Azərbaycan jurnalistlərinə müraciət: "İntihar xəbərlərinə ciddi yanaşmaq lazımdır"

Bakı:

23 °C

94 %

1 m/s

Əlaqə

AZ RU EN

Ana səhifə / Xəbər lenti / Azərbaycan jurnalistlərinə müraciət: "İntihar xəbərlərinə ciddi yanaşmaq lazımdır"

Azərbaycan jurnalistlərinə müraciət: "İntihar xəbərlərinə ciddi yanaşmaq lazımdır"

20.07.2022 [15:16]

Bu gün Azərbaycan Mətbuat Şurasında "Media və intihar olaylarının işıqlandırılması" mövzusunda tədbir keçirilib.

"Report" xəbər verir ki, tədbirdə MŞ-nın sədri Əflatun Amaşov bildirib ki, bir sıra sayt, qəzet və televiziyalarda, o cümlədən sosial şəbəkələrdə intiharla bağlı xəbərlərin sayı artır: "Hadisə xəbərlərində insanlar qəhrəmana çevrilir. Belə xəbərləri iradəsi zəif insanlar da oxuyurlar və problemlərdən çıxış yolunu da intiharda görürlər. Nəticədə intiharların sayı artır".

Mətbuat Şurasının üvzü Şəmsəddin Əliyev isə bildirib ki, məişət zorakılığı insanları daha çox intihara sürükləyən faktordur: "Hər bir rayonda məişət zorakılığından əziyyət çəkənlər müəyyən edilməlidir. Həmin ailələri tədqiq etmək mümkündür".

Tədbir müzakirələrlə davam edib.

Sonda jurnalistlərə müraciət ünvanlanıb.

Müraciətdə deyilir:

"İntihar hallarının mediada işıqlandırılması ilə bağlı son vaxtlar nəzərə çarpan tendensiyalar narahatlıq doğurmaqdadır. Bu narahatlığı ifadə etmək üçün kifayət qədər ciddi əsaslar var. Bəzi kütləvi informasiya vasitələrinin təqdimatlarından gəlinən nəticə budur ki, ölkəni total intiharlar dalğası bürüyüb. Biz, bu gün Azərbaycan Mətbuat Şurasında keçirilmiş toplantının iştirakçıları belə yanaşmanın bütövlükdə dövlət və cəmiyyət üçün ziyanlı olduğunu düşünürük.

Hesab edirik ki, jurnalist peşesinə dəyər verən hər bir qələm sahibi məsələyə həssas yanaşmağa borcludur. Bu borc həm mənəvi məsuliyyətdir, həm də peşə tələbidir. İstənilən hadisənin işıqlandırılması zamanı jurnalistika üçün vacib məqam ictimai maraq amilidir. Dövlətin mənafelərini cəmiyyətin maraqları ilə uzlaşdırmaq, mövcud xüsusda meydana çıxan problem və çətinliklərin aradan qaldırılmasına dəstək göstərmək kimi yanaşma da peşəmizin təbiətindən irəli gələn xüsusiyyətdir.

Təəssüf ki, intihar olaylarına münasibətdə peşəkarlığı deyil, dəhşət saçan sərlövhələrin seçimini görürük. Belə təəssürat yaranır ki, sanki kimlərsə intiharı təbliğ və təşviq edir, adiləşdirir. Biz söz və ifadə azadlığının dövlət və cəmiyyət üçün önəmini dərk edirik. Onu da xüsusi vurğulayırıq ki, intihar hadisələri ilə əlaqədar bilgilərin də cəmiyyətə çatdırılması vacibdir. Ancaq məsələ ətrafında spekulyasiyalar yolverilməzdir. İntihar olay: baxış sayı toplamaq izləyici auditoriyası genişləndirmək naminə predmetə çevrilməməlidir. Ümumən insanların ahəngini pozma, mənəvi-psixoloji durumuna zərər vurma ehtimali böyük olan hadisə və proseslərin təqdimatında şişirdilmiş ritorikadan, ucuz populizmdən, ajiotaj yaratmağa hesablanmış üsul və vasitələrdən yararlanma azad media prinsiplərinə tamamilə zidddir. Biz hər bir media temsilçisini, hər bir KİV orqanını bu məqamı nəzərə almağa, onu əməli fəaliyyət müstəvisində dərk etməyə çağırırıq. Onu da düşünmək lazımdır ki, insanların dinc birgəyaşam normalarını pozmaq, cəmiyyətdə ruh düşkünlüyü yaratmaq potensialına malik taqdimatların hüquqi müstəvidə də mübahisələndirilmə ehtimalı böyükdür.

Biz, Azərbaycanın aparıcı media orqanlarının təmsilçiləri ölkənin bütün jurnalistlərini ümumən bu və ya digər şəkildə jurnalist fəaliyyəti ilə məşğul olduğunu bildirən şəxsləri intihar olaylarının təqdimatına son dərəcə ciddi yanaşmağa, bu olaylarda hadisənin dəhşət saçan fərdi və şəxsi əhəmiyyət daşıyan motivlərinin üzə çıxarılmasından uzaq durmağa, yalnız ictimai əhəmiyyət daşıyan məqamları işıqlandırmağa çağırırıq. İnanmaq istərdik ki, həmkar təəssübkeşliyinə əsaslanmış bu çağırışımıza həssas yanaşılacaq, qeyd etdiyimiz neqativ temayüllərin aradan qaldırılması naminə səfərbərlik, məsuliyyətli mövqe nümayişi təmin olunacaqdır".

Paylaş:

Baxılıb: 615 dəfə