Əməliyyatları kim idarə edəcək?

Bakı:

29 °C

49 %

4 m/s

Əlaqə

AZ RU EN

Ana səhifə / Xəbər lenti / Əməliyyatları kim idarə edəcək?

Əməliyyatları kim idarə edəcək?

02.09.2023 [12:10]

“Vaqner”çilər and içəcəklər...

Ş.Xankişiyeva

Liderinin müəmmalı ölümündən sonra “Vaqner” Özəl Hərbi Şirkəti ilə bağlı məlumatlar səngimək bilmir. Məlum hadisənin səhəri günü “vaqner”çilərin təhdidli bəyanatı, qərb analitiklərinin şübhəli açıqlamaları, Özəl Hərbi Təşkilatın yeni rəhbərinin kimliyi barədə təzadlı fikirlər və s.bu qrupun bundan sonra kim tərəfindən yönəldiləcəyini və hansı xəttlə hərəkət edəcəyini sual altına qoymuşdu. Dünən isə “Bloomberg” maraqlı məlumat yayıb. Nəşrin məlumatında deyilir ki, Rusiya Müdafiə Nazirliyi Afrika və Yaxın Şərqdə yerləşən “Vaqner” Özəl Hərbi Şirkətinin muzdlularına nəzarət etməyi planlaşdırır. Bu xəbərin qaynağının bu yaxınlarda Rusiya prezidentinin fərmanı ilə əlaqəli olması şübhə yaratmır. Sözügedən fərmanla Putin “Vaqner”in Rusiya ordusuna qoşulmasına icazə vermişdi. Priqojinin ölümündən 2 gün sonra imzalanmış fərmana görə, hərbi tapşırıqları yerinə yetirən könüllülər Rusiya dövlət bayrağı önündə and içməli olacaqlar.

Burada söhbət könüllü birləşmələrin üzvlərindən və orduya tapşırıqların yerinə yetirilməsində köməklik göstərən və xüsusi hərbi əməliyyatda iştirak edən digər şəxslərdən gedir. Həmçinin ərazi müdafiəsinə cəlb olunan vətəndaşlar da and içməlidirlər.

Böyük Britaniyanın avqustun ikinci ongünlüyündə “Vaqner” qruplaşmasını terror dəstəsi kimi tanıyacağı barədə irəli sürdüyü təşəbbüsdən və baş verən gözlənilməz hadisədən dərhal sonra imzalanmış sənədi bir sıra qərb hərbi ekspertləri müxtəlf istiqamətlərdə qiymətləndirirlər. Çoxluğun fikirlərindən isə belə qənaətə gəlmək olar ki, “Vaqner”in leqallaşdırılıması istiqamətində işlərə start verilib. Bu arada “Vagner”in keçirəcəyi əməliyyatların idarə edilməsi həmin təşkilatın rəhbərliyi tərəfindən deyil, Rusiya Müdafiə Nazirliyi ilə əlaqəli silahlı podratçı tərəfindən həyata keçiriləcəyi istisna edilmir. İstinad etdiyimiz nəşrə məlümat verən mənbənin sözlərinə görə, “Vaqner”in bütün gizli xarici şəbəkəsinin Rusiya hərbi komandanlığına tabe edilməsi planlaşdırılır. Təbii ki, belə bir planın nəzərdə tutulması Rusiyanın gələcək təhdidlərdən sığortalanması kimi izah oluna bilər. Xatırladaq ki, bu ilin iyun ayında “vaqner”çilərin qiyamı olmuş, Priqojin bir neçə yüksəkranqlı hərbçilərin istefasını tələb etmişdi. Sonradan Belarus prezidentinin məsələyə müdaxiləsi ilə qiyam “bitmiş” sayılmışdı. Rusiya prezidentinin xəyanətkar adlandırdığı Priqojin əvvəlcə Sankt-Peterburqda görünmüş və son video görüntülərini Afrikadan yayımlamışdı. Putinin vaqnerçilərin bu hərəkətləri ilə barışmayacağı proqnozlaşdırılırdı. Elə bu səbəbdən də Vaqnerin fəaliyyətinə birbaşa təsir göstərilməsi ilə bağlı plan şübhəsiz ki, gələcəkdə bu qrupun təşkil edəcəyi üsyanların qarşısını almağa imkan verəcək.

Digər maraqlı məqam isə bu planın Rusiyanın yüksək rütbəli hərbi rəsmisinin Liviya və Suriyaya səfərindən sonra qurulmasıdır. İki gün öncə Priqojinin daha bir video-görüntüsü yayılmışdı. Videoda Vaqner lideri ölümü ətrafında gedən müzakirələrə cavab da vermişdi ki, Afrikada məzuniyyətdədir. Hadisələri və təşkilatın fəaliyyət xəttinin nəzərəçarpacaq dərəcədə dəyişdirilməsi üzərində işi araşdırarkən daha bir sual ortaya çıxır: Rusiyanın yüksək rütbəli hərbi rəsmisi Liviya və Suriyaya bu video yayımlanmadan sonra getmişdi, yoxsa əvvəl?

Paylaş:

Baxılıb: 773 dəfə