Fəxarət hissi

Bakı:

29 °C

70 %

9 m/s

Əlaqə

AZ RU EN

Ana səhifə / YAP xəbərləri / Fəxarət hissi

Fəxarət hissi

20.10.2023 [14:08]

Prezident İlham Əliyevin ilk dəfə Azərbaycan Respublikasının Prezidenti seçilməsinin 20 illiyində Azərbaycan xalqına qürur dolu anlar, fəxarət dolu bir ömür ərməğan elədi. Müzəffər Ali Baş Komandan İlham Əliyev tarixi torpaqlarımız olan Xankəndidə, Xocalıda və əsgəranda üçrəngli bayrağımızı qaldırmaqla bir əsrlik saxtakarlığa son qoyulduğunu bütün dünyaya nümayiş etdirdi.

20 ildir ki, Azərbaycanın dünya miqyasında tanıdılmasında böyük səylər göstərən Cənab Prezidentimiz dövlətimizin güclənməsi, xalqımızın rifahı üçün yorulmadan çalışır. Böyük tarixi naliyyətlər də məhz o gündən - 15 oktyabr 2003-cü ildən başlayır. Azərbaycan xalqı İlham Əliyevi Prezident seçməklə sülhün, əmin-amanlığın, tərəqqinin, inkişafın, quruculuğun və sabitliyin tərəfində olduğunu, bir daha Ulu Öndərin siyasətinə sədaqətini nümayiş etdirib. Prezident İlham Əliyev 20 il ərzində xalqa layiqincə xidmət edərək, verdiyi vədləri bütünlüklə yerinə yetirdi, Müzəffər Ali Baş Komandan kimi Azərbaycanın ərazi bütövlüyünün, suverenliyinin tam təmin edilməsinə və əsrin qalib ölkəsinə çevrilməsinə nail oldu.

“Düz 20 il bundan əvvəl Azərbaycan xalqı mənə böyük etimad göstərərək prezident seçkilərində Prezident vəzifəsinə seçmişdir. O vaxt doğma xalqıma müraciət edərək söz vermişdim ki, Azərbaycan xalqının və Azərbaycan dövlətinin milli maraqlarını müdafiə edəcəyəm, Azərbaycanın ərazi bütövlüyünü qoruyacağam. Konstitusiyaya və “Qurani-Kərim”ə əl basaraq and içmişdim. Şadam ki, son 20 il ərzində verdiyim bütün vədlər, qarşıma qoyduğum bütün vəzifələr icra edildi.

Bu gün bütün Azərbaycan xalqı ürəkdən sevinir, bütün Azərbaycan xalqı “Allaha şükür” deyir. Bu günü biz 30 ildən çox gözləmişdik. Ancaq hər birimiz, əminəm və inanırdıq ki, bu gün gələcək.

İyirmi il bundan əvvəl Prezident kimi öz vəzifə borcumu yerinə yetirməyə başlayanda qarşıma bir nömrəli vəzifə qoymuşdum ki, Azərbaycan Bayrağı o vaxt işğal altında olan bütün ərazilərdə, bütün torpaqlarda, bütün şəhər və kəndlərdə qaldırılsın. Hər gün, hər saat biz bu müqəddəs məqsədə doğru gedirdik. Hər gün biz bu müqəddəs anı yaxınlaşdırırdıq və dəfələrlə deyirdim ki, hər birimiz, hərə öz yerində öz işi ilə bu günü yaxınlaşdırmalıdır-deyə doğma xalqına müraciətlə çıxış edən cənab Prezident doğma xalqına yaşatdığı qürur hissini özü də xalqla birlikdə yaşayaraq tarixin qızıl səhifəsini öz əlləri ilə yazmış oldu.

Cənab Prezident çıxışında xatırlatdı ki, yüz il bundan əvvəl Azərbaycan torpağında heç bir tarixi, coğrafi və siyasi əsası olmayan Dağlıq Qarabağ Muxtar Vilayəti yaradılmışdı. Cənab Prezident çıxışında deyib: "Bu, 100 ilin tarixidir. Görün, bu 100 il ərzində xalqımız nə qədər əzab çəkib, tarix bizi nə qədər sınağa çəkib. Əyilmədik, sınmadıq, o boyda böyük faciə ilə təkbaşına üz-üzə qalmışdıq, heç kim bizim yanımızda durmadı. Torpaqlarımız işğal altına düşəndə heç bir ölkə arxamızda dayanmadı, heç mənəvi dəstək də göstərmədilər". Ötən dövr ərzində Azərbaycan xalqı bir çox faciələrlə üzləşdi, bir çox mürəkkəb situasiyalar qarşısında təkbaşına mübarizə aparmalı oldu. Tarixdən dərs çıxarmalı və tarixi düzgün qiymətləndirməliyik.”

Bu gün Xankəndidə dalğalanan üçrəngli bayrağımız hər birimiz üçün xoşbəxtlik, fərəh, qürur, ləyaqət mənbəyidir:

"Bir vaxtlar Xankəndidə oturub özünü müxtəlif vəzifələrə təyin edən Bakıda çay içəcəyini deyən təlxəklər indi Bakıda istintaq təcridxansında çay içirlər. Bir vaxtlar kinayə ilə Azərbaycan, Bayrağını Xankəndidə qaldırmaq istəyirsə səfirlik açsın deyən təlxək "xarici işlər naziri" də başqa bir təcridxanada çay içir".

Amalı azad, qüdrətli, bütöv Azərbaycan uğrunda olan ölkə başçımız 44 Günlük II Vətən Savaşı zamanı düşmənə yerini göstərdi, antiteror əməliyyatlarının həyata keçirilməsi ilə Azərbaycanımızı bütövləşdirdi. Bu gün çox böyük qürur və şərəflə qalib və əzmkar dövlət olaraq Azərbaycan bütün dünyaya tanıdıldı. Kiçikdən böyüyədək hər kəs harada yaşamasından asılı olmayaraq başı dik, alnı açıqdır. Bu böyük tarixin səhifələrini öz əlləri ilə yazan Müzəffər Ali Baş Komandan İlham Əliyev fəxarət hissi ilə dedi: “Bu gün burada olmağımızın əsas səbəbkarı Azərbaycan xalqıdır, Azərbaycan övladıdır. Elə bir gənc nəsil yetişdirdik ki, Vətən, torpaq uğrunda ölümə getməyə hazır idi və ölümə də gedirdi. Allah bütün şəhidlərimizə rəhmət eləsin. Biz onların ruhu qarşısında baş əyirik. Biz Azərbaycan xalqı olaraq onlara əbədi borcluyuq. Həm üç il bundan əvvəl, həm son üç il ərzində, həm də sentyabr ayında keçirilmiş antiterror əməliyyatı zamanı Azərbaycan əsgəri, zabiti əsl qəhrəmanlıq, vətənpərvərlik, fədakarlıq göstərmişdir. Biz Ordumuzla, Silahlı Qüvvələrimizlə fəxr edirik, onlar bizim qürur mənbəyimizdir. Təkcə Azərbaycan vətəndaşları yox, əminəm ki, dünyada yaşayan on milyonlarla azərbaycanlı Azərbaycan əsgəri və zabiti ilə, Azərbaycan dövləti ilə haqlı olaraq fəxr edir.”

Azərbaycan xalqı da öz qalib sərkərdəsi, müdrik rəhbəri cənab İlham Əliyevlə, onun komandanlığı ilə qələbələr qazanan ordusu ilə fəxr edir, qəhrəmanlıq səlnaməsi yazaraq Şəhadətə ucalan Şəhidlərimizin ruhu qarşısında baş əyir, qazilərimizə Uca Yaradandan şəfalar diləyir.

Rüstəm Nağıyev,

YAP Gədəbəy rayon təşkilatının sədri

Paylaş:

Baxılıb: 487 dəfə