ASAP tərəfindən Gənclər Günü münasibətilə silsilə tədbirlər təşkil olunub

Bakı:

23 °C

59 %

8 m/s

Əlaqə

AZ RU EN

Ana səhifə / Xəbər lenti / ASAP tərəfindən Gənclər Günü münasibətilə silsilə tədbirlər təşkil olunub

ASAP tərəfindən Gənclər Günü münasibətilə silsilə tədbirlər təşkil olunub

02.02.2025 [21:25]

Gənclər Fondunun dəstəyi ilə Azərbaycanlı Tələbələr və Məzunlar Platforması (ASAP) 2 Fevral - Azərbaycan Gəncləri Günü ilə əlaqədar silsilə tədbirlər həyata keçirib.

ASAP-dan AZƏRTAC-a bildirilib ki, Azərbaycanın Almaniyadakı səfirliyinin dəstəyi, Almaniya Azərbaycan Mədəniyyət Mərkəzi və ASAP-ın birgə təşkilatçılığı ilə Almaniyada yaşayan azərbaycanlı tələbə və məzunların şəbəkələşmə görüşü baş tutub. Görüş zamanı gənclər il ərzində göstərdikləri fəaliyyət və gələcək prioritetlər barədə danışıblar. Azərbaycanın Almaniyadakı səfiri Nəsimi Ağayev çıxış edərək Azərbaycan Gəncləri Gününün yaranma tarixi və ölkəmizdə əsası Ulu Öndər Heydər Əliyev tərəfindən qoyulan gənclər siyasətinin uğurları haqqında məlumat verib. Eyni zamanda, Almaniyada yaşayan azərbaycanlı gənclərin ölkəmizin mədəni irsinin təbliğində fəal iştirakı və gələcəkdə bu istiqamətdə icrası nəzərdə tutulan fəaliyyətlərlə bağlı müzakirələr aparılıb.

Gənclər Fondunun dəstəyi, ASAP-ın təşkilatçılığı ilə Azərbaycan Gəncləri Gününə həsr olunmuş şəbəkələşmə tədbiri də keçirilib. ASAP-ın İdarə Heyəti, məzun birlikləri və xarici nümayəndəliklərin üzvlərinin iştirakı ilə baş tutan tədbir zamanı gənclər müxtəlif şəbəkələşmə fəaliyyətləri vasitəsilə bir-birlərini yaxından tanımaq, xaricdə təhsil zamanı qazandıqları təcrübələri bölüşmək imkanı əldə ediblər. Tədbirdə çıxış edən ASAP-ın İdarə Heyətinin sədri Milana Mir Feyzullazadə, ASAP-ın icraçı direktoru Sevda Mansurova və Gənclər Fondunun Gənclər təşkilatları ilə iş şöbəsinin müdiri Orduxan Qəhrəmanzadə azərbaycanlı gənclərin beynəlxalq arenada layiqli təmsilçiliyi, dövlətin gənclərə olan qayğısı və bu istiqamətdə həyata keçirilən uğurlu layihələr barədə danışıblar. Qeyd olunub ki, təməli Ulu Öndər Heydər Əliyev tərəfindən qoyulan dövlət gənclər siyasətinin Prezident İlham Əliyev tərəfindən uğurla davam etdirilməsi nəticəsində bu gün Azərbaycan gəncləri cəmiyyətin bütün sahələrində, eləcə də beynəlxalq arenada özlərini doğruldurlar.

Azərbaycan Gəncləri Günü ilə əlaqədar, həmçinin fəal ASAP nümayəndəliklərinin onlayn görüşü də baş tutub. 15 fərqli ölkədə fəaliyyət göstərən ASAP nümayəndəliklərinin üzvlərinin iştirak etdiyi tədbirdə gənclər təhsil aldıqları ölkələrdəki sosial fəaliyyətləri haqqında danışıb, bilik və təcrübə mübadiləsi aparıblar. Qeyd olunub ki, bu cür görüşlərin mütəmadi olaraq keçirilməsi nümayəndəlik üzvləri arasındakı əlaqələrin gücləndirilməsi və birgə əməkdaşlıq imkanlarının genişləndirilməsi baxımından mühüm əhəmiyyət kəsb edir.

Bundan başqa, İcbari Tibbi Sığorta üzrə Dövlət Agentliyi, Azərbaycan Respublikası Gənclər Təşkilatları Milli Şurası (ARGTMŞ) və Azərbaycanlı Tələbələr və Məzunlar Platformasının (ASAP) birgə təşkilatçılığı ilə 2 Fevral - Azərbaycan Gəncləri Gününə həsr olunmuş icbari tibbi sığorta ilə bağlı maarifləndirici təlim keçirilib. Təlim zamanı gənclər icbari tibbi sığortanın əhatə dairəsi, faydaları və müraciət prosedurları barədə məlumat əldə ediblər. Agentliyin nümayəndəsi icbari tibbi sığorta və ondan istifadə qaydaları, eləcə də düzgün qidalanma, fiziki fəaliyyət, stresslə mübarizə və psixoloji sağlamlığın əhəmiyyətindən danışıb. Tədbirin sonunda gənclərin mövzu ətrafında sualları cavablandırılıb.

Əlavə olaraq, Azərbaycan Gəncləri Gününə həsr edilmiş videolayihə hazırlanıb. Videoda müxtəlif ölkələrdə fəaliyyət göstərən ASAP nümayəndəliklərinin üzvləri iştirak ediblər. Layihə çərçivəsində gənclər bu əlamətdar günə dair fikirlərini və təbrik mesajlarını bölüşüblər.

Paylaş:

Baxılıb: 578 dəfə