Azərbaycan Türk Birliyi üçün aparıcı faktora çevrilir

Bakı:

1 °C

75 %

12 m/s

Əlaqə

AZ RU EN

Ana səhifə / Xəbər lenti / Azərbaycan Türk Birliyi üçün aparıcı faktora çevrilir

Azərbaycan Türk Birliyi üçün aparıcı faktora çevrilir

10.06.2024 [22:29]

Bu gün Azərbaycan türkdilli ölkələr arasında iqtisadi, siyasi və mədəni baxımından sözün əsl mənasında körpü rolunu oynayır. Dövlət başçımızın son illər ərzində türk dövlətlərinə ardıcıl səfərləri və türkdilli ölkə liderlərinin də Azərbaycana qarşılıqlı səfərləri Türk dünyası üzvləri ilə əlaqələrimizin genişlənməsini və strateji xarakter almasını daha da sürətləndirir. Prezident İlham Əliyev cari ilin 6 iyun tarixində TÜRKPA-nın növbəti plenar iclasının iştirakçılarının qəbulu zamanı bildirib ki, son illər ərzində Türk Dövlətləri Təşkilatı xətti ilə aparılan işlər birliyimizi daha da gücləndirir.

Sitat: “Bildiyiniz kimi, mənim təşəbbüsümlə bir aydan sonra Şuşada Türk Dövlətləri Təşkilatının qeyri-rəsmi Zirvə görüşü keçiriləcək. Mən hesab etdim ki, ildə bir dəfə Zirvə görüşünün keçirilməsi kifayət etməz. Çünki həm sürətli, yəni davamlı təmaslara ehtiyac var, eyni zamanda, hər bir Zirvə görüşü birliyimizin gücləndirilməsinə istiqamətlənmiş növbəti addım olur. Çox şadam və həmkarlarıma minnətdaram ki, onlar bu təşəbbüsü dəstəkləyiblər və düz bir aydan sonra Şuşa şəhərində qeyri-rəsmi Zirvə görüşü keçiriləcək. O görüşün əsas mövzuları nəqliyyat və iqlimlə bağlı olacaq. Bu da təbiidir. Çünki bu gün nəqliyyat əlaqələrinin qurulması və genişləndirilməsi Türk dünyasının birləşməsi ilə sıx bağlı olan prosesdir. Orta Dəhlizin fəaliyyətə başlaması və yükdaşımaların artırılması göz önündə olan məsələlərdir. Burada Türk Dövlətləri Təşkilatına üzv olan bütün ölkələr birgə fəaliyyət göstərir. Mən hesab etdim ki, indiki zəmanədə Orta Dəhlizin potensialına dünyada daha böyük ehtiyac var. Biz bu mövzu ilə bağlı, gələcək addımlarımızla bağlı geniş fikir mübadiləsi aparmalıyıq."

Beləliklə, bu gün Qarabağ Türk dünyasını birləşdirən mərkəzə çevrilir. Dövlət başçısı bu məqamı xüsusi olaraq qonaqların diqqətinə çatdırdı ki, Liderlərin Şuşadakı Zirvə görüşü bu birliyi daha da möhkəmləndirəcək.

Hər kəsə məlumdur ki, hazırda Azərbaycan iqtisadi baxımdan türkdilli ölkələr arasında mühüm loqistika qovşağı və iqtisadi lokomotiv funksiyasını icra edir. Bu, ilk növbədə enerji imkanlarımız və neft-qaz ehtiyatlarmızla sıx bağlıdır. Bu sadaladıqlarımız həm də türkdilli ölkələrlə möhkəm iqtisadi tərəfdaşlığımız üçün mühüm zəmindir. Azərbaycan türk dövlətləri ilə həm energetika, sənaye-metallurgiya, nəqliyyat-logistika və digər sahələrdə sıx əməkdaşlıq edir və iri layihələr həyata keçirilir. İşğaldan azad edilmiş ərazilərin qeyd olunan sahələrdə böyük potensial var ki, bu da Azərbaycanla türk dövlətləri arasında yeni layihələrin reallaşmasına zəmin yaradır. Eyni zamanda azad edilmiş torpaqlarda qardaş ölkələrin təşəbbüsü və maliyyə dəstəyi ilə artıq bir məktəb və bir incəsənət mərkəzi fəaliyyətə başlayıb. Bunlar Özbəkistan və Qazaxıstan tərəfindən inşa edilib. Bir məktəbin təməlini isə bu yaxınlarda Qırğızıstan Prezidentinin iştirakı ilə Ağdam rayonunda qoyulub. Cəbrayıl rayonundakı bir məntəqədə isə Macarıstanın maliyyə dəstəyi ilə bir məktəb inşa ediləcək.

Bundan başqa, azad edilmiş ərazilərdə bu gün geniş yol-nəqliyyat infrastrukturu yaradılır və bu nəhəng layihələrin icrasında Türkiyədən olan şirkətlər də fəal iştirak edirlər. Şuşaya yeni çəkilən avtomagistralda 7 tunelin, 9 viadukun, bir çox körpülərin inşa edildiyini və podratçıların əksəriyyəti Türkiyə şirkətləridir. Horadiz-Ağbənd dəmir yolunun podratçısı da Türkiyə şirkətləridir.

Görünən odur ki, Azərbaycan bu gün türkdilli ölkələr arasında etibarlı əlaqə və tərəfdaşlıq qurmaq baxımından öz üzərinə düşən vəzifəni çox layiqincə yerinə yetirir. Həm iqtisadi baxımdan, həm də siyasi baxımdan. Şuşada keçiriləcək qeyri-rəsmi zirvə toplantısında türk dövlətləri liderlərinin görüşləri və qəbul ediləcək qərarlar çox önəmli olacaq. Bütün bunlar Azərbaycanın, Türkiyənin və başqa türk dövlətlərinin birgə əməyi sayəsində gerçəkləşir. Artıq Türk Dövlətləri Təşkilatı müstəqil böyük bir gücə çevrilir. Bu isə həm dünya siyasətində, həm də bölgədəki proseslərdə türkdilli ölkələr faktorunu önəmli aktora çevirir. Unutmayaq ki, Azərbaycan Prezidentinin Türk dünyası ilə bağlı söylədikləri əbədiyyən mövcud olacaq Türk dünyasının yeni yol xəritəsidir. Prezident İlham Əliyev çıxışında Ermənistanla bağlı məsələləri bir daha gündəliyə gətirdi və aydın olaraq bildirdi ki, əgər Ermənistan və ondan ötrü zəng edib xahiş edən dövlətlər regionda sülh istəyirlərsə, Ermənistan Konstitusiyasında mütləq dəyişiklik etməlidir. Ermənistan Konstitusiyasından Azərbaycana qarşı olan əsassız ərazi iddiaları çıxarılmalıdır. Revanşizmə son qoyulmalıdır. Ermənistan Konstitusiyasındakı dəyişikliklər regionda gələcəkdə möhkəm sülhün təməlini qoyar.

Beləliklə, Prezident İlham Əliyevin görüşdə söylədikləri fikirlər prinsipial əhəmiyyət daşıyır. Həm regionumuzun, həm də Türk dünyasının gələcəyinə işıq tutur.

Həbib Misirov

YAP Kəlbəcər rayon təşkilatının sədri.

Paylaş:

Baxılıb: 596 dəfə