Parlamentin Ailə, qadın və uşaq məsələləri komitəsinin ilk iclası keçirilib

Bakı:

23 °C

59 %

8 m/s

Əlaqə

AZ RU EN

Ana səhifə / Xəbər lenti / Parlamentin Ailə, qadın və uşaq məsələləri komitəsinin ilk iclası keçirilib

Parlamentin Ailə, qadın və uşaq məsələləri komitəsinin ilk iclası keçirilib

03.10.2024 [12:40]

Oktyabrın 3-də Milli Məclisin Ailə, qadın və uşaq məsələləri komitəsinin 2024-cü ilin payız sessiyasında ilk iclası keçirilib.

AZƏRTAC xəbər verir ki, iclasın gündəliyinə 4 məsələnin daxil edildiyini diqqətə çatdıran komitə sədri Hicran Hüseynova gündəliyin birinci məsələsi - Ailə, qadın və uşaq məsələləri komitəsinin 2024-cü ilin payız sessiyası üçün iş planının layihəsi haqqında ətraflı danışıb. Bildirilib ki, sənədin hazırlanması zamanı müvafiq sahələrin tələbləri, sosial məsələlər, mövcud problemlər və prioritetlər nəzərə alınıb. Həmçinin ailə, qadın və uşaq hüquqlarının qorunması, gender bərabərliyinin təmin edilməsi, uşaq hüquqlarının inkişafı və sosial müdafiə məsələlərinin ön planda olacağı vurğulanıb.

H.Hüseynova komitənin gələcək fəaliyyətinin bu istiqamətlərdə daha da gücləndiriləcəyini qeyd edərək, müvafiq təşkilatlarla əməkdaşlığın artırılmasının əhəmiyyətini diqqətə çatdırıb.

İş planının müzakirəsində iştirak edən komitə üzvləri öz təkliflərini irəli sürüblər. Həmçinin bu il həyata keçirilmiş layihələrdən alınan təcrübələrin nəzərə alınması və gələcək fəaliyyətlərə daxil edilməsi haqqında da fikirlər səsləndirilib.

Sonra gündəliyə daxil olan digər məsələlərə də baxılıb. Belə ki, komitə üzvləri “Uşaq hüquqları haqqında” Qanunda, “Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında” Qanunda dəyişiklik edilməsi haqqında qanun layihələrini birinci oxunuşda müzakirə ediblər. Müzakirələr zamanı qanun layihələrinin uşaqların hüquqlarının daha da gücləndirilməsi, onların sosial müdafiəsinin artırılması və hüquqi mühitin yaxşılaşdırılması məqsədini daşıdığı vurğulanıb. Komitə üzvləri, bu dəyişikliklərin tətbiqinin valideyn himayəsindən məhrum olan uşaqlara daha çox dəstək verəcəyini, onların həyat şəraitini yaxşılaşdıracağını və hüquqlarını qoruyacağını qeyd ediblər.

Həmçinin komitə üzvləri layihələrə əlavə təkliflər irəli sürərək, uşaqların cəmiyyətə inteqrasiyasını təmin etmək üçün müəyyən tədbirlərin nəzərə alınmasını tövsiyə ediblər.

Sonda gündəliyə daxil olan cari məsələlər barədə danışılıb. Komitə üzvləri son dövrlərdə ailə, qadın və uşaq sahəsində ortaya çıxan aktual problemlərə toxunaraq, onların həlli üçün mümkün tədbirləri müzakirə ediblər.

Müzakirələr zamanı qadınların iqtisadi və sosial müdafiəsi, uşaqların təhsili və psixoloji dəstəyi, eləcə də ailə içi münaqişələrin azaldılması üçün müxtəlif proqramların həyata keçirilməsi məsələləri ön plana çıxıb. Bu məsələlərin həlli üçün dövlət orqanları, qeyri-hökumət təşkilatları və ictimaiyyətlə daha sıx əməkdaşlığın vacibliyi vurğulanıb.

İclas cari məsələlərin müzakirəsi ilə bağlı fikirlərin bildirilməsi və gələcək addımların planlaşdırılması, həmçinin 2024-cü ilin payız sessiyası üçün iş planının təsdiq edilməsi ilə yekunlaşıb.

Paylaş:

Baxılıb: 580 dəfə