Türkiyə regionda baş verən dəyişiklikləri yaxından izləyir
Türkiyənin Milli müdafiə naziri Hulusi Akar ölkəsinin Azərbaycana dəstəyinin davam edəcəyi barədə növbəti açıqlama ilə çıxış edib.
Bu barədə yeniazerbaycan.com Türkiyənin “İhlas” xəbər agentliyinə istinadən bildirir.
Türkiyə Milli Müdafiə Universitetinin nəzdindəki Dəniz Hərbi məktəbinin 2021-2022 tədris ilinin açılış mərasimində çıxış edən H.Akar regionda hərbi və siyasi sahələrdə baş verən ciddi dəyişikliklər və yenilikləri yaxından izlədiklərini, Türkiyəyə yönəlmiş hər cür risk, təhdid və təhlükəyə qarşı bütün lazımi tədbirlərin alındığını ifadə edib.
Prezident Rəcəb Tayyib Ərdoğanın rəhbərliyi altında Türkiyənin beynəlxalq aləmdə aparıcı mövqeyə çıxdığını vurğulayan H.Akar Türkiyənin təsir və maraq dairəsinin də genişləndiyini söyləyib.
Sözügedən çıxşında H.Akar, həmçinin Türkiyənin azərbaycanlı və liviyalı qardaşlarının yanında olmağa, onların haqq və ədalət naminə yürütdükləri siyasətlərində dəstək olmağa davam edəcəyini də bəyan edib.