Heydər Əliyev və Azərbaycanın Milli Qurtuluş missiyası

Bakı:

20 °C

83 %

0 m/s

Əlaqə

AZ RU EN

Ana səhifə / YAP xəbərləri / Heydər Əliyev və Azərbaycanın Milli Qurtuluş missiyası

Heydər Əliyev və Azərbaycanın Milli Qurtuluş missiyası

10.06.2026 [12:59]

15 İyun Azərbaycan xalqının taleyində mühüm dönüş nöqtəsi, dövlətçilik tariximizin ən şərəfli səhifələrindən biridir. Bu əlamətdar gün müstəqil Azərbaycanın xilası, sabitliyə və inkişaf yoluna qədəm qoymasının rəmzi kimi ölkəmizin tarixində xüsusi yer tutur. Hər il xalqımız tərəfindən böyük ehtiramla qeyd olunan Milli Qurtuluş Günü Azərbaycan dövlətçiliyinin qorunub saxlanılmasında və möhkəmləndirilməsində Ümummilli Lider Heydər Əliyevin misilsiz xidmətlərinin təntənəsidir.

1991-ci ildə dövlət müstəqilliyini bərpa edən Azərbaycan mürəkkəb siyasi, iqtisadi və sosial problemlərlə üz-üzə qalmışdı. Ölkədə hakimiyyət böhranı, xaos və anarxiya hökm sürür, vətəndaş qarşıdurması təhlükəsi getdikcə dərinləşirdi. Ermənistanın hərbi təcavüzü nəticəsində torpaqlarımızın işğalı davam edir, dövlət müstəqilliyinin itirilməsi təhlükəsi yaranırdı. Belə bir ağır şəraitdə xalqın təkidli tələbi ilə Ümummilli Lider Heydər Əliyev 1993-cü ilin iyun ayında yenidən siyasi hakimiyyətə qayıdaraq Azərbaycanı dərin böhrandan xilas etdi.

1993-cü il iyunun 15-də Heydər Əliyevin Azərbaycan Respublikası Ali Sovetinin Sədri seçilməsi ölkəmizin müasir tarixində yeni mərhələnin başlanğıcı oldu. Məhz həmin gündən etibarən Azərbaycanda sabitliyin təmin olunması, qanunçuluğun bərpası, dövlət institutlarının möhkəmləndirilməsi istiqamətində ardıcıl və məqsədyönlü tədbirlər həyata keçirilməyə başlandı. Xalqın öz lideri ətrafında sıx birləşməsi nəticəsində ölkədə ictimai-siyasi sabitlik təmin edildi, dövlətçiliyin əsasları möhkəmləndirildi və müstəqilliyimizin dönməzliyi təmin olundu. Buna görə də Azərbaycan xalqı 15 İyunu haqlı olaraq Milli Qurtuluş Günü kimi qeyd edir.

Ümummilli Lider Heydər Əliyevin uzaqgörən siyasəti nəticəsində Azərbaycan qısa müddətdə beynəlxalq aləmdə etibarlı tərəfdaş kimi tanındı. 1994-cü ildə imzalanan “Əsrin müqaviləsi” ölkənin iqtisadi inkişafında yeni mərhələnin əsasını qoydu, xarici investisiyaların cəlb olunmasına və Azərbaycanın dünya enerji bazarında mövqelərinin güclənməsinə şərait yaratdı. Eyni zamanda demokratik dövlət quruculuğu, hüquqi islahatlar və vətəndaş cəmiyyətinin inkişafı istiqamətində mühüm addımlar atıldı. Məhz həmin dövrdə Azərbaycanın gələcək inkişaf strategiyasının təməli formalaşdırıldı və ölkəmiz davamlı tərəqqi yoluna qədəm qoydu.

Milli Qurtuluş ideyalarının yaşadılması və Ümummilli Lider Heydər Əliyevin müəyyən etdiyi dövlətçilik kursunun davam etdirilməsində Yeni Azərbaycan Partiyasının xüsusi rolu vardır. 1992-ci ildə xalqın istəyi və tələbi ilə yaradılan Yeni Azərbaycan Partiyası qısa müddətdə ölkənin aparıcı siyasi qüvvəsinə çevrilərək Azərbaycanın inkişafına mühüm töhfələr vermişdir. Ulu Öndərin siyasi irsi əsasında fəaliyyət göstərən partiya milli maraqların qorunması, dövlət müstəqilliyinin möhkəmləndirilməsi, ictimai-siyasi sabitliyin təmin olunması və davamlı inkişafın dəstəklənməsi istiqamətində ardıcıl fəaliyyət göstərir.

Bu gün cənab Prezident İlham Əliyevin rəhbərliyi altında Yeni Azərbaycan Partiyası Heydər Əliyev ideyalarına sadiq qalaraq ölkəmizin hərtərəfli inkişafına, beynəlxalq nüfuzunun daha da yüksəlməsinə və əldə olunan tarixi nailiyyətlərin möhkəmləndirilməsinə xidmət edən siyasəti uğurla davam etdirir. Partiyanın fəaliyyəti milli həmrəyliyin gücləndirilməsi, vətəndaş rifahının yüksəldilməsi və Azərbaycanın gələcək inkişaf strategiyasının həyata keçirilməsində mühüm əhəmiyyət kəsb edir.

Cənab Prezident İlham Əliyevin rəhbərliyi ilə həyata keçirilən siyasət nəticəsində Azərbaycan regionun ən güclü dövlətlərindən birinə çevrilmiş, iqtisadi və siyasi mövqelərini daha da möhkəmləndirmişdir. Xüsusilə 2020-ci ildə Vətən müharibəsində əldə olunan tarixi Zəfər və 2023-cü ildə ölkəmizin suverenliyinin tam bərpa olunması Azərbaycan dövlətinin gücünü və xalqın milli birliyini bütün dünyaya nümayiş etdirmişdir. Bu nailiyyətlər Ümummilli Lider Heydər Əliyevin müəyyən etdiyi siyasi kursun uğurla davam etdirilməsinin bariz nümunəsidir.

Milli Qurtuluş Günü xalqımızın birlik, həmrəylik və dövlətçilik iradəsinin təcəssümüdür. Bu gün Azərbaycan vətəndaşları dərin minnətdarlıq hissi ilə Ümummilli Lider Heydər Əliyevin əziz xatirəsini yad edir, onun zəngin siyasi irsini böyük ehtiramla yaşadırlar. Müstəqil Azərbaycan dövlətinin möhkəmlənməsi, davamlı inkişafı, beynəlxalq arenada qazandığı uğurlar və tarixi Zəfərləri Milli Qurtuluşun bəhrələri kimi tariximizdə əbədi yaşayacaqdır. 15 İyun Milli Qurtuluş Günü Azərbaycan xalqının milli birlik, güclü dövlətçilik və müstəqillik əzminin təntənəsi olaraq gələcək nəsillərə ötürülən ən dəyərli tarixi irslərdən biridir.

Rövşən Əhmədov

YAP Ağcabədi rayon təşkilatının sədri

Paylaş:

Baxılıb: 456 dəfə