30 ildə 5 milyon...

Bakı:

24 °C

63 %

1 m/s

Əlaqə

AZ RU EN

Ana səhifə / Xəbər lenti / 30 ildə 5 milyon...

30 ildə 5 milyon...

15.04.2022 [10:09]

Minalanmış torpaq sahəsinə görə Azərbaycan birinci yerdə ola bilər

Günel ABBAS

Vətən müharibəsində qazanılan Zəfərdən sonra Azərbaycanın qarşısında dayanan prioritet məsələlərdən biri ermənilərin viran qoyduğu ərazilərimizin bərpası idi. Azərbaycan azadolunma prosesinin ilk günlərindən ərazilərdə bərpa və quruculuq işlərinə başlamışdı, proses qələbədən sonra daha da sürətləndi. Prezident İlham Əliyevin tapşırığına uyğun olaraq işğaldan azad edilmiş ərazilərdə bərpa və quruculuq işləri sistemli şəkildə və sürətlə davam etdirilir.

Dövlət başçısı aprelin 13-də keçirilən müşavirədə bu ilin sonuna qədər və növbəti bir-iki il ərzində görüləcək işlərlə bağlı öz tapşırıqlarını bir daha vurğulayıb. Bildirib ki, əsas məsələ şəhərlərin Baş planları ilə bağlıdır. Onun sözlərinə görə, bərpa və yenidənqurma işlərinə başlamaq üçün isə ən vacib məsələ ərazilərin minalardan təmizlənməsi və təhlükəsizliyin təmin edilməsidir. Prezidentin də qeyd etdiyi kimi minalardan təmizləmə hazırda ölkəmiz üçün prioritet məsələdir. Müşavirədə minalardan təmizlənmə prosesini sürətləndirmək üçün bu il dövlət büdcəsində 100 milyon manata yaxın vəsait nəzərdə tutulduğu da diqqətə çatdırılıb. Qeyd edilib ki, bu məsələ həll olunmadan vətəndaşları o bölgələrə yerləşdirmək mümkün deyil.

Ölkə başçısı yeni texnikanın alınmasının təmin edildiyini, o cümlədən ən müasir texnika, dronlar və digər müasir cihazların alındığını da vurğulayıb. Bildirib ki, burada, beynəlxalq mütəxəssislərin dəstəyinə böyük ehtiyac var: “Bizim indi üç qurumumuz - ANAMA, Müdafiə Nazirliyinin bölmələri və Fövqəladə Hallar Nazirliyi minatəmizləmə işləri ilə məşğuldurlar. Əlbəttə ki, bir müddət bundan əvvəl yerli şirkətlərin buraya cəlb olunması məsələsi müzakirə edilmişdi, bildiyimə görə, yerli şirkətlər də bu işlərə qoşulur. Çünki bu təşəbbüs həm sahibkarlığın inkişafına təkan verəcək, - əfsuslar olsun ki, ölkəmizdə minatəmizləmə prosesi uzunmüddətli olacaq, - eyni zamanda, yerli şirkətlər burada təcrübə toplayıb öz xidmətlərini təqdim edə bilərlər. Xarici şirkətlərə gəldikdə, onların təklifi, əlbəttə ki, bu günə qədər qiymət baxımından bizim üçün o qədər də məqbul olmayıb. Çünki yerli şirkətlərin verdikləri qiymətlə xarici şirkətlərin verdikləri qiymətlər arasında dəfələrlə fərq var. Ona görə mən hesab edirəm ki, üç dövlət qurumu ilə bərabər, yerli şirkətlər nə qədər çox yaransa, o qədər yaxşıdır. Bir də ki, dövlət xətti ilə ən müasir maşın və mexanizmlərin alınması da təmin edilməlidir”, - deyə prezident vurğulayıb.

Ötən gün verilən məlumata görə, artıq minadantəmizləmə işlərinin sürətləndirilməsi işlərində süni intellektdən istifadə edilir. Nəzərə alsaq ki, Qarabağda minaların sayı rekord həddədir, yeni texnikalardan istifadə olduqca əhəmiyyətlidir.

Qeyd edək ki, mütəxəssislərin hesablamalarına görə, ermənilər 30 il ərzində Qarabağ ərazisində 4-5 milyon mina basdırıb. Minalanmış ərazilərin ümumi sahəsinin isə 350 kv. km-dən 830 kv. km-dək ola biləcəyi deyilir. Hətta bu rəqəmlərə görə, gələcəkdə aparılacaq statistika zamanı Azərbaycan minalanmış torpaq sahəsinə görə birinci yerdə olacaq. Belə ki, Mina və Kaset Sursatlarının Müşahidə Mərkəzinin 2018-ci il hesabatına görə, Türkiyə 164 kv.km ilə dünyada ən çox minalanmış əraziyə malik üçüncü ölkə olub.

Paylaş:

Baxılıb: 742 dəfə