Azərbaycan və Almaniya Münasibətlərində Yeni Səhifə: Strateji Tərəfdaşlıq və Gələcəyə Baxış

Bakı:

27 °C

50 %

5 m/s

AZ RU EN

Ana səhifə / YAP xəbərləri / Azərbaycan və Almaniya Münasibətlərində Yeni Səhifə: Strateji Tərəfdaşlıq və Gələcəyə Baxış

Azərbaycan və Almaniya Münasibətlərində Yeni Səhifə: Strateji Tərəfdaşlıq və Gələcəyə Baxış

23.07.2026 [12:10]

Şamilli Turabəxanım,

YAP Nərimanov rayon təşkilatının gənc fəalı

Son illər ölkəmizin xarici siyasətində, xüsusilə də Avropanın aparıcı dövlətləri ilə qurulan münasibətlərdə mühüm irəliləyişlər müşahidə olunur. Bu baxımdan, Prezident İlham Əliyevin Almaniyaya rəsmi səfəri və səfər çərçivəsində aparılan müzakirələr ikitərəfli əlaqələrin gələcəyi üçün həqiqətən də dönüş nöqtəsi oldu. Məncə, bu cür səfərlər sadəcə diplomatik protokol deyil, ölkəmizin iqtisadi və siyasi gələcəyinə hesablanmış çox strateji addımlardır.

İqtisadi Əməkdaşlıq və Yeni İmkanlar

Hazırda Almaniyanın 200-dən çox şirkəti Azərbaycanda müxtəlif sahələrdə uğurla fəaliyyət göstərir. Bu da bir daha sübut edir ki, ölkəmiz xarici investorlar üçün etibarlı və təhlükəsiz tərəfdaşdır. Yeni imzalanan razılaşmalar sayəsində Almaniya şirkətlərinin ölkəmizdəki fəaliyyət dairəsinin daha da genişlənəcəyi gözlənilir. Etiraf etmək lazımdır ki, bu, həm yeni iş yerlərinin açılması, həm də müasir texnologiyaların ölkəmizə gətirilməsi deməkdir. İnkişaf etmiş texnologiyaların tətbiqi isə iqtisadiyyatımızı daha da gücləndirir və rəqabətqabiliyyətli edir.

Ənənəvi Enerjidən "Yaşıl Enerji"yə Keçid

Diqqətimi çəkən əsas məqamlardan biri də enerji sahəsindəki əməkdaşlığın miqyasıdır. Azərbaycan uzun illərdir Avropanın enerji təhlükəsizliyində əvəzsiz rol oynayır. Amma artıq əməkdaşlıq təkcə neft və qazla məhdudlaşmır. Cənab Prezidentin də haqlı olaraq vurğuladığı kimi, ölkəmiz yaşıl enerji sahəsində dəhşətli dərəcədə böyük potensiala malikdir. Gələcəkdə bərpa olunan enerji mənbələrindən əldə edilən elektrik enerjisinin Almaniyaya ixrac edilməsi istiqamətində işlərin aparılması planlaşdırılır. Bu, həm ölkəmizin enerji siyasətinin dövrün tələblərinə uyğunlaşdığını, həm də iqlim dəyişiklikləri ilə mübarizədə nə qədər məsuliyyətli mövqe sərgilədiyimizi göstərir.

Nəqliyyat, Tranzit və Orta Dəhliz

Səfər zamanı müzakirə olunan digər önəmli mövzulardan biri də nəqliyyat və tranzit imkanları idi. Coğrafi mövqeyimiz həmişə üstünlüyümüz olub və bizi Asiya ilə Avropanı birləşdirən mühüm qovşağa çevirib. Xüsusilə Orta Dəhliz layihəsinin inkişafı fonunda yükdaşımaların həcmi durmadan artır. Almaniya kimi nəhəng iqtisadiyyata malik bir dövlətin bu marşruta maraq göstərməsi ölkəmizin beynəlxalq logistika mərkəzi kimi çəkisini daha da artırır. Məncə, bu, təkcə iqtisadi deyil, həm də regionun təhlükəsizliyi və inkişafı baxımından siyasi təsirə malikdir.

Sülh Prosesi və Beynəlxalq Dəstək

Təbii ki, Cənubi Qafqazda sülh prosesi də danışıqların mərkəzində idi. Xüsusilə ABŞ Prezidenti Donald Trampın iştirakı ilə Vaşinqtonda imzalanmış Birgə Bəyannamə və Almaniyanın bu sülh prosesinə verdiyi qəti dəstək çox yüksək qiymətləndirilməlidir. Azərbaycanla Ermənistan arasında münasibətlərin normallaşması regionda uzunmüddətli sabitliyin bərqərar olması üçün şərtdir. İrəli sürdüyümüz sülh təşəbbüsləri bir daha göstərir ki, biz bölgədə daimi sülhün və əməkdaşlığın tərəfdarıyıq.

Eyni zamanda, Almaniya hökumətinin ərazi bütövlüyümüz və suverenliyimiz məsələsində nümayiş etdirdiyi prinsipial mövqe xüsusi qeyd olunmalıdır. Torpaqlarımızı azad etdikdən sonra beynəlxalq hüquqa əsaslanan mövqeyimizin dəstəklənməsi qarşılıqlı etimadı daha da möhkəmləndirir. Dövlətlər arasındakı sağlam münasibətlərin təməlində də məhz qarşılıqlı hörmət və etibar dayanır.

Strateji Sənədlər və Gənclər üçün Perspektivlər

Səfərin ən real nəticələrindən biri "Azərbaycan Respublikası ilə Almaniya Federativ Respublikası arasında ikitərəfli əməkdaşlığın gələcək inkişafı üçün Strateji Gündəliyə dair Birgə Bəyannamə"nin imzalanması və Azərbaycan–Almaniya Biznes Şurasının yaradılması oldu. Bu sənədlər iqtisadiyyat, ticarət, sənaye, innovasiya və digər sahələrdə əlaqələrimizin çərçivəsini dəqiq müəyyənləşdirir.

Bir gənc olaraq düşünürəm ki, bu cür razılaşmalar birbaşa bizim gələcəyimizə xidmət edir. Almaniya kimi qabaqcıl ölkə ilə qurulan möhkəm əlaqələr təhsil, elm və qabaqcıl texnologiyaların ölkəmizə gəlməsində mühüm rol oynayır. Bu da biz gənclər üçün tamamilə yeni imkanlar deməkdir. İnkişaf etmiş təcrübələri öyrənmək, ölkə daxilində yaxşı şəraitdə çalışmaq baxımından bu tərəfdaşlıqlar bizə çox şey qazandırır.

Ümumilikdə, Prezident İlham Əliyevin Almaniyaya bu səfəri iki ölkə arasında əslində yeni səhifə açdı. İmzalanan sənədlər və səslənən fikirlər sübut edir ki, Azərbaycan və Almaniya qarşılıqlı faydalı, uzunmüddətli strateji tərəfdaşlıqda qərarlıdırlar. Bu kimi addımlar insanın gələcəyə olan inamını daha da artırır və ölkəmizin beynəlxalq nüfuzunu gündən-günə gücləndirir.

Paylaş:

Baxılıb: 309 dəfə