Doqquzuncu gün...

Bakı:

27 °C

56 %

5 m/s

Əlaqə

AZ RU EN

Ana səhifə / Xəbər lenti / Doqquzuncu gün...

Doqquzuncu gün...

06.09.2023 [10:35]

Xoş mərama anlaşılmaz etiraz

Yeganə BAYRAMOVA

Azərbaycan Qızıl Aypara Cəmiyyətinin Xankəndiyə göndərdiyi yardım artıq 9-cu gündür ki, Ağdam-Xankəndi yolunun üzərindəki Rusiya sülhməramlılarının postunun qarşısındadır.

Azərbaycan Qızıl Aypara Cəmiyyətinin əməkdaşları, könüllülər ərazidə qurulan çadırlarda gecələyiblər. Onların əsas məqsədi Qarabağda yaşayan erməniəsilli vətəndaşlara humanitar yardım göstərməkdir. Ərazidə olan Azərbaycan Qızıl Aypara Cəmiyyətinin nümayəndələri gətirdikləri yükün keyfiyyət sertifikatını Azərbaycan ərazisində müvəqqəti yerləşdirilən Rusiya sülhməramlılarına təqdim ediblər. Yardımın erməniəsilli şəxslərə çatdırılması üçün danışıqlar davam etdirilir.

Xatırladaq ki, avqustun 29-da Azərbaycan Qızıl Aypara Cəmiyyəti tərəfindən Qarabağda yaşayan erməniəsilli şəxslərin ehtiyaclarını qarşılamaq üçün Bakıdan içərisində 40 ton un olan 2 TIR yola salınıb.

“Zəfər” Şəhid Ailələrinə Dəstək İctimai Birliyinin sədri Sevinc Əlizadə “Yeni Azərbaycan”a açıqlamasında bildirib ki, “Humanitar fəlakətlə” üzləşənlərin onlara ünvanlanan yükə sahib çıxmaması, “aclıq şousu” təşkil edənlərin hər gün bir hava çalması ölkəmizin hər bir sakinində narazılıq doğurur: “Azərbaycan Qızıl Aypara Cəmiyyətinin bu humanist addımına erməni tərəfinin münasibəti heç cür başadüşülən deyil. Bu cür hərəkətlər açıq şəkildə göstərir ki, qondarma rejim və separatçılar ölkəmizin həmin bölgəsində yaşayanların cəmiyyətə inteqrasiyasında maraqlı deyillər!”.

Birlik sədrinin sözlərinə görə, Azərbaycan Qızıl Aypara Cəmiyyətinin ərzaq yükü göndərməsi Qarabağda yaşayan ermənilərin taleyindən “narahat” olan Ermənistana, onun havadarlarına, eləcə də dünya ictimaiyyətinə Ağdam-Xankəndi yolunun açıq olduğunu göstərir: “Laçın yolunun siyasiləşdirilməsinə və ya ona hər hansı bir xüsusi funksiya verilməsinə nə ehtiyac var? Əvvəla, erməni milliyyətindən olanların yaşadığı ərazi tarixi Azərbaycan torpağıdır. Bunu Ermənistan rəsmiləri də etiraf ediblər. İkincisi, həmin ərazidə yaşayanların hansısa problemi varsa, bu, Azərbaycan hökumətinin səlahiyyətlərinə aiddir və bunu Azərbaycan hökuməti də həll etməlidir. Onların ağlı yenə də ötən əsrin 80-ci illərinin axırlarına, 90-cı illərinin əvvəlinə gedir. Yenə də özlərinin ağır vəziyyətdə və “blokada şəraitində” yaşadıqlarını, məhrumiyyətlərə düçar olduqlarını, aclıq çəkdiklərini aləmə car çəksinlər. Məqsəd ancaq gərginlik yaratmaq, bölgədə qeyri-müəyyənliyi uzatmaq və mövcud vəziyyətdən Azərbaycanın əleyhinə istifadə etməkdir”.

Paylaş:

Baxılıb: 610 dəfə