Euronews: Azərbaycan və BƏƏ bərpa olunan enerji layihələri həyata keçirir

Bakı:

0 °C

80 %

10 m/s

Əlaqə

AZ RU EN

Ana səhifə / Xəbər lenti / Euronews: Azərbaycan və BƏƏ bərpa olunan enerji layihələri həyata keçirir

Euronews: Azərbaycan və BƏƏ bərpa olunan enerji layihələri həyata keçirir

06.06.2024 [11:39]

“Euronews” telekenalının saytında Azərbaycanın və Birləşmiş Ərəb Əmirliklərinin (BƏƏ) ölkəmizdə ümumi gücü 1 qiqavat olan üç genişmiqyaslı Günəş və külək enerjisi layihələrinin həyata keçirilməsi istiqamətində birgə əməkdaşlığından bəhs edən məqalə yayımlanıb.

AZƏRTAC xəbər verir ki, məqalədə layihələrin təməlqoyma mərasiminin iyunun 4-də keçirilən Bakı Enerji Forumu çərçivəsində baş tutduğu bildirilib. Bildirilir ki, Prezident İlham Əliyev layihələrin əhəmiyyətini vurğulayaraq BƏƏ-nin “Masdar” şirkətinin bərpaolunan enerji sahəsində Azərbaycanın strateji tərəfdaşı olduğunu xüsusi qeyd edib.

Yazıda bildirilir ki, layihələrə Biləsuvarda 445 MVt gücündə Günəş elektrik stansiyası, Neftçalada 315 MVt gücündə Günəş elektrik stansiyası, Abşeron-Qaradağda 240 MVt gücündə külək elektrik stansiyası daxildir. Stansiyaların ümumi illik orta enerji istehsalı 2 milyard 3025 milyon kilovat-saat elektrik enerjisi təşkil edəcək ki, bu da illik 496 milyon kubmetr təbii qazın qənaətinə və 943 min tondan çox karbon qazı emissiyasının qarşısının alınmasına səbəb olacaq.

Məqalədə Birləşmiş Ərəb Əmirliklərinin sənaye və qabaqcıl texnologiyalar naziri, “Masdar” şirkətinin rəhbəri və COP28-in prezidenti Sultan Əhməd Əl-Cabirin fikirləri də əks etdirilib: "Biz Azərbaycanla bərpaolunan enerji potensialının genişlənməsi sahəsində tərəfdaş olduğumuz üçün qürur duyuruq. Azərbaycanın enerjinin şaxələndirilməsinə nail olmaq, yeni sənayelər, yeni iş yerləri və davamlı iqtisadi inkişaf yaratmasını dəstəkləyirik”.

Sultan Əhməd Əl-Cabir nizamlı və müstəqil enerji keçidini təmin etmək üçün belə tərəfdaşlıqların önəminə toxunub və qeyd edib ki, BƏƏ və Azərbaycan 2030-cu ilə qədər bərpaolunan enerji potensialının üç dəfə artırılmasını qarşısına məqsəd qoyub.

Məqalədə Prezident İlham Əliyevin “yaşıl keçid”lə bağlı fikirlərindən də sitat gətirilib: "Bu, həqiqətən göstərir ki, ölkə ənənəvi enerjidən əldə etdiyi gəlirləri hazırda bərpaolunan enerjiyə yönəldir. COP29-a ev sahibliyi edəcək ölkə kimi vəzifəmiz yaşıl keçidin ilk cərgələrindən olan ölkələr sırasında olmaqdır”.

Bildirilib ki, Bakı Enerji Həftəsi dünya enerji sektorunun ən əhəmiyyətli hadisələrindən biridir və 37 ölkədən 300-dən artıq şirkət enerji həftəsində iştirak edib. Tədbir çərçivəsində daha təmiz enerji həllərinə keçmək, süni intellektdə irəliləyişlər, eləcə də iqlimin müsbət davamlı inkişafının sürətləndirilməsinə kömək məqsədilə inkişaf etməkdə olan ölkələrdə iqtisadi artımın təmini ilə bağlı çağırışlar olub.

Paylaş:

Baxılıb: 473 dəfə