Türk dünyasında və Qafqazda sülh naminə həmrəylik

Bakı:

24 °C

88 %

6 m/s

Əlaqə

AZ RU EN

Ana səhifə / YAP xəbərləri / Türk dünyasında və Qafqazda sülh naminə həmrəylik

Türk dünyasında və Qafqazda sülh naminə həmrəylik

17.09.2026 [12:29]

Lalə Mədətova

YAP Kəngərli rayon təşkilatının əməkdaşı

Sentyabrın 15-də Azərbaycan Respublikasının Prezidenti İlham Əliyev Türk Dövlətləri Təşkilatının müsəlman dini idarə rəhbərləri Şurasının üzvlərindən və müşahidəçilərindən, Yəhya Bakuvi Beynəlxalq Konfransının həmtəşkilatçılarından və Qafqaz Xalqları Ali Dini Şurasının üzvlərindən ibarət nümayəndə heyətini qəbul edib. Dövlətimizin başçısının görüş zamanı səsləndirdiyi fikirlər Türk dünyası ilə Qafqaz arasında tarixi və mənəvi bağların, sülh və həmrəyliyin möhkəmləndirilməsinin əhəmiyyətini bir daha ortaya qoyub.

Azərbaycanın həm Türk dünyasının ayrılmaz parçası, həm də Qafqazın mühüm ölkəsi olması ölkəmizə bu iki coğrafiyanı birləşdirən xüsusi mövqeyə malik olmaq imkanı verir. Prezident İlham Əliyevin vurğuladığı kimi, Türk dünyası və Qafqaz tarixən bir-biri ilə sıx bağlı olan coğrafiyalardır. Bu gün həmin tarixi yaxınlıq qarşılıqlı hörmət, dostluq, qardaşlıq və əməkdaşlıq münasibətləri ilə daha da zənginləşir. Bakıda müxtəlif ölkələrdən dini liderlərin bir araya gəlməsi də məhz bu həmrəyliyin və qarşılıqlı etimadın mühüm göstəricisidir.

Müasir dünyada sülhün və sabitliyin qorunması yalnız siyasi və diplomatik səylərlə məhdudlaşmır. Bu prosesdə dini liderlərin, nüfuzlu alimlərin və ictimai xadimlərin üzərinə də mühüm məsuliyyət düşür. Prezident İlham Əliyev çıxışında dini liderlərin sözünün milyonlarla insan üçün böyük əhəmiyyət daşıdığını bildirərək, onların sülhə, əməkdaşlığa, əmin-amanlığa və barışığa çağırışlarının cəmiyyətlərdə sabitliyin möhkəmlənməsinə mühüm töhfə verə biləcəyini diqqətə çatdırıb.

Bu baxımdan, Yəhya Bakuvi irsinin müasir dövrdə yenidən diqqət mərkəzinə gətirilməsi xüsusi məna daşıyır. Böyük Azərbaycan mütəfəkkirinin elmi və mənəvi irsi insanları qarşılıqlı hörmətə, mənəvi kamilliyə və həmrəyliyə səsləyən dəyərlərlə zəngindir. Dünyanın müxtəlif bölgələrində qarşıdurmaların, parçalanmaların və dini zəmində gərginliklərin müşahidə olunduğu bir zamanda bu cür irsin öyrənilməsi və təbliği xalqlar arasında anlaşmanın gücləndirilməsinə xidmət edir.

Qafqazın sülh və sabitlik məkanı kimi möhkəmlənməsi isə bütün region xalqlarının ortaq marağındadır. Bu məqsədə çatmaq üçün dövlətlərarası münasibətlərin inkişafı ilə yanaşı, xalqlar və dini icmalar arasında etimadın möhkəmləndirilməsi, dialoqun genişləndirilməsi və qarşılıqlı hörmət mühitinin qorunması vacibdir. Çünki davamlı sülh yalnız siyasi razılaşmalarla deyil, həm də insanların düşüncəsində və cəmiyyətlərdə formalaşan sülh mədəniyyəti ilə möhkəmlənir.

Azərbaycanın ev sahibliyi etdiyi bu görüşün mühüm mesajlarından biri də məhz budur: Türk dünyasını və Qafqaz bölgəsini sülh şəraitində saxlamaq, mövcud sabitliyi qorumaq və gələcək nəsillərə daha təhlükəsiz region miras qoymaq üçün hər birimiz üzərimizə düşən məsuliyyəti dərk etməli, bu istiqamətdə səylərimizi birləşdirməliyik. Dini liderlərin bir araya gəlməsi, fikir mübadiləsi aparması və sülh çağırışlarını birgə səsləndirməsi xalqların bir-birinə daha da yaxınlaşmasına mühüm zəmin yaradır.

Azərbaycanın bu prosesdə fəal mövqeyi ölkəmizin tarixən formalaşmış tolerantlıq ənənələrinə və müxtəlif mədəniyyətlər arasında dialoqa verdiyi əhəmiyyətə uyğundur. Bakı artıq müxtəlif dinlərin və sivilizasiyaların nümayəndələrinin görüşdüyü mühüm məkanlardan birinə çevrilib. Belə tədbirlər Azərbaycanın yalnız öz regionunda deyil, daha geniş coğrafiyada sülh, qarşılıqlı anlaşma və həmrəyliyin təşviqinə verdiyi töhfəni nümayiş etdirir.

Prezident İlham Əliyevin görüş zamanı səsləndirdiyi fikirlər bir daha göstərir ki, Türk dünyasının birliyi və Qafqazda sabitliyin möhkəmləndirilməsi bir-birini tamamlayan proseslərdir. Bu proseslərin uğuru isə qarşılıqlı etimada, dialoqa, mənəvi dəyərlərə və sülh naminə birgə fəaliyyətə əsaslanır. Məhz belə yanaşma regionumuzu qarşıdurmalardan uzaqlaşdıraraq, onu əməkdaşlıq, inkişaf və qarşılıqlı rifah məkanına çevirmək üçün möhkəm zəmin yarada bilər.

Paylaş:

Baxılıb: 178 dəfə