Bağlantılarla və tranzit imkanları ilə bağlı Azərbaycan–Almaniya əməkdaşlığının çox böyük əhəmiyyəti var

Bakı:

21 °C

83 %

2 m/s

AZ RU EN

Ana səhifə / YAP xəbərləri / Bağlantılarla və tranzit imkanları ilə bağlı Azərbaycan–Almaniya əməkdaşlığının çox böyük əhəmiyyəti var

Bağlantılarla və tranzit imkanları ilə bağlı Azərbaycan–Almaniya əməkdaşlığının çox böyük əhəmiyyəti var

27.07.2026 [10:47]

Mansur Quliyev,

YAP Ağdam rayon təşkilatının sədri

Azərbaycan Respublikasının Prezidenti cənab İlham Əliyevin 21 iyul 2026-cı il tarixində Almaniya Federativ Respublikasına rəsmi səfəri çərçivəsində səsləndirdiyi fikirlər Azərbaycan–Almaniya münasibətlərinin yeni inkişaf mərhələsinə qədəm qoyduğunu bir daha nümayiş etdirdi. Dövlətimizin başçısının "Bağlantılarla və tranzit imkanları ilə bağlı Azərbaycan–Almaniya əməkdaşlığının çox böyük əhəmiyyəti var" fikri müasir dövrdə ölkələrimiz arasında strateji tərəfdaşlığın əsas istiqamətlərindən birini ifadə edir. Bu yanaşma Azərbaycanın beynəlxalq nəqliyyat-logistika sistemində artan rolunun, Almaniyanın isə Avropanın aparıcı iqtisadi gücü kimi bu sahədəki təcrübəsinin uğurlu vəhdətini əks etdirir.

Son illər Prezident İlham Əliyevin uzaqgörən siyasəti nəticəsində Azərbaycan Avrasiyanın ən mühüm nəqliyyat və logistika mərkəzlərindən birinə çevrilmişdir. Şərqlə Qərbi, Şimalla Cənubu birləşdirən nəqliyyat dəhlizlərinin inkişafı, müasir avtomobil yollarının, dəmir yollarının, hava limanlarının və Bakı Beynəlxalq Dəniz Ticarət Limanının imkanlarının genişləndirilməsi ölkəmizin tranzit potensialını əhəmiyyətli dərəcədə artırmışdır. Bu gün Azərbaycan etibarlı tərəfdaş və sabit tranzit ölkəsi kimi beynəlxalq nüfuzunu daha da möhkəmləndirir.

Prezident İlham Əliyevin Berlində vurğuladığı kimi, Almaniya şirkətləri nəqliyyat və logistika sahəsində böyük təcrübəyə malikdirlər. Məhz bu təcrübənin Azərbaycanın həyata keçirdiyi genişmiqyaslı infrastruktur layihələri ilə uzlaşdırılması hər iki ölkə üçün yeni iqtisadi imkanlar yaradır. Bu əməkdaşlıq təkcə ikitərəfli iqtisadi münasibətlərin inkişafına deyil, eyni zamanda Avropa ilə Mərkəzi Asiya arasında yükdaşımaların sürətlənməsinə və ticarət əlaqələrinin genişlənməsinə mühüm töhfə verəcəkdir.

Azərbaycanın Orta Dəhlizin əsas iştirakçılarından biri kimi mövqeyinin möhkəmlənməsi ölkəmizin geosiyasi əhəmiyyətini daha da artırır. Avropa ilə Asiya arasında ən qısa və təhlükəsiz marşrutlardan biri olan bu dəhliz beynəlxalq ticarətin yeni istiqamətlərini formalaşdırır. Almaniyanın bu prosesdə fəal iştirakı isə həm Avropa iqtisadiyyatı, həm də region ölkələri üçün qarşılıqlı faydalı əməkdaşlıq mühiti yaradır.

Enerji təhlükəsizliyi ilə nəqliyyat təhlükəsizliyi artıq bir-birini tamamlayan strateji istiqamətlərə çevrilmişdir. Azərbaycan bu gün Avropanın etibarlı enerji tərəfdaşı olmaqla yanaşı, həm də etibarlı logistika tərəfdaşı kimi çıxış edir. Təbii qazın və neftin ixracı ilə yanaşı, gələcəkdə yaşıl enerjinin Avropaya çatdırılması, eyni zamanda yükdaşımaların səmərəli təşkili ölkəmizin strateji əhəmiyyətini daha da artırır. Almaniya ilə bu sahələrdə əməkdaşlığın genişlənməsi Avropanın enerji və nəqliyyat təhlükəsizliyinə mühüm töhfə olacaqdır.

Azərbaycanın təşəbbüsü ilə reallaşdırılan beynəlxalq nəqliyyat layihələri iqtisadi dividendlərlə yanaşı, regionda sülhün, əməkdaşlığın və qarşılıqlı etimadın möhkəmlənməsinə də xidmət edir. Prezident İlham Əliyevin həyata keçirdiyi uğurlu xarici siyasət nəticəsində ölkəmiz müxtəlif regionları birləşdirən etibarlı körpü rolunu uğurla yerinə yetirir. Bu siyasət Azərbaycanın beynəlxalq mövqeyini daha da gücləndirir və yeni tərəfdaşlıqlar üçün geniş imkanlar açır.

21 iyul 2026-cı il tarixində Berlində imzalanan sənədlər və əldə olunan razılaşmalar göstərir ki, Azərbaycan–Almaniya münasibətləri keyfiyyətcə yeni mərhələyə qədəm qoyur. Qarşıdakı dövrdə yaradılacaq işçi qrupları, həyata keçiriləcək birgə layihələr və strateji dialoq mexanizmləri nəqliyyat, logistika, iqtisadiyyat və investisiya sahələrində əməkdaşlığı daha da genişləndirəcəkdir.

Bu gün Prezident İlham Əliyevin rəhbərliyi ilə Azərbaycan təkcə regionun deyil, bütövlükdə Avrasiya məkanının əsas nəqliyyat qovşaqlarından birinə çevrilməkdədir. Almaniya ilə tranzit və bağlantılar sahəsində əməkdaşlığın inkişafı isə ölkəmizin iqtisadi gücünü, beynəlxalq nüfuzunu və geostrateji mövqeyini daha da möhkəmləndirəcək, Azərbaycanı qlobal ticarət və logistika sisteminin ayrılmaz hissəsi kimi daha da ön plana çıxaracaqdır.

Paylaş:

Baxılıb: 470 dəfə