Azərbaycan dünyanın siyasi arenasında baş verən məsələlərə təsir göstərmək imkanlarına malikdir

Bakı:

25 °C

65 %

8 m/s

AZ RU EN

Ana səhifə / YAP xəbərləri / Azərbaycan dünyanın siyasi arenasında baş verən məsələlərə təsir göstərmək imkanlarına malikdir

Azərbaycan dünyanın siyasi arenasında baş verən məsələlərə təsir göstərmək imkanlarına malikdir

21.06.2022 [12:59]

Ramil Orucov

YAP Gəncə şəhər təşkilatının sədri

Müstəqil Azərbaycan milli maraqlarına xidmət edən bərabərhüquqlu və qarşılıqlı əməkdaşlıq əsasında xoşniyyətli tərəfdaşlar üçün unikal dövlətlər sırasında yer alıb. Ölkə Prezidenti cənab İlham Əliyevin çoxşaxəli, davamlı siyasəti, böyük siyasi iradəsi sayəsində Azərbaycan təhlükəsizlik adasına çevrilib. Ölkəmiz ictimai-siyasi sabitliyi, sosial rifahı, güclü iqtisadiyyatı, uğurlu xarici siyasəti, reallıqlarını ilə beynəlxalq ictimaiyyətin diqqət mərkəzindədir. Ən diqqətçəkən məqam isə Azərbaycanın sivilizasiyalararası əməkdaşlığa imza atıldığı məkana çevrilməsidir.

Prezident cənab İlham Əliyevin himayəsi altında və Nizami Gəncəvi Beynəlxalq Mərkəzinin təşkilatçılığı ilə reallaşan, dünyanın 50-dən çox ölkəsinin nüfuzlu syasi xadimlərinin, həmçinin beynəlxalq təşkilatların nümayəndələrinin iştirak etdiyi Bakı Qlobal Forumunun IX toplantısı bir daha təsdiq etdi ki, Azərbaycan dünyanın siyasi arenasında baş verən məsələlərə təsir göstərmək imkanlarına malikdir.

Bakı Qlobal Forumunun bütün toplantılarında bəşəriyyəti təhdid edən ciddi qlobal problemlərin həllinin, vəziyyətdən çıxış yollarının axtarılması, beynəlxalq birliyə mühüm mesajların ünvanlanması da təsdiq edir ki, Azərbaycanın əsas məqsədi dünyada sülh, dinc birgəyaşayış, ədalətin bərqərar olunması naminə həyata keçirilən fəaliyyətlərə öz töhfələrini verməkdir.

“Qlobal dünya nizamına təhdidlər” mövzusunda beynəlxalq məsələlərin müzakirə edildiyi IX Qlobal Bakı Forumun ilk günündə Prezident cənab İlham Əliyev bəşəriyyəti narahat edən bütün təhdidlərə toxunaraq bəyan etdi ki, dünya nizamının ciddi dəyişikliyə və yeni yanaşmaların işlənib hazırlanmasına ehtiyac var: ”Qarabağ münaqişəsinin həlli, zənnimcə, regionda təhlükəsizlik üçün, regionda sülh üçün bir fürsətdir. Keçən dəfə görüşəndə mən işğal, dağıntı və xalqımızın demək olar ki, otuz il əziyyət çəkdiyi humanitar böhranla bağlı məsələyə geniş şəkildə toxundum. Bunları təkrarlamaq istəmirəm, bunlar artıq məlumdur. Çünki işğaldan azad edilmiş ərazilərdə o qədər ziyarətçilər - siyasətçilər, ictimai xadimlər, jurnalistlər, vətəndaş cəmiyyətinin nümayəndələri olublar, onlar hər şeyi, erməni işğalından sonra hansı dağıntıların qaldığını öz gözləri ilə görüblər.”

Beynəlxalq gündəlikdə duran əsas məsələlərdən olan təhlükəsizlik məsələsinə diqqət çəkən ölkə Prezidenti xüsusi ilə qeyd edib ki, hər bir ölkə təhlükəsizlik tədbirləri ilə bağlı öz töhfəsini verməlidir. Prezident cənab İlham Əliyev bir daha vurğulayıb ki, hazırda qalib ölkə kimi diktə edən tərəf Azərbaycandır. Ermənistan isə ölkəmizin sülh danışıqları üçün irəli sürdüyü 5 prinsipdən ibarət təklifini qəbul etsə də, son zamanlar artıq mövcud olmayan "Dağlıq Qarabağın statusu" məsələsini gündəmə gətirməklə bəhanələr uydurur. Amma bu hal yalnız Ermənistanın ziyanına işləyir və bu, tamamilə səmərəsiz, Ermənistanın özü üçün təhlükəlidir. Çünki artıq Dağlıq Qarabağ mövcud deyil. Dağlıq Qarabağ Muxtar Vilayəti Azərbaycan parlamentinin qərarı ilə 1991-ci ilin sonlarında ləğv edilib.

Ölkə Prezidentimiz qəti şəkildə qeyd edib ki, blzim ərazimizdə belə bir inzibati struktur yoxdur. Bu səbəbdən, dırnaqarası statusla bağlı istənilən istinad yeni qarşıdurmaya gətirib çıxaracaq. Ermənistan hökuməti bunu anlamalı və tarixi yenidən yazmaq cəhdlərindən çəkinməlidir, çünki tarix artıq yazılıb.

Bəli, tarix artıq yazılıb. Qalib Azərbaycan dövləti Ali Komandan, Prezident cənab İlham Əliyevin rəhbərliyi ilə Cənubi Qafqazın lider dövləti kimi artıq beynəlxalq əməkdaşlıq və təhlükəsizliyə mühüm töhfələr verir, dünyanın siyasi arenasında öz dəsti-xətti ilə seçilir.

Paylaş:

Baxılıb: 679 dəfə