Düşüncə tanrısı, fikir adamı...

Bakı:

16 °C

94 %

5 m/s

Əlaqə

AZ RU EN

Ana səhifə / Xəbər lenti / Düşüncə tanrısı, fikir adamı...

Düşüncə tanrısı, fikir adamı...

16.03.2023 [10:44]

Jurnalistin zəhməti, jurnalistin qiyməti

Jurnalistlər cəmiyyətin yükünü, dərdini çəkən, hətta bəzi hallarda ictimai fiqura çevrilmək arzusunda olanları idarə edən şəxslərdir. Biz fikir adamlarıyıq, ancaq bu gün fikir yaratmaqdan ziyadə, fikir çəkən adamlar olmuşuq. Hər kəsə aid olmasa da, cəmiyyətdə yüksək reputasiya qazanmış adamların əksəriyyətini “ikonlaşdıran” da məhz jurnalistlərdir. Ancaq onların bu zəhmətinə qiymət verilirmi? Şübhəsiz bu zəhmətin maddi qarşılığı yoxdur, heç biz də elə bir şey gözləmirik. Ancaq yeri gələndə sözlərini bəzədiyimiz fiqurların, günü gələndə bizə rişxənd etməsi olduqca təsirlidir.

Onlar düşünür ki, jurnalistika bir platformadır, istifadə etdik, məqsədimizə çatdıq, bununla da hər şey yekunlaşdı. Ümumiyyətlə, “jurnalistikadan platforma kimi istifadə etmək” ifadəsi mənə həmişə maraqlı olub. Ancaq bu sahədə çalışdıqca gördüm ki, elə bəzi hallarda jurnalistlərə də bu məqsəd üçün yanaşırlar. Kim cəmiyyətdə söz sahibi olmaq istəyirsə, media ilə yaxın münasibət qurur. Biz də bəzi hallarda həddindən artıq sadəlik, səmimiyyət nümayiş etdirib, bu münasibəti yüksək dəyərləndiririk. Gözümüz nə vaxt açılır? O zaman da gec olur, öz əlimizlə yaratdığımız fiqurlar özümüzə açıqlama verməkdə təkəbbürlü mövqedə dayanırlar.

Kainatı və insanları yaradan Tanrıdırsa, ictimai fiqurları da yaradan biz jurnalistlərik. Bənzətmə nə qədər kosmik olsa da, bir o qədər realdır. Tanrı insanların qəlbinə hökm edir, jurnalistlər də insanları idarə edən düşüncələrə hökm etmək qabiliyyətinə malikdir. Düşüncələri yaxşı və ya mənfi istiqamətdə dəyişmək də medianın əsas silahıdır. Hətta bəzi hallarda gördüyümüz eyibləri də daha yumşaq formada çatdırırıq.

Hələ məsələnin daha ciddi tərəfləri də var. Hərdən sosial şəbəkələrdə deputatların əlçatmaz olduğu ilə bağlı fikirlər səsləndirilir. Cəmiyyət bəzən həqiqətdən olduqca uzaq düşür. Nə qədər çalışsaq da, onlara gerçəyi göstərməkdə çətinlik yaşayırıq. Təsəvvür edin, biz xalqın seçdiyi deputatın köməkçisini keçib, özüylə əlaqə saxlamağa nail oluruq. Ancaq incəsənət adamlarının prodüserlərinin qurduğu sərhədi aşa bilmirik. Xalqın, millətin sənətçisi olduğunu iddia edənlər xalqın arasında olmaqdan çəkinir, onlara yaxın durmaq da istəmirlər. “Məşhurluq” arzusu ilə ekranları, mətbuatı zəbt edən həmin adamlar bir müddət sonra mediadan üz döndərir. Deyir ki, guya öz daxili aləmi ilə mübarizə içindədir. Bəli, öz daxili aləmi ilə... Bu hallar cəmiyyətdə duyğuları işə salsa da, bizdə ancaq gülüş reseptorlarını oyadır. Axı ən yaxşı biz bilirik, o aləmdə dərinə gediləsi elə də ciddi bir şey yoxdur. Ona görə ki, özünü ulduz hesab edən o dəmirləri qiymətli daşlara biz çevirmişik.

Haşiyədən çox kənara çıxmadan jurnalistika ilə bağlı kiçik bir məqamı da qeyd etmək istərdim. Müəllimlərimdən biri ilk dərs günündə məndən jurnalistin bir gününü təsvir etməyimi istəmişdi. Onda jurnalistin həyatı mənim üçün maraq, axtarış və rəngarənglikdən ibarət idi. Əfsus ki, bu gün düşüncələrim tamamilə öz istiqamətini dəyişib. İndi mənə görə jurnalistin bir günü əksər hallarda stress və əsəb üzərində qurulub. Sanki cavab verməli olduğu məsələdən boyun qaçıranından tutmuş, yazılarımızda durğu işarəsi səhvi axtaranına qədər hər kəs səbrimizi sınamağa and içib. İş elə bir həddə çatıb ki, yarımız qədər bilməyənlər bizi yarıtmağa çalışır. Necə?! “Yazandan sonra göndərin, təsdiqləyək” deyən fiziki adamlar özlərini lap “nazirlik” səviyyəsinə qaldırır. Bu hələ harasıdır, yazılası, deyiləsi o qədər hadisələr olur ki. Amma hər nüansı yazmır, hamısını demirik. Həm boşuna kağız israfıdır, həm də zaman.

İndi hər dəfə bu hadisələri yaşadıqca, öz-özümə çox suallar verirəm. Əksər vaxtlarda elə özümün özümə verdiyim bu təlatümlü suallar cavabsız. Çünki kimsə bu sahəni seçməyimlə bağlı təkid etməmişdi. İndi də məni bu sahədə qalmağa məcbur edən yoxdur. Sadəcə, jurnalistika işdən daha çox həyat tərzinə çevrilir, müəyyən zaman sonra sən getmək istəsən də o səni buraxmır...

Günel ABBAS

Paylaş:

Baxılıb: 452 dəfə