Ana dilimiz – milli kimliyimizin əbədi möhürü, dövlətçiliyimizin sarsılmaz dayağı

Bakı:

21 °C

83 %

2 m/s

Əlaqə

AZ RU EN

Ana səhifə / YAP xəbərləri / Ana dilimiz – milli kimliyimizin əbədi möhürü, dövlətçiliyimizin sarsılmaz dayağı

Ana dilimiz – milli kimliyimizin əbədi möhürü, dövlətçiliyimizin sarsılmaz dayağı

30.07.2026 [10:36]

Hər bir xalqın tarixini, mədəniyyətini, milli düşüncə tərzini və mənəvi dəyərlərini gələcək nəsillərə daşıyan ən mühüm sərvət onun ana dilidir. Dil təkcə ünsiyyət vasitəsi deyil, xalqın keçmişini bu günü ilə birləşdirən, milli yaddaşı yaşadan, dövlətçilik ənənələrini qoruyan və milli kimliyi müəyyənləşdirən müqəddəs mənəvi xəzinədir. Azərbaycan dili də əsrlərin sınağından keçərək xalqımızın milli ruhunu, mənəvi gücünü və dövlətçilik iradəsini özündə yaşatmış, bu gün müstəqil Azərbaycanın əsas dövlət rəmzlərindən biri kimi öz layiqli yerini tutmuşdur.

Azərbaycan dili minilliklər boyu formalaşaraq zənginləşmiş, xalqımızın milli düşüncəsini, adət-ənənələrini, həyat tərzini və dünyagörüşünü özündə əks etdirmişdir. Bu dil böyük söz ustalarının – Nizami Gəncəvinin, Məhəmməd Füzulinin, İmadəddin Nəsiminin, Molla Pənah Vaqifin, Mirzə Fətəli Axundzadənin, Cəlil Məmmədquluzadənin, Hüseyn Cavidin, Səməd Vurğunun, Bəxtiyar Vahabzadənin və digər görkəmli şəxsiyyətlərin yaratdığı ölməz əsərlərlə daha da zənginləşmiş, Azərbaycan xalqının mədəni irsinin ayrılmaz hissəsinə çevrilmişdir. Hər bir ədəbi nümunə Azərbaycan dilinin ifadə imkanlarının genişliyini, bədii-estetik gözəlliyini və mənəvi qüdrətini nümayiş etdirmişdir.

Tarixin müxtəlif dövrlərində xalqımız siyasi təzyiqlərlə, assimilyasiya cəhdləri ilə üzləşsə də, ana dilini qoruyub saxlamağı bacarmışdır. Məhz bu dil milli özünüdərk hissini gücləndirmiş, xalqımızın milli birliyinin və mənəvi bütövlüyünün qorunmasına xidmət etmişdir. Dilimiz milli kimliyimizin pasportu, xalqımızın mənəvi varlığının əbədi möhürüdür. Ana dilinə hörmət, əslində Vətənə, tarixə, milli dəyərlərə və dövlətçiliyə hörmət deməkdir.

Azərbaycan dilinin dövlət dili kimi inkişafı və qorunması Ümummilli Lider Heydər Əliyevin adı ilə sıx bağlıdır. Ulu Öndər hələ sovet dövründə Azərbaycan dilinin hüquqi statusunun möhkəmləndirilməsi istiqamətində mühüm addımlar atmış, onun dövlət dili kimi Konstitusiyada təsbit edilməsinə nail olmuşdur. Bu, həmin dövrün mürəkkəb siyasi şəraitində milli maraqların qorunması baxımından böyük tarixi əhəmiyyət daşıyırdı. Müstəqillik illərində isə Azərbaycan dilinin inkişafı dövlət siyasətinin əsas istiqamətlərindən birinə çevrildi. Heydər Əliyevin imzaladığı fərman və sərəncamlar dilimizin saflığının qorunmasına, tətbiq dairəsinin genişləndirilməsinə və beynəlxalq nüfuzunun artırılmasına mühüm töhfələr verdi.

Bu siyasi kurs bu gün Prezident İlham Əliyev tərəfindən uğurla davam etdirilir. Dövlət başçısının həyata keçirdiyi ardıcıl siyasət nəticəsində Azərbaycan dilinin inkişafı, informasiya məkanında mövqelərinin möhkəmləndirilməsi, latın qrafikalı əlifbanın geniş tətbiqi, klassik və müasir ədəbiyyat nümunələrinin nəşri, elektron resursların yaradılması və dilimizin rəqəmsal mühitdə qorunması istiqamətində mühüm layihələr həyata keçirilir. Azərbaycan dili artıq təkcə ölkə daxilində deyil, beynəlxalq platformalarda da müstəqil dövlətimizin simvolu kimi səslənir.

Hər il avqustun 1-də qeyd olunan Azərbaycan əlifbası və Azərbaycan dili günü xalqımızın ana dilinə ehtiramının təcəssümüdür. Bu əlamətdar gün dilimizin tarixi inkişaf yoluna nəzər salmaqla yanaşı, onun gələcək nəsillərə saf şəkildə çatdırılması məsuliyyətini də hər bir vətəndaşın qarşısında mühüm vəzifə kimi qoyur. Qloballaşmanın sürətləndiyi müasir dövrdə müxtəlif dillərin qarşılıqlı təsiri qaçılmaz olsa da, ana dilinin saflığının qorunması, onun yad sözlərin əsassız təsirindən müdafiə olunması və zəngin leksik imkanlarının yaşadılması milli təhlükəsizlik məsələlərindən biri kimi qiymətləndirilməlidir.

Müasir informasiya texnologiyalarının inkişaf etdiyi bir dövrdə Azərbaycan dilinin internet məkanında, sosial şəbəkələrdə, elmi araşdırmalarda və təhsil sistemində düzgün istifadəsi xüsusi əhəmiyyət kəsb edir. Gənc nəslin ana dilində səlis danışması, düzgün yazması, klassik və müasir Azərbaycan ədəbiyyatını dərindən mənimsəməsi milli-mənəvi dəyərlərimizin gələcəyinin təminatıdır. Dilə sevgi ailədən başlayır, məktəbdə formalaşır və cəmiyyət tərəfindən möhkəmləndirilir. Buna görə də hər bir vətəndaş ana dilinin qorunmasına şəxsi məsuliyyət kimi yanaşmalıdır.

Azərbaycan dili bu gün qalib xalqın dilidir. Bu dil Vətən müharibəsində əldə olunan tarixi Zəfərin, ərazi bütövlüyünü bərpa etmiş güclü Azərbaycanın səsinin, milli həmrəyliyimizin və dövlətçilik iradəmizin ifadəsidir. Dünyanın müxtəlif ölkələrində yaşayan milyonlarla soydaşımızı vahid milli ideya ətrafında birləşdirən əsas amillərdən biri də məhz ana dilimizdir.

Ana dilimizi qorumaq təkcə filoloqların və ya müəllimlərin vəzifəsi deyil. Bu, hər bir azərbaycanlının mənəvi borcu, vətəndaşlıq məsuliyyəti və gələcək nəsillər qarşısında müqəddəs öhdəliyidir. Çünki dilini yaşadan xalq öz tarixini, mədəniyyətini, milli kimliyini və dövlətçiliyini də yaşadır. Azərbaycan dili xalqımızın əbədi möhürü, milli varlığımızın sarsılmaz dayağı və müstəqil dövlətimizin ən böyük mənəvi sərvətlərindən biri olaraq gələcək əsrlərdə də öz əzəmətini qoruyacaqdır.

Kübərova Tünzalə

YAP Qusar rayon təşkilatının fəalı

Paylaş:

Baxılıb: 458 dəfə