İcra hakimiyyətlərinin səlahiyyətləri niyə azaldılır?

Bakı:

23 °C

49 %

6 m/s

Əlaqə

AZ RU EN

Ana səhifə / Xəbər lenti / İcra hakimiyyətlərinin səlahiyyətləri niyə azaldılır?

İcra hakimiyyətlərinin səlahiyyətləri niyə azaldılır?

16.12.2022 [10:25]

Vahid Əhmədov: Bu gün ölkəmizdə Naxçıvan Muxtar Respublikası ilə birgə 15 iqtisadi rayon mövcuddur

Ölkəmizdə aparılan islahatlar, iqtisadi və sosial sferada həyata keçirilən əsaslı pozitiv dəyişikliklər dövlətimizin inkişafına xidmət göstərir. Eyni zamanda, cəmiyyətin bütün sahələrində müşahidə olunan yeniləşmə dövlət idarəçiliyi sisteminin təkmilləşdirilməsini, səmərəliliyin yüksəldilməsini də zərurətə çevirib. Bu mənada, Prezident İlham Əliyevin imzaladığı fərman və sərəncamlar xüsusi əhəmiyyət daşıyır. Vurğulanmalıdır ki, reallaşdırılan struktur islahatları dövlət idarəçiliyini daha da təkmilləşdirmək, dövlət orqanlarının və qurumlarının fəaliyyətini optimallaşdırmaq baxımından əhəmiyyətli rol oynayır. Məsələn, Prezidentin “Yerli icra hakimiyyətləri haqqında Əsasnamə”də dəyişiklik edilməsi barədə Fərmanı, eləcə də “Gənclər və İdman Nazirliyinin strukturunun təkmilləşdirilməsi haqqında” Sərəncamı da bu mənada diqqəti cəlb edir. Azərbaycan dinamik və hərtərəfli şəkildə, uğurla inkişaf edən bir ölkədir və onun inkişafı daha çevik struktura malik idarəetmə tələb edir, bu baxımdan struktur vahidlərində islahatların aparılması mühüm şərtlərdəndir. Eyni zamanda, bu islahatlar özündə bir sıra dəyişiklikləri də zəruri edir. Məsələn, yeni struktur islahatları yerli icra orqanlarının səlahiyyətlərinin azaldılmasına yol açır. Regional qurumların formalaşdırılması, onların mərkəzi icra orqanına tabe olması yerli icra hakimiyyətlərinin ləğvi məsələsini aktuallışdırırmı?

Məsələ ilə bağlı fikirlərini bölüşən Milli Məclisin deputatı Vahid Əhmədov bildirib ki, 2003-cü ildə Prezident İlham Əliyevin dövlət başçısı seçilməsinin ardından fərqli istiqamətlər üzrə çoxsaylı islahatlar həyata keçirilib. Bu islahatlar hazırda da davam edir. “Bu islahatların arasında struktur islahatları xüsusi yer tutur. Bunlar olduqca vacibdir. Eyni zamanda, Azərbaycanda yerli idarəetmə mexanizminin dəyişməsi zərurəti mövcuddur. Məsələn, bu qədər icra hakimiyyətlərinin olmasılazım deyil. Bu gün ölkəmizdə Naxçıvan Muxtar Respublikası ilə birgə 15 iqtisadi rayon mövcuddur. Fikrimcə, həmin 15 iqtisadi rayon üzrə Prezidentin xüsusi nümayəndəsi təyin edilməlidir. Həmin xüsusi nümayəndələrin isə çevik və optimal aparatı formalaşdırılmalıdır. Həmin aparat işlək xüsusiyyətə malik olmalıdır. Bu gün yerli icra hakimiyyətlərinin aparatları kifayət qədər şişirdilib. Həmin aparatların fəaliyyətində çox ciddi problemlər nəzərə çarpır. Hazırda bəzi qurumların yerli idarələri regional idarələrdə birləşdirilir. Bu, təhsil, mədəniyyət sahəsində tətbiq edildi. Ən son isə Gənclər və İdman Nazirliyinin regional idarələrinin formalaşdırılmasının şahidi olduq. Bütün bunlar gələcəkdə məhz iqtisadi rayonlarla əlaqədar böyük islahatların keçirilməsi üçün gedən hazırlıqdır. Bu fəaliyyət mexanizmi çevik idarəetmə üçün əsas mexanizmlərdən biridir. Burada həm birbaşa kadr, həm də struktur islahatları aparılır”.

Millət vəkilinin sözlərinə görə, regional idarələrin yaradılmasının, yerli idarələrin ləğvinin icra hakimiyyətlərinin səlahiyyətlərinin azaldılması və ya yüksəldilməsi kimi dəyərləndirmək düzgün deyil. Biz əgər regionların inkişafını istəyiriksə, orada çevik və işlək idarəetmə aparatı qurulmalıdır. Həmin çevik aparatlar isə bölgələrə investisiya gətirməlidir, əlaqələr qurmalıdır. Amma indiki halda rayon icra hakimiyyəti orqanları investisiya gətirməkdə maraqlı deyil. Hesab edirəm ki, 15 iqtisadi rayon üzə idarəetmə mexanizmi formalaşdırılmalıdır. Necə ki, Ağdamda, Şuşada Prezidentin xüsusi nümayəndəsi təyin edildi. Bu addımlarla problemin birdəfəlik həllinə nail olunacaq. Bu islahatlar mütləq keçirilməlidir və aparılan hazırki struktur islahatları da buna xidmət edir”, - deyə V.Əhmədov əlavə edib.

SADİQ

Paylaş:

Baxılıb: 443 dəfə