərbaycan regionun enerji xəritəsində strateji əhəmiyyətə malikdir.Xüsusilə Cənub Qaz Dəhlizi layihəsi Azərbaycanın bu sahədəki rolunu daha da gücləndirib. Bu iri enerji layihəsi Xəzər hövzəsinin qaz ehtiyatlarını Avropa bazarına çatdırmaqla bir çox ölkələrin enerji təhlükəsizliyinə mühüm töhfə verir. Layihənin əsas məqsədi enerji mənbələrinin və marşrutlarının şaxələndirilməsinə nail olmaqdır.Azərbaycan uzun illərdir ki, beynəlxalq enerji layihələrində etibarlı tərəfdaş kimi tanınır. Bu etibar ölkənin sabit siyasi mühiti, beynəlxalq öhdəliklərə sadiqliyi və enerji infrastrukturuna qoyulan böyük investisiyalar nəticəsində formalaşıb. Azərbaycanın təşəbbüsü ilə həyata keçirilən enerji layihələri region dövlətləri ilə yanaşı Avropa ölkələrinin də maraqlarına xidmət edir.Prezident İlham Əliyevin vurğuladığı kimi, ölkə yalnız öz enerji resurslarını ixrac etmir, eyni zamanda digər ölkələrin enerji ehtiyatlarının da təhlükəsiz şəkildə daşınmasına şərait yaradır. Bu isə Azərbaycanın enerji tranzit mərkəzi kimi rolunu daha da möhkəmləndirir.Enerji siyasətində yeni istiqamətlərdən biri də yaşıl enerji sahəsidir. Azərbaycanın alternativ və bərpa olunan enerji mənbələrinə marağı getdikcə artır. Bu istiqamətdə keçirilən beynəlxalq müzakirələr, xüsusilə Yaşıl Enerji Məşvərət Şurasının iclasları ölkənin enerji strategiyasının gələcək inkişaf xəttini müəyyənləşdirir.

Günəş və külək enerjisi potensialı baxımından zəngin olan Azərbaycan gələcəkdə yalnız qaz və neft ixracatçısı deyil, həm də yaşıl enerji istehsalçısı və ixracatçısı kimi çıxış etməyi hədəfləyir.

Bütün bunlar göstərir ki, Azərbaycan qlobal enerji sistemində getdikcə daha mühüm rol oynayır. Ölkə həm enerji istehsalçısı, həm də etibarlı tranzit mərkəzi kimi regionun və Avropanın enerji təhlükəsizliyinə əhəmiyyətli töhfələr verir. Prezident İlham Əliyevin qeyd etdiyi kimi, Azərbaycanın enerji ehtiyatlarının etibarlı tranziti ölkəsi kimi rolu beynəlxalq əməkdaşlığın möhkəmlənməsinə və enerji sabitliyinin təmin olunmasına xidmət edir.

Elvin Əliyev

YAP Babək rayon təşkilatının sədr müavini

Paylaş:

Baxılıb: 460 dəfə