Təxribatlar davam edir...

Bakı:

29 °C

47 %

6 m/s

Əlaqə

AZ RU EN

Ana səhifə / Xəbər lenti / Təxribatlar davam edir...

Təxribatlar davam edir...

15.03.2023 [10:20]

Ermənistan regionda gərginliyin artmasına səbəb olan addımlar atmağa, sülhə, təhlükəsizliyə və sabitliyə təhdid törətməyə davam edir. Nəticə etibarı ilə eskalasiya

riskləri daha da güclənir. Son bir neçə gün ərzində Ermənistan tərəfinin təxribatları yenidən intensiv hal alıb. Belə ki, martın 13-ü axşam saatlarından martın 14-ü səhər saatlarınadək Ordumuzun mövqeləri 19 dəfə fasilələrlə atəşə tutulub. Müdafiə Nazirliyinin mətbuat xidmətindən bildirilib ki, Ermənistan silahlı qüvvələrinin bölmələri İstisu, Basarkeçər rayonunun Yuxarı Şorca, Qaraiman, Günəşli, Gorus rayonunun Qaraşen istiqamətlərində yerləşən mövqelərindən Ordumuzun Kəlbəcər rayonunun İstisu, Mollabayramlı, Laçın rayonunun Cağazur, Daşkəsən rayonunun Astaf və Təzəkənd yaşayış məntəqələri istiqamətlərində yerləşən mövqelərini müxtəlif çaplı atıcı silahlardan atəşə tutub. Bundan başqa Rusiya sülhməramlı kontingentinin müvəqqəti yerləşdiyi Azərbaycan ərazisindəki qeyri-qanuni erməni silahlı dəstəsinin üzvləri tərəfindən Azərbaycan Ordusunun Xocalı rayonu istiqamətində yerləşən mövqeləri də atəşə tutulub.

Ordumuzun bölmələri tərəfindən adekvat cavab tədbirləri görülüb.

Hərbi məsələlər üzrə ekspert Ədalət Verdiyev “Yeni Azərbaycan” qəzetinə açıqlamasında Ermənistanın son davranışlarının həm sərhəddə, həm də Rusiya sülhməramlılarının müvəqqəti nəzarətində olan ərazilərdə toqquşmaları qaçılmaz etdiyini bildirib: “Başqa sözlə, Ermənistan özü artıq etiraf edir ki, eskalasiya mümkündür. Və görünən odur ki, Vətən müharibəsi və sonrakı müddətdə Ermənistanın başına gələn ağrılı-acılı fəlakətlərdən bəzi separatçılar və bəzi erməni rəhbərləri özləri üçün doğru-dürüst bir nəticə çıxarmayıblar”.

“Ermənistan bu gün Azərbaycan Ordusunun yerləşdiyi mövqeləri özü üçün analiz edib, növbəti eskalasiyanın nə ilə nəticələnəcəyini düşünmürsə, o zaman Azərbaycanın Ermənistanı növbəti dəfə cəzalandırmaqdan başqa yolu qalmır”, - Ə.Verdiyev fikirlərinə yekun vurub.

Azərbaycanın mövqelərinin atəşə tutulması, atəşkəs rejiminin pozulması həm Ermənistan-Azərbaycan sərhəddində, həm də müvəqqəti olaraq Azərbaycan ərazisinə yerləşdirilmiş Rusiya sülhməramlılarının yerləşdiyi bölgədə təxribatların baş verməsi bir daha onu göstərir ki, erməni terrorçu ünsürləri regionda qeyri-stabilliyin yaradılmasında maraqlıdırlar. Baş verə biləcək hər hansı bir təxribatın Ermənistan üçün hansı nəticələr verəcəyi isə artıq hər kəsə məlumdur.

Nicat Dilqəmli

Paylaş:

Baxılıb: 493 dəfə