Bir ölkədən 40, 28 ölkədən 400

Bakı:

27 °C

43 %

4 m/s

Əlaqə

AZ RU EN

Ana səhifə / Xəbər lenti / Bir ölkədən 40, 28 ölkədən 400

Bir ölkədən 40, 28 ölkədən 400

27.04.2022 [10:23]

Rusiya 40 alman diplomatını niyə “persona non qrata” elan etdi?

N.BAYRAMLI

Rusiya öz diplomatlarının Almaniyadan çıxarılmasına cavab verib. Belə ki, rəsmi Moskva Almaniyanın Rusiyadakı diplomatik nümayəndəliklərinin 40 əməkdaşını “persona non qrata” elan edib. Almaniyanın səfiri Gez Andreas von Geyr Rusiya Xarici İşlər Nazirliyinə çağırılaraq ona bu barədə nota təqdim edilib.

Ümumiyyətlə, Rusiya-Ukrayna müharibəsi başlayandan bir sıra ölkələrlə Rusiya arasında diplomatların qarşılıqlı olaraq qovulması “ənənə” halını alıb. Məsələ ilə bağlı politoloq Ramiz Alıyev qəzetimizə açıqlamasında bildirib ki, Almaniya hökuməti aprelin 4-də Rusiya diplomatik qurumlarının 40 əməkdaşını “persona non-qrata” elan etmişdi. Rusiya bu addımı qeyri-dost addım kimi qiymətləndirdi. Onun sözlərinə görə, rəsmi Moskva Almaniyaya qarşı adekvat cavab verdi: “Rusiya tərəfi Almaniyanın xarici işlər naziri Annalena Berbokun rus diplomatlarının qovulması qərarı ilə bağlı arqumentlərini əsassız hesab edir. Eyni zamanda, Almaniya da Rusiyanın anoloji qərarını düzgün saymır və bəyan edir ki, alman diplomatların heç bir günahı yoxdur. Ümumiyyətlə, Rusiya-Ukrayna müharibəsi başlayandan Rusiyanın diplomatik missiyalarının 400-ə yaxın əməkdaşı 28 ölkədən qovulub. Qovulan rus diplomatlarının sayına görə Almaniyadan başqa, Polşa, Sloveniya, Slovakiya, Xorvatiya, Fransa, İtaliya və İspaniya öndə gedir. Rəsmi Moskva isə cavab tədbiri olaraq, 150-dən çox diplomatı ölkədən çıxarıb. Daha çox Polşa, Hollandiya, Belçika, ABŞ, Monteneqro, Estoniya, Latviya, Slovakiya, Bolqarıstan və Latviya səfirliklərinin əməkdaşları “persona non-qrata” elan edilib”.

Politoloqun fikrincə, bu hadisələr ABŞ və Avropanın Rusiya Federasiyasına təsir və təzyiq formalarından biridir: “Bu səbəbdən də Rusiya tərəfi bunu hibrid müharibə hesab edir və diplomatlarının Qərb ölkələrində tam işləyə bilmədiyindən şikayətlənir. Rəsmi Moskva hesab edir ki, Qərb kəşfiyyat xidmətlərinin total nəzarəti yerli dairələrin nümayəndələri ilə ünsiyyəti xeyli çətinləşdirir, həm də yerli nümayəndələr ehtiyatlanırlar ki, onları Rusiya ilə işbirliyində günahlandıra bilərlər. Bütövlükdə, Rusiya ilə Qərb arasında diplomatik münasibətlərin əvvəlki səviyyəyə qayıtması uzun və çətin olacaq. Təkcə aprel ayında Almaniya, Litva, Latviya, Estoniya, Fransa, İtaliya, İspaniya, Avstriya, Danimarka, İsveç, Çexiya və Sloveniya rusiyalı diplomatların ölkədən çıxarıldığını elan ediblər. Eyni zamanda, Latviya hakimiyyəti iki Rusiya konsulluğunu bağlayıb. Bütün bunların fonunda diplomatik gərginliyin azalması yaxın vaxtlarda real görünmür. Bu, yalnız Rusiyanın Ukraynaya qarşı hərbi müdaxiləsini dayandırandan sonra mümkün ola bilər. Müharibənin isə nə vaxt bitəcəyini söyləmək çətindir. Çünki bəzi dövlətlərin sülh təşəbbüslərinə baxmayaraq, Rusiya və Ukrayna arasında razılığın əldə edilməsi mümkün deyil. Burada Rusiyanın və Ukraynanın öz şərtləri var. Belə olduğu təqdirdə tərəflər arasında sülhün əldə edilməsi imkanları sıfıra bərabərdir. Ukraynanı birmənalı olaraq dəstəkləyən Qərb dövlətləri isə Rusiyaya qarşı mümkün addımları atmaqda davam edir”.

Paylaş:

Baxılıb: 651 dəfə