YAP Nizami rayon təşkilatında “Xocalı soyqırımı: Əsrin faciəsi” adlı sərgi-tədbir keçirilib

Bakı:

21 °C

64 %

6 m/s

AZ RU EN

Ana səhifə / YAP xəbərləri / YAP Nizami rayon təşkilatında “Xocalı soyqırımı: Əsrin faciəsi” adlı sərgi-tədbir keçirilib

YAP Nizami rayon təşkilatında “Xocalı soyqırımı: Əsrin faciəsi” adlı sərgi-tədbir keçirilib

24.02.2023 [12:07]

Yeni Azərbaycan Partiyası Nizami rayon təşkilatında Xocalı soyqırımının 31-ci ildönümü ilə əlaqədar “Xocalı soyqırımı: Əsrin faciəsi” adlı sərgi-tədbir keçirilib.

Tədbirdən öncə elan edilmiş rəsm müsabiqəsi çərçivəsində Nizami rayon təhsil müəssisələrinin təmsilçilərinin əl işlərindən ibarət sərgiyə baxış keçirilib.

Sonra Xocalı soyqırımı qurbanlarının, eləcə də Azərbaycanın ərazi bütövlüyü uğrunda canından keçmiş şəhidlərimizin əziz xatirəsi birdəqiqəlik sükutla yad edilib.

Sərgi-tədbirdə çıxış edən YAP Nizami rayon təşkilatının sədri Ramil Vəlibəyov, Nizami Bələdiyyəsinin sədri Vüqar Quliyev, Keşlə Bələdiyyəsinin sədri Əlamdar Bafadarov, Nizami Rayon İcra Hakimiyyətinin İctimai-siyasi və humanitar məsələlər şöbəsinin müdiri Əli Axundov və başqaları qeyd ediblər ki, Azərbaycan tarixinin ən dəhşətli səhifələrindən biri olan Xocalı soyqırımından 31 il ötür. Vurğulanıb ki, 1992-ci il fevralın 25-dən 26-na keçən gecə Ermənistan silahlı qüvvələri beynəlxalq hüququn norma və prinsiplərini kobudcasına pozaraq keçmiş sovet ordusunun Xankəndidə yerləşən 366-cı alayının iştirakı ilə Xocalı şəhərinə hücum edib və dinc əhaliyə misli görünməmiş qəddarlıqla divan tutub. Xocalı soyqırımı zamanı 613 nəfər, o cümlədən 106 qadın, 63 uşaq, 70 yaşlı məhz azərbaycanlı olduqlarına görə ağlasığmaz vəhşiliklə qətlə yetirilib. 487 dinc sakin ağır yaralanıb, 1275 dinc sakin əsir götürülüb, 150 nəfərin taleyi isə hələ də məlum deyil. Bu soyqırımı aktı nəticəsində 8 ailə tamamilə məhv edilib, 25 uşaq hər iki valideynini, 130 uşaq isə valideynlərindən birini itirib.

Qeyd edilib ki, ötən 31 il ərzində Azərbaycan dövləti və xalqı Xocalı soyqırımı qurbanlarının xatirəsini böyük ehtiramla anıb. Azərbaycan dövləti ötən illər ərzində erməni millətçilərinin xalqımıza qarşı törətdiyi cinayətlər, o cümlədən, Xocalı soyqırımı haqqında həqiqətlərin dünya ictimaiyyətinə çatdırılması, onun soyqırımı kimi tanıdılması üçün ardıcıl fəaliyyət göstərib. Faciə ilə bağlı həqiqətlərin dünya ictimaiyyətinə çatdırılmasında Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban xanım Əliyeva böyük xidmətlər göstərib. Fondun vitse-prezidenti Leyla xanım Əliyevanın təşəbbüsü ilə “Xocalıya ədalət!” beynəlxalq kampaniyası çərçivəsində də hər il silsilə tədbirlər reallaşdırılır. İndiyə qədər dünyanın 17 ölkəsi parlament səviyyəsində, eləcə də ABŞ-ın 30-dək ştatı, İslam Əməkdaşlıq Təşkilatı Xocalı faciəsini soyqırımı kimi tanıyıb.

Əlavə edilib ki, bu ağır faciə xalqımızı daha da mətinləşdirib, qəhrəman övladlarımızı Vətən və milli dövlətçiliyimiz naminə qətiyyətli və mütəşəkkil mübarizəyə səfərbər edib. İllər sonra 44 günlük müharibədə misilsiz igidlik nümunələri göstərən qəhrəman ordumuz Müzəffər Ali Baş Komandanın rəhbərliyi ilə Xocalı faciəsi qurbanlarının da qisasını alıb, şəhidlərimizin qanı yerdə qalmayıb.

Çıxışlardan sonra rəsm müsabiqəsinin qalibləri mükafatlandırılıblar.

Ümumilikdə 25 müəsisədən 35 şagird və tələbənin iştirak etdiyi müsabiqədə I yerin qalibi 70 saylı orta məktəbin şagirdi Zeynəb Əliyeva, II yerin qalibi Sağlamlıq imkanları məhdud uşaqlar üçün 3 nömrəli Respublika xüsusi internat məktəbinin şagirdi Ulduz Temirova, III yerin qalibləri isə 145 saylı orta məktəbin şagirdi Xalid Süleymanlı və 201 saylı orta məktəbin şagirdi Nihad Məmmədli olub. Eyni zamanda, 31 müsabiqə iştirakçısı həvəsləndirici sertifikatla, eləcə də qalib şagirdlərin müəllimləri, onların təmsilçisi olduqları məktəblərin uşaq birlikləri rəhbərləri də diplomla təltif ediliblər.

Paylaş:

Baxılıb: 412 dəfə