Qızılcanı digər xəstəliklərdən fərqləndirən əsas faktor mərhələli səpkilərin olmasıdır.
Bunu Səhiyyə Nazirliyi K.Y.Fərəcova adına Elmi- Tədqiqat Pediatriya İnstitutunun infeksionisti Səbinə Cəfərova qızılca ilə bağlı danışarkən deyib.
Onun sözlərinə görə, səpkidən əvvəl yanaqda, damaqların selikli qişasında ağ ləkələr əmələ gəlir və bu əlamət ancaq qızılcaya məxsusdur: “Ardınca mərhələli səpkilər başlayır. Belə ki, ilk növbədə səpki üzdə, ardınca qulaq arxasında, qollarda, sinə və aşağı ətraflara yayılır. Piqmentasiya dövrü də səpki ardıcıllığı kimi baş verir”.
“Qızılcaya yoluxan şəxslərdə 1 həftə ərzində sağalma gedir. Öskürən uşaqlarda proses 10 gün çəkə bilər. Həmçinin karantin müddəti adətən 5 gün, ağırlaşma olanda isə 10 gün çəkə bilər. Bağça və ya azyaşlı məktəblilər 17-21 gün kollektivə buraxılmamalıdır”, - infeksionist əlavə edib.
S.Cəfərova eyni zamanda qızılcaya qarşı ən effektiv üsulun peyvəndləmə olduğunu diqqətə çatdırıb: “Peyvənd iki doza – 1 və 6 yaşlarında vurulmaldıır”.