Regional əməkdaşlığa yeni təkan

Bakı:

24 °C

60 %

13 m/s

Əlaqə

AZ RU EN

Ana səhifə / YAP xəbərləri / Regional əməkdaşlığa yeni təkan

Regional əməkdaşlığa yeni təkan

27.04.2026 [10:50]

Bayram Aslanov

YAP İdarə Heyətinin üzvü, partiyanın Gəncə şəhər təşkilatının sədri

Aprelin 25-də Ukrayna Prezidenti Volodimir Zelenskinin Azərbaycana rəsmi səfəri çərçivəsində Azərbaycan Respublikasının Prezidenti İlham Əliyev ilə keçirilən yüksək səviyyəli görüşlər iki ölkə arasında münasibətlərin gələcək inkişaf istiqamətlərini müəyyənləşdirən mühüm siyasi hadisə oldu.

Hər iki dövlət başçısı mətbuata birgə bəyanatla çıxış edərək, əməkdaşlığın əsas istiqamətlərini və prioritetlərini açıqlayaraq, Azərbaycan ilə Ukrayna arasında münasibətlər qarşılıqlı hörmət, etimad, beynəlxalq hüququn prinsiplərinə əsaslandığını, bir-birinin ərazi bütövlüyünü və suverenliyini daim dəstəklədiyini qeyd ediblər.

Prezident İlham Əliyev çıxışında vurğulayıb ki, Azərbaycan və Ukrayna beynəlxalq təşkilatlar çərçivəsində də sıx əməkdaşlıq edir və bir-birinin mövqelərini dəstəkləyir. Bu həm regional, həm də qlobal səviyyədə siyasi koordinasiyanın gücləndirilməsinə xidmət edir.

Bəyanatda iqtisadi əməkdaşlıq xüsusi yer tutub. Prezident İlham Əliyev qeyd edib ki, ticarət dövriyyəsinin artırılması üçün böyük potensial mövcuddur. O, enerji sektorunda əməkdaşlığın perspektivlərinə toxunaraq Azərbaycanın Avropanın enerji təhlükəsizliyində mühüm rol oynadığını bildirib.

Ukrayna ilə enerji sahəsində əməkdaşlığın genişləndirilməsi, xüsusilə neft və qaz təchizatı, həmçinin alternativ enerji layihələri üzrə birgə təşəbbüslərin həyata keçirilməsi imkanları da önə çəkilib.

Azərbaycanın mühüm nəqliyyat-logistika mərkəzinə çevrildiyini vurğulayan Prezident İlham Əliyev Şərq-Qərb və Şimal-Cənub nəqliyyat dəhlizlərinin inkişafı çərçivəsində Ukrayna ilə əməkdaşlığın genişləndirilməsi məsələsinin diqqət mərkəzində olduğunu qeyd edib. O da nəzərə çatdırılıb ki, Xəzər dənizi vasitəsilə yükdaşımaların artırılması, liman infrastrukturlarının inkişafı və tranzit imkanlarının genişləndirilməsi hər iki ölkə üçün iqtisadi fayda yaradır.

Mətbuata verilən bəyanatda humanitar sahədə əməkdaşlıq da geniş şəkildə əksini tapıb. Prezident İlham Əliyev Azərbaycan və Ukrayna xalqları arasında tarixi dostluq münasibətlərinin mövcud olduğunu qeyd edərək təhsil, mədəniyyət və turizm sahələrində əməkdaşlığın daha da genişləndirilməsinin vacibliyini vurğulayıb. Tələbə mübadiləsi proqramları, birgə mədəni layihələr və elmi əməkdaşlıq təşəbbüsləri iki ölkə arasında əlaqələrin dərinləşməsinə xidmət edən əsas istiqamətlər kimi göstərilib.

Yüksək qonaqpərvərliyə görə minnətdarlığını ifadə edən Volodimir Zelenski bildirib ki, Ukrayna Azərbaycan ilə münasibətlərin inkişafına böyük önəm verir və bu səfər yeni əməkdaşlıq imkanlarının açılmasına şərait yaradacaq.

Zelenski xüsusilə iqtisadi, enerji və infrastruktur layihələrində əməkdaşlığın genişləndirilməsinə maraq göstərdiklərini qeyd edib. O həmçinin vurğulayıb ki, mövcud çətin beynəlxalq şəraitdə tərəfdaş ölkələrlə əlaqələrin möhkəmləndirilməsi Ukrayna üçün prioritetdir.

Ukrayna Prezidenti Volodimir Zelenskinin Azərbaycana səfəri, Qəbələdə keçirilən görüşlər, mətbuata verilən birgə bəyanat göstərir ki, Azərbaycan ilə Ukrayna arasında münasibətlər strateji tərəfdaşlıq səviyyəsində inkişaf edir. Prezident İlham Əliyevin qeyd etdiyi kimi, bu səfər ikitərəfli əlaqələrin daha da möhkəmlənməsinə və yeni layihələrin həyata keçirilməsinə təkan verəcək. Ümumilikdə, aparılan müzakirələr və verilən mesajlar göstərir ki, Bakı və Kiyev arasında əməkdaşlıq yalnız mövcud sahələrlə məhdudlaşmır, eyni zamanda yeni istiqamətlər üzrə də genişlənmək potensialına malikdir. Bu isə regionda iqtisadi və siyasi sabitliyə müsbət təsir göstərə bilər.

Paylaş:

Baxılıb: 539 dəfə