Deputatlığa namizəd Fatma Yıldırım Bərdə rayonunda şəhid ailələrini ziyarət edib

Bakı:

12 °C

87 %

2 m/s

Əlaqə

AZ RU EN

Ana səhifə / YAP xəbərləri / Deputatlığa namizəd Fatma Yıldırım Bərdə rayonunda şəhid ailələrini ziyarət edib

Deputatlığa namizəd Fatma Yıldırım Bərdə rayonunda şəhid ailələrini ziyarət edib

28.01.2020 [09:53]

Parlament seçkilərində Yeni Azərbaycan Partiyasının 93 saylı Bərdə şəhər seçki dairəsindən deputatlığa namizədi Fatma Yıldırım Bərdə rayonunda şəhid ailələrini ziyarət edib.
Şəhid ailələrinin üzvləri ilə görüşən Fatma Yıldırım Vətənimizin bütövlüyü uğrunda canlarını qurban vermiş oğullarımızla xalqımızın hər zaman qürur duyduğunu bildirib. Onun sözlərinə görə, xalqımız şəhidlərimizi daim böyük ehtiramla anır, onların ailələrinə xüsusi hörmətlə yanaşır.
Fatma Yıldırım deyib ki, dövlətimizin siyasətində şəhid ailələrinə diqqət və qayğı mühüm yer tutur. O, hələ ötən ilin yanvar ayında Azərbaycan Respublikasının Prezidenti İlham Əliyevin və Birinci vitse-prezident Mehriban xanım Əliyevanın Prezident Sarayında şəhid ailələri ilə görüşünü xatırladıb və bu görüşün əhəmiyyətini vurğulayıb. Deputatlığa namizəd söyləyib ki, Ali Baş Komandanımız hər zaman qətiyyətlə bəyan edir ki, Azərbaycan xalqı və dövləti heç vaxt bu işğalla barışmayacaq: “Doğrudan da, ötən illər ərzində həyata keçirilən müstəqil siyasət güclü iqtisadiyyatımızın yaranmasına, beynəlxalq münasibətlər sistemində ölkəmizin yerinin və rolunun möhkəmlənməsinə gətirib çıxarıb ki, bunlar da ərazi bütövlüyümüzün bərpa olunması üçün real geostrateji şərtlər formalaşdırıb”.
Fatma Yıldırım qeyd edib ki, Prezident İlham Əliyevin diqqəti daim şəhid ailələrinin, müharibə veteranlarının və onların ailələrinin üzərində olub. Hər şeydən öncə məhz xalqımızın qürur yeri olan bu ailələrin problemlərinin həlli əsas sosial prioritet kimi müəyyənləşdirilib. Təsadüfi deyil ki, bu vaxta qədər belə vətəndaşlara minlərlə mənzil, avtomobil verilib. Şəhid ailələrinə və müharibə əlillərinə, Milli qəhrəmanlara verilən Prezident təqaüdünün də məbləği ötən dövrdə mütəmadi artırılıb, bu qəbildən olan insanların uşaqlarına aylıq sosial müavinətin verilməsi təmin olunub.
Fevralın 9-da ölkəmizdə parlament seçkilərinin keçiriləcəyini deyən deputatlığa namizəd Yeni Azərbaycan Partiyasının seçki proqramında da şəhid ailələri, Qarabağ müharibəsi əlilləri və veteranları, qaçqın və məcburi köçkünlərimizlə bağlı məsələlərin diqqət mərkəzində olduğunu vurğulayıb. Öz növbəsində şəhid ailələrinin üzvləri dövlətimizin qayğısından razılıqlarını ifadə edib, göstərilən diqqət və qayğıya görə Prezident İlham Əliyevə minnətdarlıqlarını bildiriblər. Şəhid ailələrinin üzvləri qarşıdan gələn parlament seçkilərində cənab İlham Əliyevin rəhbərlik etdiyi Yeni Azərbaycan Partiyasının namizədlərinə səs verəcəklərini qeyd ediblər.

Paylaş:

Baxılıb: 617 dəfə