Redikül müxalifət xəyanət yolunu davam etdirir

Bakı:

22 °C

68 %

6 m/s

Əlaqə

AZ RU EN

Ana səhifə / Xəbər lenti / Redikül müxalifət xəyanət yolunu davam etdirir

Redikül müxalifət xəyanət yolunu davam etdirir

21.09.2023 [10:42]

AXCP, ReAl və “Müsavat”ın xain üzü...

Azərbaycanın Qarabağ bölgəsində keçirdiyi lokal xarakterli antiterror tədbirləri məqamında ölkənin siyasi palitrasının demək olar ki, mütləq əksəriyyətinin, 23 siyasi partiyanın dəstək və birlik bəyanatı imzalaması olduqca əhəmiyyətli idi. Bu bəyanat özündə bir sıra amilləri əxz edir - ölkəmizdə milli məsələlərdə vahid düşüncənin, vahid siyasi yanaşmanın olduğunu göstərir, xarici ermənipərəst mərkəzlərin apardığı qərəzli kampaniyalara qarşı milli müqaviməti daha da gücləndirir, ordumuza və xalqımıza mənəvi və psixoloji üstünlüklər qazandırır. Xatırladaq ki, sənədə imza atan 23 siyasi partiya Prezident, Müzəffər Ali Baş Komandan İlham Əliyevin ölkəmizin ərazi bütövlüyünün və əhalinin təhlükəsizliyinin təmin olunması, erməni silahlı birləşmələrinin təxribatlarının qarşısının alınması, işğaldan azad edilən torpaqlarımızda məskunlaşan minlərlə soydaşımızın təhlükəsizliyinin təmin olunması üçün həyata keçirdiyi siyasəti və verdiyi hərbi əmri dəstəklədiyini, onun ətrafında sıx birləşdiyini bəyan edib. Eyni zamanda siyasi təşkilatlar xalqımızı Vətən müharibəsində olduğu kimi, bu şərəfli işdə də həmrəyliyə, möhtərəm Prezidentimiz və Ali Baş Komandanımızı dəstəkləməyə çağırıb.

Beynəlxalq aləmə milli birlik mesajı...

Partiyaların birgə bəyanatı siyasi həmrəylin nümunəsi olmaqla yanaşı, Azərbaycanda yaşanan siyasi birliyi də təcəssüm etdirir. Bu fakt bir daha onu göstərir ki, Ermənistanın yaratdığı terror təhdidinə, təxribatlara etiraz bütövlükdə siyasi palitranı əhatə etməkdədir. Bəyanatda ölkə Prezidentinin işğaldan azad edilən torpaqlarımızda məskunlaşan minlərlə soydaşımızın təhlükəsizliyinin təmin olunması üçün həyata keçirdiyi siyasətin dəstəklənməsi 30 ilə yaxın işğaldan əziyyət çəkən xalq üçün mühüm məqamdır - bununla siyasi təşkilatlar həm də Azərbaycan xalqının öz ata-baba yurdunda yaşamaq hüququnun təmini uğrunda mübarizə aparan Müzəffər Ali Baş Komandanın apardığı siyasəti dəstəklədiyini bəyan edir. Bu bəyanat həm də Ermənistanın apardığı təcavüzkar siyasətə qarşı on illiklərlə susqunluq nümayiş etdirən, buna göz yuman beynəlxalq təşkilatlar üçün bir mesajdır - Azərbaycan cəmiyyəti milli məsələlərdə bütövdür, siyasi baxışların fərqliliyi burada heç bir rol oynamır.

Ənənəyə çevrilmiş satqınlıq

Hər zaman “milli vətənpərvərliyi”, “milli təəssübkeşliyi” özünün “pafos şüarına” çevirməyə adət etmiş, bu pərdə arxasında gizlənməyə çalışan bəzi “siyasilər” isə bu bəyanata imza atmamaqla yenidən “imtahandan kəsildilər”. Müsavat Partiyası, ReAl Partiyası və AXCP nümayiş olunan milli həmrəyliyə qoşulmamaqla özlərinin əsl simalarını ortaya qoydular. Əslində bu partiyaların “ənənəvi” mövqeyi hər kəsə bəllidir və yaşanan hal ilk deyil. Həssas məqamlarda daima özünü “uzaq tutan”, milli birliyin vacib olduğu məqamlarda kənara çəkilməkdə “mahir” olan AXCP və “Müsavat” eyni mövqeni 2020-ci ilin iyulunda baş vermiş Tovuz hadisələri və həmin ilin sentyabrında başlanan Vətən müharibəsi günlərində də ortaya qoymuşdu. Növbəti dəfə bu addımı təkrarlayan redikül partiyalar ümummilli məsələmiz olan erməni terroru təhdidinin ifşasına, aradan qaldırılmasına yönəlmiş antiterror tədbirləri ilə bağlı bəyanata qoşulmamaqla milli birlik və həmrəylik kimi ülvi mənəvi hisslərdən uzaq olduqlarını, bu xalqın maraqlarına qarşı cəbhə tutduqlarını nümayiş etdirirlər.

Xəyanət və ya siyasi iflas...

Qaraguruhçu xislətindən əl çəkməyən və siyasi ambisiyalarının qurbanına çevrilmiş, şəxsi korporativ mənafelərini dövlətin və xalqın mənafeyindən üstün tutanların bu addımının isə bir adı var - milli xəyanət. Addımbaşı “milli” olduğunu bəyan etməkdən yorulmayan bu qüvvələr tutduqları mövqe ilə ermənipərəst mərkəzlərin əmrlərini yerinə yetirdiklərini, onların diqtəsi altında çalışdıqlarını etiraf etmiş olurlar. Satqınlığı, xainliyi özünə peşə seçənlər üçün isə millət və xalq anlayışı şəxsi maraq anlayışından sonra gəlir.

Qeyd edək ki, həmin “siyasi partiyaların” tutduğu mövqe cəmiyyət tərəfindən də birmənalı şəkildə xəyanət kimi qarşılanır və qiymətləndirilir. Redikül partiyaların həssas, milli məsələlərdə xəyanət yolunu seçməsi isə onların siyasi iflası deməkdir...

P.İSMAYILOV

Paylaş:

Baxılıb: 488 dəfə