Azərbaycan icazə verərsə...

Bakı:

26 °C

64 %

5 m/s

Əlaqə

AZ RU EN

Ana səhifə / Xəbər lenti / Azərbaycan icazə verərsə...

Azərbaycan icazə verərsə...

02.09.2023 [12:00]

“Sputnik Armeniya” radiostansiyası Qarabağda yayımı dayandırıb

“Sputnik Armeniya” radiostansiyasının yayımı Qarabağ ərazisində, eyni zamanda, Xankəndi və ermənilər yaşayan bölgələrdə dayandırılıb. Məsələ ilə bağlı mediaholdinqə sorğu göndərən Rusiya Dövlət Dumasının ermənipərəst deputatı Konstantin Zatulinə “Rossiya seqodnya” mediaqrupunun baş direktoru Dmitri Kiselyov cavab verib.

Yayımın dayandırılmasının səbəbi...

Kiselyov bildirib ki, “Sputnik” radiosunun Qarabağda yayımının davam etdirilməsi üçün Azərbaycanın icazəsi lazımdır. “Bir müddət əvvəl Ermənistanın baş naziri Nikol Paşinyan bildirib ki, sülhə nail olmaq üçün İrəvan Azərbaycanın ərazi bütövlüyünü tanımağa və Ermənistanın ərazisini 1991-ci ilin sərhədlərində qeyd etməyə hazırdır. Biz bu bəyanata əsasən güman edirik ki, Azərbaycanın tənzimləyici orqanlarının razılığı olmadan efirimizin retranslyasiyasının davam etdirilməsi Moskva tərəfindən münasibətlərin səmimiliyini şübhə altına qoyur və ölkələrimiz arasında dövlətlərarası əlaqələrin mürəkkəbləşməsinə səbəb ola bilər”, - məktubda deyilir.

“Rəsmi Bakıdan yayımı davam etdirmək üçün bütün aktual hüquqi normalara uyğun icazə alınarsa, regionda yayımı davam etməyə hazırıq”, - deyə D.Kiselyov əlavə edib.

Fəallaşdırılmış ermənipərəstlər narahatdır

Bu fakt Azərbaycanın ədalətli mövqeyinin dünya miqyasında dəstəkləndiyini və apardığımız siyasi kursun beynəlxalq hüquqa söykəndiyinin növbəti bariz təsdiqidir. Ölkəmiz 44 günlük müharibədə qazandığı qələbə nəticəsində bütün haqsızlıqlara və ədalətsizliyə son qoydu. Bu gün işğaldan azad edilmiş torpaqlarımız üzərində suveren hüquqlarımız bərpa olunur və bu fakt bütün ölkələr və təşkilatlar, hətta vaxtilə erməniləri dəstəkləyənlər tərəfindən də etiraf edilir.

Son dövrlərdə bəzi ermənipərəst mərkəzlərin məqsədli şəkildə aktivləşdirilməsinin şahidi oluruq - bunun ən əsas səbəbi Azərbaycanın öz gücü ilə regionun reallığını, siyasi proseslərin axarını dəyişməsidir. Ermənipərəstlər prosesin hansı istiqamətdə inkişaf etdiyini görür. Bu mənada da, onlar aktivləşir və ya aktivləşdirilir. Aktivləşdirilməsini vurğulamağımız isə təsadüf deyil. Erməni lobbisi, ermənipərəst dairələr tərəfindən stimullaşdırılan bu kimi şəxslər illərlə onlara xərclənən çirkli pulların yuyulmasında da bir mexanizm kimi istifadə olunublar. Onların fəallış(dırıl)masında ən böyük səbəblərdən biri və bəlkə də ən birincisi məhz budur.

Bütün dünya etiraf edir...

Bu gün Azərbaycanın haqq səsi dünyada eşidilməkdədir - BMT TŞ-dakı son müzakirələr bu həqiqətin üzərinə növbəti dəfə işıq saldı. Hətta Ermənistanın “ümidlə” baxdığı bəzi dövlətlər belə Azərbaycanın haqq işini, ədalətli təkliflərini müdafiə etdi. Artıq dünya güclü Azərbaycanın iradəsini tanıyır, onunla hesablaşır. Heç kimə sirr deyil ki, rəhbərliyində Marqarita Simonyanın təmsil olunduğu bir media holdinqin belə bir addım atması da təsadüfi deyil - bu, Azərbaycanın apardığı uğurlu siyasətin nəticəsidir. Azərbaycana qarşı informasiya müharibəsində daima erməniləri dəstəkləyən bu kimi mediaqruplar artıq “tərk-silah” olunurlar. Bunun səbəbləri, eyni zamanda Azərbaycanın artan nüfuzu, reallıqları dünyaya təqdim etmək imkanlarının artması ilə də əlaqədardır. Məsələn, 44 günlük müharibə dövründə Prezident İlham Əliyevin 30-dan artıq xarici media orqanına müsahibə verməsi dünyada görünməyən bir hadisə kimi hələ də xatırlanır - Azərbaycanın bu informasiya müharibəsində əldə etdiyi qələbənin böyüklüyü isə bu günün reallığı ilə miqyassızdır. Artıq bütün dünya Azərbaycan həqiqətlərini, proseslərə nəzarət etdiyimizi etiraf edir. Bu, növbəti böyük qələbədir...

SADİQ

Paylaş:

Baxılıb: 685 dəfə