Hər il ölkəmizdə yüzlərlə gənc təhsil almaq üçün xarici ölkələrə üz tutur. Bəzən böyük arzularla çıxdıqları bu yol mənfi nəticələrlə sonlanır. Bir çox gənclər universitetə daxil olur, imtahanlarda iştirak edib diplom alandan sonra, diplomların tanınmaması problemi ilə üzləşirlər.
Təhsil üzrə ekspert Elçin Əfəndiyev "Yeni Azərbaycan"- a açıqlamasında bildirir ki, ölkəmizdə diplomun keçərli sayılması üçün məzunlar birinci növbədə qanuni əsasla qəbul olunduğları ixtisaslar üzrə biliklərə sahib olmalıdırlar: "Hansı xarici ölkədə təhsil alırsa, həmin ölkənin biliyi üzrə təhsili yoxlanılmalıdır.
Təhsil alan şəxs həmişə hazırlıqlı olmalıdır. Eyni zamanda təhsil aldığı universitet reytinqdə yer qazanmalıdır. İxtisas seçmək üçün ölkəmizdə müəyyən agentliklər fəaliyyət göstərir ki, onların seçimində də maksimum diqqətli olmaq məsləhət görülür".
Qeyd edək ki, həmin qurumlar xaricdə təhsil alan şəxslərin göndərdiyi sorğunu yoxlayır və uyğun ölkələrə istiqamətləndirir.
Ekspert açıqlamasında bildirir ki, "xaricdə təhsil" adı altında vətəndaşı aldadaraq fərqli-fərqli ölkələrə göndərilən və yekunda da diplomları tanınmayan kifayət qədər tələbələr var. Bununla bağlı da xüsusilə diqqətli olunmalıdır. Hər il müvafiq dövr ərzində Təhsildə Keyfiyyət Təminatı Agentliyinə diplomların tanınması ilə bağlı sorğular göndərilir. Onların demək olar ki, yarıdan çoxunun diplomu tanınmır və bu barədə statistik məlumatlar da həmin agentlik tərəfindən verilir. Ona görə də bu vəziyyətlə üzləşməmək üçün təhsil almaq istəyən şəxslər araşdırmaçı olmalı, bu günü təhlil etməli, mütəxəssis rəyi almalıdırlar".
Havar Şəfiyeva