Leyla Əliyevanın təşəbbüsü ilə Moskvada iftar süfrəsi təşkil edilib

Bakı:

13 °C

76 %

9 m/s

Əlaqə

AZ RU EN

Ana səhifə / Xəbər lenti / Leyla Əliyevanın təşəbbüsü ilə Moskvada iftar süfrəsi təşkil edilib

Leyla Əliyevanın təşəbbüsü ilə Moskvada iftar süfrəsi təşkil edilib

22.04.2022 [15:27]

Heydər Əliyev Fondunun vitse-prezidenti Leyla Əliyevanın təşəbbüsü ilə Moskvada Azərbaycan Günü və iftar süfrəsi təşkil edilib.

AZƏRTAC xəbər verir ki, Moskva Müsəlmanları Ruhani İdarəsinin, Rusiya Müsəlmanları Ruhani İdarəsinin və Moskva Hökumətinin təşəbbüsü ilə Poklonnaya qorada təşkil olunmuş “Ramazan çadırı” tədbirində ictimai xadimlər, Azərbaycan diasporunun nümayəndələri, müxtəlif millətlərdən olan 1000 nəfərə müsəlman iştirak edib.

Heydər Əliyev Fondunun RF-dəki nümayəndəliyinin humanitar proqramlarının rəhbəri Tamilla Əhmədova tədbirdə iştirak edənlərin hamısına təşəkkürünü bildirib. O qeyd edib ki, Müqəddəs Qurani-Kərimin nazil olduğu müqəddəs Ramazan ayında iftar mərasimində görüş təşkil edilməsi yaxşı bir ənənəyə çevrilib. İslam dəyərləri bizim milli mənəviyyatımızın ayrılmaz tərkib hissəsidir. T.Əhmədova vurğulayıb ki, bu gün Azərbaycan iqtisadi, siyasi və mədəni sahələrdə lider olmaqla yanaşı, həm də dünya miqyasında dini-mənəvi dəyərlərin inkişafına böyük töhfə verən multikulturalizm mərkəzi kimi məşhurdur.

Heydər Əliyev Fondunun nümayəndəsi deyib: “Poklonnaya qoradakı memorial məsciddə gözəl bir ənənə yaranıb: bu müqəddəs Ramazan bayramı Azərbaycan diasporunun və müsəlman ümməsinin digər nümayəndələri ilə birgə qeyd edilir. Heydər Əliyev Fondunun nümayəndəliyi hər il müsəlmanlar üçün iftar süfrəsinin təşkilində fəal iştirak edir”.

Moskvadakı Müsəlman məktəbinin direktoru Anas Həzrət Məmmədov tədbir iştirakçılarının hamısını müqəddəs Ramazan ayı münasibətilə təbrik edib, bu tədbirin keçirilməsinə görə, Heydər Əliyev Fonduna təşəkkürünü bildirib. O qeyd edib ki, bu gün azərbaycanlılar üçün, Moskvada yaşayan bütün müsəlmanlar üçün mühüm hadisədir.

“Ramazan çadırı”nın təşkilatçıları Heydər Əliyev Fondunun vitse-prezidenti Leyla Əliyevaya dini-mənəvi dəyərləri yüksək qiymətləndirdiyinə görə təşəkkür məktubu ünvanlayıblar.

Tədbirdə Heydər Əliyev Fondunun vitse-prezidenti Leyla Əliyevanın təşəbbüsü ilə hazırlanmış “Vətən ruhu” video-çarxı nümayiş etdirilib. Moskva Müsəlman məktəbinin şagirdləri dini məzmunlu şeirlər oxuyub, Moskva Dövlət Konservatoriyasının azərbaycanlı tələbələri Azərbaycan bəstəkarlarının əsərlərini ifa ediblər. Mərasim iştirakçılarına “Baku” jurnalının nömrələri paylanılıb.

İftar başlanana qədər müqəddəs Qurandan ayələr və axşam duası oxunub. Sonra müsəlmanlar Azərbaycan milli yeməkləri və şirniyyat dadıblar.

Qeyd edək ki, Rusiya Müftilər Şurasının mühüm layihəsi olan “Ramazan çadırı” xalqlar arasında dostluğu möhkəmlətmək, İslam dininə etiqad edən çoxsaylı xalqların Moskvada yaşayan nümayəndələrini birləşdirmək məqsədilə təşkil olunur.

Heydər Əliyev Fondunun Rusiya Federasiyasındakı nümayəndəliyi hər il bu layihədə fəal iştirak edir, dindarlar üçün iftar süfrəsi açır.

Paylaş:

Baxılıb: 897 dəfə