Azərbaycan gəncliyi dövlətin hərtərəfli qayğısı ilə əhatə olunub

Bakı:

27 °C

50 %

8 m/s

Əlaqə

AZ RU EN

Ana səhifə / YAP xəbərləri / Azərbaycan gəncliyi dövlətin hərtərəfli qayğısı ilə əhatə olunub

Azərbaycan gəncliyi dövlətin hərtərəfli qayğısı ilə əhatə olunub

10.08.2018 [08:52]

Suraxanı rayonunda 12 avqust - Beynəlxalq Gənclər Günü münasibətilə “Gənclər bu günümüz, sabahımız, ümidimizdir” mövzusunda tədbir keçirilib
Avqustun 9-da Yeni Azərbaycan Partiyası (YAP) Suraxanı rayon təşkilatı 12 avqust - Beynəlxalq Gənclər Günü münasibətilə “Gənclər bu günümüz, sabahımız, ümidimizdir” mövzusunda tədbir keçirib. Əvvəlcə tədbir iştirakçısı olan gənclər Suraxanı rayonunda yerləşən Heydər Əliyev Mərkəzi ilə tanış olublar. Mərkəzin qarşısında Azərbaycan xalqının Ümummilli lideri, müasir müstəqil Azərbaycan dövlətinin banisi Heydər Əliyevin abidəsi önünə gül dəstələri qoyulub, Ulu öndərin əziz xatirəsi ehtiramla yad edilib. Daha sonra tədbir Suraxanı rayonunda yerləşən “Atəşgah məbədi” Dövlət Tarix-Memarlıq Qoruğunda davam etdirilib.
Tədbirdə YAP Suraxanı rayon təşkilatının sədri Vüqar Seyidov, Milli Məclisin deputatları Ağacan Abıyev və Sevinc Fətəliyeva, rayon İcra Hakimiyyəti başçısının müavinləri Rəşad Hacıyev, Etibar Yolçuyev və Afət Həsənova, o cümlədən gənclər və media nümayəndələri iştirak ediblər.
Tədbiri giriş sözü ilə açan YAP Suraxanı rayon təşkilatının sədri Vüqar Seyidov Azərbaycanda həyata keçirilən uğurlu və səmərəli gənclər siyasətindən bəhs edib. O, diqqətə çatdırıb ki, tarixən hər bir xalq özünün xoşbəxt gələcəyə olan ümidlərini ilk növbədə gənc nəslə bağlayır. Sağlam, bilikli gənc nəslin yetişdirilməsi hər bir ölkə üçün ən başlıca məsələdir. Çünki ölkənin gələcəyi, müqəddəratı indiki gənclərdən asılıdır. Azərbaycan əhalisinin 28 faizindən çoxunu gənclərin təşkil etdiyini söyləyən V.Seyidov bildirib ki, Suraxanı rayonunda 68 mindən çox gənc yaşayır. Rayon təşkilatının sədri diqqətə çatdırıb ki, Ümummilli lider Heydər Əliyevin əsasını qoyduğu dövlət gənclər siyasəti Prezident İlham Əliyev tərəfindən müvəffəqiyyətlə davam etdirilir: “Yeni Azərbaycan Partiyası daim gənclərə xüsusi diqqət göstərir. YAP Suraxanı rayon təşkilatının sıralarında birləşən gənclərin sayı 3500 nəfərdən çoxdur”.
Suraxanı rayon İcra Hakimiyyəti başçısının müavini Rəşad Hacıyev, YAP Suraxanı rayon təşkilatının Gənclər Birliyinin sədri Aydın Əhmədov və Bakı şəhər Gənclər və İdman Baş İdarəsinin rəis müavini Aydın Yusifov çıxış edərək Azərbaycan gənclərinin dövlətin hərtərəfli qayğısı ilə əhatə olunduqlarını diqqətə çatdırıblar.
Milli Məclisin deputatı Sevinc Fətəliyeva isə bu gün Azərbaycan gəncliyinin öz təşəbbüskarlığı ilə fərqləndiyini bildirib. Ölkəmizdə gənclər üçün bütün imkanların yaradıldığını, Azərbaycan gəncliyinin cəmiyyətin inkişafında ciddi rolu olan fəal sosial təbəqəyə çevrildiyini deyən millət vəkili bildirib ki, ölkəmizdə həyata keçirilən gənclər siyasətinin fonunda gənclərin hərtərəfli inkişafını, cəmiyyətin həyatında fəal iştirakını təmin etmək məqsədi ilə dövlət tərəfindən ictimai-siyasi, sosial-iqtisadi, təşkilati-hüquqi şəraitin və təminatların yaradılması istiqamətində əhəmiyyətli tədbirlər görülüb. Onun sözlərinə görə, Azərbaycanda gəncliyin inkişafı və səmərəli fəaliyyəti dövlətin diqqət mərkəzindədir.
Digər çıxış edənlər gənclərə gələcək həyatlarında və fəaliyyətlərində uğurlar arzu ediblər. Tədbirdə Azərbaycan Xalq Cümhuriyyətinin 100 illiyi, Ulu öndər Heydər Əliyevin siyasi fəaliyyəti və YAP-ın tarixi ilə bağlı viktorinalar keçirilib və sonda qaliblər mükafatlandırılıblar.
YAP sıralarına qəbul olunmuş bir qrup gəncə partiyaya üzvlük vəsiqələrinin təqdim olunduğu tədbirdə fəal gənclər rayon təşkilatının fəxri fərmanları və təşəkkürnamələri ilə təltif olunublar. Tədbir bədii hissə ilə davam etdirilib.
NURLAN

Paylaş:

Baxılıb: 1049 dəfə